द्वादशज्योतिर्लिङ्गस्तोत्रम्

सौराष्ट्रदेशे विशदेऽतिरम्ये ज्योतिर्मयं चन्द्रकलावतंसम्⁠ ⁠। भक्तिप्रदानाय कृपावतीर्णं तं सोमनाथं शरणं प्रपद्ये⁠ ⁠॥⁠ ⁠१⁠ ⁠॥

Sauraashtradeshe vishade'tiramye Jyotirmayam chandrakalaavatansam | Bhaktipradaanaaya krupaavateernam Tam somanaatham sharanam prapadye || 1 ||

श्रीशैलशृङ्गे विबुधातिसङ्गे तुलाद्रितुङ्गेऽपि मुदा वसन्तम्⁠ ⁠। तमर्जुनं मल्लिकपूर्वमेकं नमामि संसारसमुद्रसेतुम्⁠ ⁠॥⁠ ⁠२⁠ ⁠॥

Shreeshailashrunge vibudhaatisange Tulaadritunge'pi mudaa vasantam | Tamarjunam mallikapoorvamekam Namaami sansaarasamudrasetum || 2 ||

अवन्तिकायां विहितावतारं मुक्तिप्रदानाय च सज्जनानाम्⁠ ⁠। अकालमृत्योः परिरक्षणार्थं वन्दे महाकालमहासुरेशम्⁠ ⁠॥⁠ ⁠३⁠ ⁠॥

Avantikaayaam vihitaavataaram Muktipradaanaaya cha sajjanaanaam | Akaalamrutyoh parirakshanaartham Vande mahaakaalamahaasuresham || 3 ||

कावेरिकानर्मदयोः पवित्रे समागमे सज्जनतारणाय⁠ ⁠। सदैव मान्धातृपुरे वसन्तं ओङ्कारमीशं शिवमेकमीडे⁠ ⁠॥⁠ ⁠४⁠ ⁠॥

Kaaverikaanarmadayoh pavitre Samaagame sajjanataaranaaya | Sadaiva maandhaatrupure vasantam Onkaarameesham shivamekameede || 4 ||

पूर्वोत्तरे प्रज्वलिकानिधाने सदा वसन्तं गिरिजासमेतम्⁠ ⁠। सुरासुराराधितपादपद्मं श्रीवैद्यनाथं तमहं नमामि⁠ ⁠॥⁠ ⁠५⁠ ⁠॥

Poorvottare prajvalikaanidhaane Sadaa vasantam girijaasametam | Suraasuraaraadhitapaadapadmam Shreevaidyanaatham tamaham namaami || 5 ||

याम्ये सदङ्गे नगरेऽतिरम्ये विभूषिताङ्गं विविधैश्च भोगैः⁠ ⁠। सद्भक्तिमुक्तिप्रदमीशमेकं श्रीनागनाथं शरणं प्रपद्ये⁠ ⁠॥⁠ ⁠६⁠ ⁠॥

Yaamye sadange nagare'tiramye Vibhooshitaangam vividhaishcha bhogaih | Sadbhaktimuktipradameeshamekam Shreenaaganaatham sharanam prapadye || 6 ||

महाद्रिपार्श्वे च तटे रमन्तं सम्पूज्यमानं सततं मुनीन्द्रैः⁠ ⁠। सुरासुरैर्यक्षमहोरगाढ्यैः केदारमीशं शिवमेकमीडे⁠ ⁠॥⁠ ⁠७⁠ ⁠॥

Mahaadripaarshve cha tate ramantam Sampoojyamaanam satatam muneendraih | Suraasurairyakshamahoragaadhyaih Kedaarameesham shivamekameede || 7 ||

सह्याद्रिशीर्षे विमले वसन्तं गोदावरितीरपवित्रदेशे⁠ ⁠। यद्दर्शनात्पातकमाशु नाशं प्रयाति तं त्र्यम्बकमीशमीडे⁠ ⁠॥⁠ ⁠८⁠ ⁠॥

Sahyaadrisheershe vimale vasantam Godaavariteerapavitradeshe | Yaddarshanaatpaatakamaashu naasham Prayaati tam tryambakameeshameede || 8 ||

सुताम्रपर्णीजलराशियोगे निबध्य सेतुं विशिखैरसंख्यैः⁠ ⁠। श्रीरामचन्द्रेण समर्पितं तं रामेश्वराख्यं नियतं नमामि⁠ ⁠॥⁠ ⁠९⁠ ⁠॥

Sutaamraparneejalaraashiyoge Nibadhya setum vishikhairasankhyaih | Shreeraamachandrena samarpitam tam Raameshvaraakhyam niyatam namaami || 9 ||

यं डाकिनिशाकिनिकासमाजे निषेव्यमाणं पिशिताशनैश्च⁠ ⁠। सदैव भीमादिपदप्रसिद्धं तं शङ्करं भक्तहितं नमामि⁠ ⁠॥⁠ ⁠१०⁠ ⁠॥

Yam daakinishaakinikaasamaaje Nishevyamaanam pishitaashanaishcha | Sadaiva bheemaadipadaprasiddham Tam shankaram bhaktahitam namaami || 10 ||

सानन्दमानन्दवने वसन्त- मानन्दकन्दं हतपापबृन्दम्⁠ ⁠। वाराणसीनाथमनाथनाथं श्रीविश्वनाथं शरणं प्रपद्ये⁠ ⁠॥⁠ ⁠११⁠ ⁠॥

Saanandamaanandavane vasanta- Maanandakandam hatapaapabrundam | Vaaraanaseenaathamanaathanaatham Shreevishvanaatham sharanam prapadye || 11 ||

इलापुरे रम्यविशालकेऽस्मिन् समुल्लसन्तं च जगद्वरेण्यम्⁠ ⁠। वन्दे महोदारतरस्वभावं घृष्णेश्वराख्यं शरणं प्रपद्ये⁠ ⁠॥⁠ ⁠१२⁠ ⁠॥

Ilaapure ramyavishaalake'smin Samullasantam cha jagadvarenyam | Vande mahodaaratarasvabhaavam Ghrushneshvaraakhyam sharanam prapadye || 12 ||

ज्योतिर्मयद्वादशलिङ्गकानां शिवात्मनां प्रोक्तमिदं क्रमेण⁠ ⁠। स्तोत्रं पठित्वा मनुजोऽतिभक्त्या फलं तदालोक्यनिशं भजेच्च⁠ ⁠॥⁠ ⁠१३⁠ ⁠॥

Jyotirmayadvaadashalingakaanaam Shivaatmanaam proktamidam kramena | Stotram pathitvaa manujo'tibhaktyaa Phalam tadaalokyanisham bhajechcha || 13 ||