सङ्कटनाशनगणेशस्तोत्रम्

प्रणम्य शिरसा देवं गौरीपुत्रं विनायकम्⁠ ⁠। भक्तावासं स्मरेन्नित्यमायुष्कामार्थसिद्धये⁠ ⁠॥⁠ ⁠१⁠ ⁠॥

Pranamya shirasaa devam gaureeputram vinaayakam | Bhaktaavaasam smarennityamaayushkaamaarthasiddhaye || 1 ||

प्रथमं वक्रतुण्डं च एकदन्तं द्वितीयकम्⁠ ⁠। तृतीयं कृष्णपिङ्गाक्षं गजवक्त्रं चतुर्थकम्⁠ ⁠॥⁠ ⁠२⁠ ⁠॥

Prathamam vakratundam cha ekadantam dviteeyakam | Truteeyam krushnapingaaksham gajavaktram chaturthakam || 2 ||

लम्बोदरं पञ्चमं च षष्ठं विकटमेव च⁠ ⁠। सप्तमं विघ्नराजं च धूम्रवर्णं तथाष्टमम्⁠ ⁠॥⁠ ⁠३⁠ ⁠॥

Lambodaram panchamam cha shashtham vikatameva cha | Saptamam vighnaraajam cha dhoomravarnam tathaashtamam || 3 ||

नवमं भालचन्द्रं च दशमं तु विनायकम्⁠ ⁠। एकादशं गणपतिं द्वादशं तु गजाननम्⁠ ⁠॥⁠ ⁠४⁠ ⁠॥

Navamam bhaalachandram cha dashamam tu vinaayakam | Ekaadasham ganapatim dvaadasham tu gajaananam || 4 ||

द्वादशैतानि नामानि त्रिसन्ध्यं यः पठेन्नरः⁠ ⁠। न च विघ्नभयं तस्य सर्वसिद्धिकरं परम्⁠ ⁠॥⁠ ⁠५⁠ ⁠॥

Dvaadashaitaani naamaani trisandhyam yah pathennarah | Na cha vighnabhayam tasya sarvasiddhikaram param || 5 ||

विद्यार्थी लभते विद्यां धनार्थी लभते धनम्⁠ ⁠। पुत्रार्थी लभते पुत्रान्मोक्षार्थी लभते गतिम्⁠ ⁠॥⁠ ⁠६⁠ ⁠॥

Vidyaarthee labhate vidyaam dhanaarthee labhate dhanam | Putraarthee labhate putraanmokshaarthee labhate gatim || 6 ||

जपेद्गणपतिस्तोत्रं षड्भिर्मासैः फलं लभेत्⁠ ⁠। संवत्सरेण सिद्धिं च लभते नात्र संशयः⁠ ⁠॥⁠ ⁠७⁠ ⁠॥

Japedganapatistotram shadbhirmaasaih phalam labhet | Sanvatsarena siddhim cha labhate naatra sanshayah || 7 ||

अष्टभ्यो ब्राह्मणेभ्यश्च लिखित्वा यः समर्पयेत्⁠ ⁠। तस्य विद्या भवेत्सर्वा गणेशस्य प्रसादतः⁠ ⁠॥⁠ ⁠८⁠ ⁠॥

Ashtabhyo braahmanebhyashcha likhitvaa yah samarpayet | Tasya vidyaa bhavetsarvaa ganeshasya prasaadatah || 8 ||