शिवताण्डवस्तोत्रम्

जटाटवीगलज्जलप्रवाहपावितस्थले गलेऽवलम्ब्य लम्बितां भुजङ्गतुङ्गमालिकाम्⁠ ⁠। डमड्डमड्डमड्डमन्निनादवड्डमर्वयं चकार चण्डताण्डवं तनोतु नः शिवः शिवम्⁠ ⁠॥⁠ ⁠१⁠ ⁠॥

Jataataveegalajjalapravaahapaavitasthale Gale'valambya lambitaam bhujangatungamaalikaam | Damaddamaddamaddamanninaadavaddamarvayam Chakaara chandataandavam tanotu nah shivah shivam || 1 ||

जटाकटाहसम्भ्रमभ्रमन्निलिम्पनिर्झरी- विलोलवीचिवल्लरीविराजमानमूर्द्धनि⁠ ⁠। धगद्धगद्धगज्ज्वलल्ललाटपट्टपावके किशोरचन्द्रशेखरे रतिः प्रतिक्षणं मम⁠ ⁠॥⁠ ⁠२⁠ ⁠॥

Jataakataahasambhramabhramannilimpanirjharee- Vilolaveechivallareeviraajamaanamoorddhani | Dhagaddhagaddhagajjvalallalaatapattapaavake Kishorachandrashekhare ratih pratikshanam mama || 2 ||

धराधरेन्द्रनन्दिनीविलासबन्धुबन्धुर- स्फुरद्दिगन्तसन्ततिप्रमोदमानमानसे⁠ ⁠। कृपाकटाक्षधोरणीनिरुद्धदुर्धरापदि क्वचिद्दिगम्बरे मनो विनोदमेतु वस्तुनि⁠ ⁠॥⁠ ⁠३⁠ ⁠॥

Dharaadharendranandineevilaasabandhubandhura- Sphuraddigantasantatipramodamaanamaanase | Krupaakataakshadhoraneeniruddhadurdharaapadi Kvachiddigambare mano vinodametu vastuni || 3 ||

जटाभुजङ्गपिङ्गलस्फुरत्फणामणिप्रभा- कदम्बकुङ्कुमद्रवप्रलिप्तदिग्वधूमुखे⁠ ⁠। मदान्धसिन्धुरस्फुरत्त्वगुत्तरीयमेदुरे मनो विनोदमद्भुतं बिभर्तु भूतभर्तरि⁠ ⁠॥⁠ ⁠४⁠ ⁠॥

Jataabhujangapingalasphuratphanaamaniprabhaa- Kadambakunkumadravapraliptadigvadhoomukhe | Madaandhasindhurasphurattvaguttareeyamedure Mano vinodamadbhutam bibhartu bhootabhartari || 4 ||

सहस्रलोचनप्रभृत्यशेषलेखशेखर- प्रसूनधूलिधोरणीविधूसराङ्घ्रिपीठभूः⁠ ⁠। भुजङ्गराजमालया निबद्धजाटजूटकः श्रियै चिराय जायतां चकोरबन्धुशेखरः⁠ ⁠॥⁠ ⁠५⁠ ⁠॥

Sahasralochanaprabhrutyasheshalekhashekhara- Prasoonadhoolidhoraneevidhoosaraanghripeethabhooh | Bhujangaraajamaalayaa nibaddhajaatajootakah Shriyai chiraaya jaayataam chakorabandhushekharah || 5 ||

ललाटचत्वरज्वलद्धनञ्जयस्फुलिङ्गभा- निपीतपञ्चसायकं नमन्निलिम्पनायकम्⁠ ⁠। सुधामयूखलेखया विराजमानशेखरं महाकपालि सम्पदे शिरो जटालमस्तु नः⁠ ⁠॥⁠ ⁠६⁠ ⁠॥

