शिवपञ्चाक्षरस्तोत्रम्

नागेन्द्रहाराय त्रिलोचनाय भस्माङ्गरागाय महेश्वराय⁠ ⁠। नित्याय शुद्धाय दिगम्बराय तस्मै नकाराय नमः शिवाय⁠ ⁠॥⁠ ⁠१⁠ ⁠॥

Naagendrahaaraaya trilochanaaya Bhasmaangaraagaaya maheshvaraaya | Nityaaya shuddhaaya digambaraaya Tasmai nakaaraaya namah shivaaya || 1 ||

मन्दाकिनीसलिलचन्दनचर्चिताय नन्दीश्वरप्रमथनाथमहेश्वराय⁠ ⁠। मन्दारमुख्यबहुपुष्पसुपूजिताय तस्मै मकाराय नमः शिवाय⁠ ⁠॥⁠ ⁠२⁠ ⁠॥

Mandaakineesalilachandanacharchitaaya Nandeeshvarapramathanaathamaheshvaraaya | Mandaaramukhyabahupushpasupoojitaaya Tasmai makaaraaya namah shivaaya || 2 ||

शिवाय गौरीवदनाब्जबृन्द- सूर्याय दक्षाध्वरनाशकाय⁠ ⁠। श्रीनीलकण्ठाय वृषध्वजाय तस्मै शिकाराय नमः शिवाय⁠ ⁠॥⁠ ⁠३⁠ ⁠॥

Shivaaya gaureevadanaabjabrunda- Sooryaaya dakshaadhvaranaashakaaya | Shreeneelakanthaaya vrushadhvajaaya Tasmai shikaaraaya namah shivaaya || 3 ||

वसिष्ठकुम्भोद्भवगौतमार्य- मुनीन्द्रदेवार्चितशेखराय⁠ ⁠। चन्द्रार्कवैश्वानरलोचनाय तस्मै वकाराय नमः शिवाय⁠ ⁠॥⁠ ⁠४⁠ ⁠॥

Vasishthakumbhodbhavagautamaarya- Muneendradevaarchitashekharaaya | Chandraarkavaishvaanaralochanaaya Tasmai vakaaraaya namah shivaaya || 4 ||

यक्षस्वरूपाय जटाधराय पिनाकहस्ताय सनातनाय⁠ ⁠। दिव्याय देवाय दिगम्बराय तस्मै यकाराय नमः शिवाय⁠ ⁠॥⁠ ⁠५⁠ ⁠॥

Yakshasvaroopaaya jataadharaaya Pinaakahastaaya sanaatanaaya | Divyaaya devaaya digambaraaya Tasmai yakaaraaya namah shivaaya || 5 ||

पञ्चाक्षरमिदं पुण्यं यः पठेच्छिवसन्निधौ⁠ ⁠। शिवलोकमवाप्नोति शिवेन सह मोदते⁠ ⁠॥⁠ ⁠६⁠ ⁠॥

Panchaaksharamidam punyam yah pathechchhivasannidhau | Shivalokamavaapnoti shivena saha modate || 6 ||