मुदा करात्तमोदकं सदा विमुक्तिसाधकं कलाधरावतंसकं विलासिलोकरक्षकम् । अनायकैकनायकं विनाशितेभदैत्यकं नताशुभाशुनाशकं नमामि तं विनायकम् ॥ १ ॥
Mudaa karaattamodakam sadaa vimuktisaadhakam Kalaadharaavatansakam vilaasilokarakshakam | Anaayakaikanaayakam vinaashitebhadaityakam Nataashubhaashunaashakam namaami tam vinaayakam || 1 ||
नतेतरातिभीकरं नवोदितार्कभास्वरं नमत्सुरारिनिर्जरं नताधिकापदुद्धरम् । सुरेश्वरं निधीश्वरं गजेश्वरं गणेश्वरं महेश्वरं तमाश्रये परात्परं निरन्तरम् ॥ २ ॥
Natetaraatibheekaram navoditaarkabhaasvaram Namatsuraarinirjaram nataadhikaapaduddharam | Sureshvaram nidheeshvaram gajeshvaram ganeshvaram Maheshvaram tamaashraye paraatparam nirantaram || 2 ||
समस्तलोकशंकरं निरस्तदैत्यकुञ्जरं दरेतरोदरं वरं वरेभवक्त्रमक्षरम् । कृपाकरं क्षमाकरं मुदाकरं यशस्करं मनस्करं नमस्कृतां नमस्करोमि भास्वरम् ॥ ३ ॥
Samastalokashankaram nirastadaityakunjaram Daretarodaram varam varebhavaktramaksharam | Krupaakaram kshamaakaram mudaakaram yashaskaram Manaskaram namaskrutaam namaskaromi bhaasvaram || 3 ||
अकिंचनार्तिमार्जनं चिरन्तनोक्तिभाजनं पुरारिपूर्वनन्दनं सुरारिगर्वचर्वणम् । प्रपञ्चनाशभीषणं धनञ्जयादिभूषणं कपोलदानवारणं भजे पुराणवारणम् ॥ ४ ॥
Akinchanaartimaarjanam chirantanoktibhaajanam Puraaripoorvanandanam suraarigarvacharvanam | Prapanchanaashabheeshanam dhananjayaadibhooshanam Kapoladaanavaaranam bhaje puraanavaaranam || 4 ||
नितान्तकान्तदन्तकान्तिमन्तकान्तकात्मजं अचिन्त्यरूपमन्तहीनमन्तरायकृन्तनम् । हृदन्तरे निरन्तरं वसन्तमेव योगिनां तमेकदन्तमेव तं विचिन्तयामि सन्ततम् ॥ ५ ॥
Nitaantakaantadantakaantimantakaantakaatmajam Achintyaroopamantaheenamantaraayakruntanam | Hrudantare nirantaram vasantameva yoginaam Tamekadantameva tam vichintayaami santatam || 5 ||
महागणेशपञ्चरत्नमादरेण योऽन्वहं प्रजल्पति प्रभातके हृदि स्मरन्गणेश्वरम् । अरोगतामदोषतां सुसाहितीं सुपुत्रतां समाहितायुरष्टभूतिमभ्युपैति सोऽचिरात् ॥ ६ ॥
Mahaaganeshapancharatnamaadarena yo'nvaham Prajalpati prabhaatake hrudi smaranganeshvaram | Arogataamadoshataam susaahiteem suputrataam Samaahitaayurashtabhootimabhyupaiti so'chiraat || 6 ||