नमामीशमीशान निर्वाणरूपं विभुं व्यापकं ब्रह्मवेदस्वरूपम् । निजं निर्गुणं निर्विकल्पं निरीहं चिदाकाशमाकाशवासं भजेऽहम् ॥ १ ॥
Namaameeshameeshaana nirvaanaroopam Vibhum vyaapakam brahmavedasvaroopam | Nijam nirgunam nirvikalpam nireeham Chidaakaashamaakaashavaasam bhaje'ham || 1 ||
निराकारमोंकारमूलं तुरीयं गिरा ज्ञान गोतीतमीशं गिरीशम् । करालं महाकाल कालं कृपालं गुणागार संसारपारं नतोऽहम् ॥ २ ॥
Niraakaaramonkaaramoolam tureeyam Giraa jnaana goteetameesham gireesham | Karaalam mahaakaala kaalam krupaalam Gunaagaara sansaarapaaram nato'ham || 2 ||
तुषाराद्रि संकाश गौरं गभीरं मनोभूत कोटिप्रभा श्री शरीरम् । स्फुरन्मौलि कल्लोलिनी चारु गङ्गा लसद्भालबालेन्दु कण्ठे भुजङ्गा ॥ ३ ॥
Tushaaraadri sankaasha gauram gabheeram Manobhoota kotiprabhaa shree shareeram | Sphuranmauli kallolinee chaaru gangaa Lasadbhaalabaalendu kanthe bhujangaa || 3 ||
चलत्कुण्डलं भ्रू सुनेत्रं विशालं प्रसन्नाननं नीलकण्ठं दयालम् । मृगाधीशचर्माम्बरं मुण्डमालं प्रियं शंकरं सर्वनाथं भजामि ॥ ४ ॥
Chalatkundalam bhroo sunetram vishaalam Prasannaananam neelakantham dayaalam | Mrugaadheeshacharmaambaram mundamaalam Priyam shankaram sarvanaatham bhajaami || 4 ||
प्रचण्डं प्रकृष्टं प्रगल्भं परेशं अखण्डं अजं भानुकोटिप्रकाशम् । त्रयः शूल निर्मूलनं शूलपाणिं भजेऽहं भवानीपतिं भावगम्यम् ॥ ५ ॥
Prachandam prakrushtam pragalbham paresham Akhandam ajam bhaanukotiprakaasham | Trayah shoola nirmoolanam shoolapaanim Bhaje'ham bhavaaneepatim bhaavagamyam || 5 ||
कलातीत कल्याण कल्पान्तकारी सदा सज्जनानन्ददाता पुरारी । चिदानन्द संदोह मोहापहारी प्रसीद प्रसीद प्रभो मन्मथारी ॥ ६ ॥
Kalaateeta kalyaana kalpaantakaaree Sadaa sajjanaanandadaataa puraaree | Chidaananda sandoha mohaapahaaree Praseeda praseeda prabho manmathaaree || 6 ||
न यावद् उमानाथ पादारविन्दं भजन्तीह लोके परे वा नराणाम् । न तावत् सुखं शान्ति सन्तापनाशं प्रसीद प्रभो सर्वभूताधिवासम् ॥ ७ ॥
Na yaavad umaanaatha paadaaravindam Bhajanteeha loke pare vaa naraanaam | Na taavat sukham shaanti santaapanaasham Praseeda prabho sarvabhootaadhivaasam || 7 ||
न जानामि योगं जपं नैव पूजां नतोऽहं सदा सर्वदा शम्भु तुभ्यम् । जरा जन्म दुःखौघ तातप्यमानं प्रभो पाहि आपन्नमामीश शम्भो ॥ ८ ॥
Na jaanaami yogam japam naiva poojaam Nato'ham sadaa sarvadaa shambhu tubhyam | Jaraa janma duhkhaugha taatapyamaanam Prabho paahi aapannamaameesha shambho || 8 ||
रुद्राष्टकमिदं प्रोक्तं विप्रेण हरतोषये । ये पठन्ति नरा भक्त्या तेषां शम्भुः प्रसीदति ॥ ९ ॥
Rudraashtakamidam proktam viprena haratoshaye | Ye pathanti naraa bhaktyaa teshaam shambhuh praseedati || 9 ||
॥ इति श्रीगोस्वामितुलसीदासकृतं श्रीरुद्राष्टकं सम्पूर्णम् ॥
|| Iti shreegosvaamitulaseedaasakrutam shreerudraashtakam sampoornam ||