Lalaatachatvarajvaladdhananjayasphulingabhaa- Nipeetapanchasaayakam namannilimpanaayakam | Sudhaamayookhalekhayaa viraajamaanashekharam Mahaakapaali sampade shiro jataalamastu nah || 6 ||

करालभालपट्टिकाधगद्धगद्धगज्ज्वल- द्धनञ्जयाहुतीकृतप्रचण्डपञ्चसायके⁠ ⁠। धराधरेन्द्रनन्दिनीकुचाग्रचित्रपत्रक- प्रकल्पनैकशिल्पिनि त्रिलोचने रतिर्मम⁠ ⁠॥⁠ ⁠७⁠ ⁠॥

Karaalabhaalapattikaadhagaddhagaddhagajjvala- Ddhananjayaahuteekrutaprachandapanchasaayake | Dharaadharendranandineekuchaagrachitrapatraka- Prakalpanaikashilpini trilochane ratirmama || 7 ||

नवीनमेघमण्डलीनिरुद्धदुर्धरस्फुरत्- कुहूनिशीथिनीतमःप्रबन्धबद्धकन्धरः⁠ ⁠। निलिम्पनिर्झरीधरस्तनोतु कृत्तिसिन्धुरः कलानिधानबन्धुरः श्रियं जगद्धुरन्धरः⁠ ⁠॥⁠ ⁠८⁠ ⁠॥

Naveenameghamandaleeniruddhadurdharasphurat- Kuhoonisheethineetamahprabandhabaddhakandharah | Nilimpanirjhareedharastanotu kruttisindhurah Kalaanidhaanabandhurah shriyam jagaddhurandharah || 8 ||

प्रफुल्लनीलपङ्कजप्रपञ्चकालिमप्रभा- ऽवलम्बिकण्ठकन्दलीरुचिप्रबद्धकन्धरम्⁠ ⁠। स्मरच्छिदं पुरच्छिदं भवच्छिदं मखच्छिदं गजच्छिदान्धकच्छिदं तमन्तकच्छिदं भजे⁠ ⁠॥⁠ ⁠९⁠ ⁠॥

Praphullaneelapankajaprapanchakaalimaprabhaa- 'valambikanthakandaleeruchiprabaddhakandharam | Smarachchhidam purachchhidam bhavachchhidam makhachchhidam Gajachchhidaandhakachchhidam tamantakachchhidam bhaje || 9 ||

अखर्वसर्वमङ्गलाकलाकदम्बमञ्जरी- रसप्रवाहमाधुरीविजृम्भणामधुव्रतम्⁠ ⁠। स्मरान्तकं पुरान्तकं भवान्तकं मखान्तकं गजान्तकान्धकान्तकं तमन्तकान्तकं भजे⁠ ⁠॥⁠ ⁠१०⁠ ⁠॥

Akharvasarvamangalaakalaakadambamanjaree- Rasapravaahamaadhureevijrumbhanaamadhuvratam | Smaraantakam puraantakam bhavaantakam makhaantakam Gajaantakaandhakaantakam tamantakaantakam bhaje || 10 ||

जयत्वदभ्रविभ्रमभ्रमद्भुजङ्गमश्वस- द्विनिर्गमत्क्रमस्फुरत्करालभालहव्यवाट्⁠ ⁠। धिमिद्धिमिद्धिमिद्ध्वनन्मृदङ्गतुङ्गमङ्गल- ध्वनिक्रमप्रवर्तितप्रचण्डताण्डवः शिवः⁠ ⁠॥⁠ ⁠११⁠ ⁠॥

Jayatvadabhravibhramabhramadbhujangamashvasa- Dvinirgamatkramasphuratkaraalabhaalahavyavaat | Dhimiddhimiddhimiddhvananmrudangatungamangala- Dhvanikramapravartitaprachandataandavah shivah || 11 ||

