मनोबुद्ध्यहङ्कारचित्तानि नाहं न च श्रोत्रजिह्वे न च घ्राणनेत्रे । न च व्योम भूमिर्न तेजो न वायुः चिदानन्दरूपः शिवोऽहं शिवोऽहम् ॥ १ ॥
Manobuddhyahankaarachittaani naaham Na cha shrotrajihve na cha ghraananetre | Na cha vyoma bhoomirna tejo na vaayuh Chidaanandaroopah shivo'ham shivo'ham || 1 ||
न च प्राणसंज्ञो न वै पञ्चवायुः न वा सप्तधातुर्न वा पञ्चकोशः । न वाक्पाणिपादं न चोपस्थपायू चिदानन्दरूपः शिवोऽहं शिवोऽहम् ॥ २ ॥
Na cha praanasanjno na vai panchavaayuh Na vaa saptadhaaturna vaa panchakoshah | Na vaakpaanipaadam na chopasthapaayoo Chidaanandaroopah shivo'ham shivo'ham || 2 ||
न मे द्वेषरागौ न मे लोभमोहौ मदो नैव मे नैव मात्सर्यभावः । न धर्मो न चार्थो न कामो न मोक्षः चिदानन्दरूपः शिवोऽहं शिवोऽहम् ॥ ३ ॥
Na me dvesharaagau na me lobhamohau Mado naiva me naiva maatsaryabhaavah | Na dharmo na chaartho na kaamo na mokshah Chidaanandaroopah shivo'ham shivo'ham || 3 ||
न पुण्यं न पापं न सौख्यं न दुःखं न मन्त्रो न तीर्थं न वेदा न यज्ञाः । अहं भोजनं नैव भोज्यं न भोक्ता चिदानन्दरूपः शिवोऽहं शिवोऽहम् ॥ ४ ॥
Na punyam na paapam na saukhyam na duhkham Na mantro na teertham na vedaa na yajnaah | Aham bhojanam naiva bhojyam na bhoktaa Chidaanandaroopah shivo'ham shivo'ham || 4 ||
न मृत्युर्न शङ्का न मे जातिभेदः पिता नैव मे नैव माता न जन्म । न बन्धुर्न मित्रं गुरुर्नैव शिष्यः चिदानन्दरूपः शिवोऽहं शिवोऽहम् ॥ ५ ॥
Na mrutyurna shankaa na me jaatibhedah Pitaa naiva me naiva maataa na janma | Na bandhurna mitram gururnaiva shishyah Chidaanandaroopah shivo'ham shivo'ham || 5 ||
अहं निर्विकल्पो निराकाररूपो विभुत्वाच्च सर्वत्र सर्वेन्द्रियाणाम् । न चासङ्गतं नैव मुक्तिर्न मेयः चिदानन्दरूपः शिवोऽहं शिवोऽहम् ॥ ६ ॥
Aham nirvikalpo niraakaararoopo Vibhutvaachcha sarvatra sarvendriyaanaam | Na chaasangatam naiva muktirna meyah Chidaanandaroopah shivo'ham shivo'ham || 6 ||