दृषद्विचित्रतल्पयोर्भुजङ्गमौक्तिकस्रजोर्- गरिष्ठरत्नलोष्ठयोः सुहृद्विपक्षपक्षयोः⁠ ⁠। तृणारविन्दचक्षुषोः प्रजामहीमहेन्द्रयोः समप्रवृत्तिकः कदा सदाशिवं भजाम्यहम्⁠ ⁠॥⁠ ⁠१२⁠ ⁠॥

Drushadvichitratalpayorbhujangamauktikasrajor- Garishtharatnaloshthayoh suhrudvipakshapakshayoh | Trunaaravindachakshushoh prajaamaheemahendrayoh Samapravruttikah kadaa sadaashivam bhajaamyaham || 12 ||

कदा निलिम्पनिर्झरीनिकुञ्जकोटरे वसन् विमुक्तदुर्मतिः सदा शिरःस्थमञ्जलिं वहन्⁠ ⁠। विलोललोललोचनो ललामभाललग्नकः शिवेति मन्त्रमुच्चरन् कदा सुखी भवाम्यहम्⁠ ⁠॥⁠ ⁠१३⁠ ⁠॥

Kadaa nilimpanirjhareenikunjakotare vasan Vimuktadurmatih sadaa shirahsthamanjalim vahan | Vilolalolalochano lalaamabhaalalagnakah Shiveti mantramuchcharan kadaa sukhee bhavaamyaham || 13 ||

निलिम्पनाथनागरीकदम्बमौलमल्लिका- निगुम्फनिर्भरक्षरन्मधूष्णिकामनोहरः⁠ ⁠। तनोतु नो मनोमुदं विनोदिनीमहर्निशं परश्रियः परं पदं तदङ्गजत्विषां चयः⁠ ⁠॥⁠ ⁠१४⁠ ⁠॥

Nilimpanaathanaagareekadambamaulamallikaa- Nigumphanirbharaksharanmadhooshnikaamanoharah | Tanotu no manomudam vinodineemaharnisham Parashriyah param padam tadangajatvishaam chayah || 14 ||

प्रचण्डवाडवानलप्रभाशुभप्रचारणी महाष्टसिद्धिकामिनीजनाऽवहूतजल्पना⁠ ⁠। विमुक्तवामलोचनाविवाहकालिकध्वनिः शिवेति मन्त्रभूषणा जगज्जयाय जायताम्⁠ ⁠॥⁠ ⁠१५⁠ ⁠॥

Prachandavaadavaanalaprabhaashubhaprachaaranee Mahaashtasiddhikaamineejanaa'vahootajalpanaa | Vimuktavaamalochanaavivaahakaalikadhvanih Shiveti mantrabhooshanaa jagajjayaaya jaayataam || 15 ||

इमं हि नित्यमेवमुक्तमुत्तमोत्तमं स्तवं पठन्स्मरन्ब्रुवन्नरो विशुद्धिमेतिसन्ततम्⁠ ⁠। हरे गुरौ सुभक्तिमाशु याति नाऽन्यथा गतिं विमोहनं हि देहिनां सुशङ्करस्य चिन्तनम्⁠ ⁠॥⁠ ⁠१६⁠ ⁠॥

Imam hi nityamevamuktamuttamottamam stavam Pathansmaranbruvannaro vishuddhimetisantatam | Hare gurau subhaktimaashu yaati naa'nyathaa gatim Vimohanam hi dehinaam sushankarasya chintanam || 16 ||

पूजावसानसमये दशवक्त्रगीतं यः शम्भुपूजनपरं पठति प्रदोषे⁠ ⁠। तस्य स्थिरां रथगजेन्द्रतुरङ्गयुक्तां लक्ष्मीं सदैव सुमुखीं प्रददाति शम्भुः⁠ ⁠॥⁠ ⁠१७⁠ ⁠॥

Poojaavasaanasamaye dashavaktrageetam Yah shambhupoojanaparam pathati pradoshe | Tasya sthiraam rathagajendraturangayuktaam Lakshmeem sadaiva sumukheem pradadaati shambhuh || 17 ||