इन्द्र उवाच ।
Indra uvaacha |
नमस्तेऽस्तु महामाये श्रीपीठे सुरपूजिते । शङ्खचक्रगदाहस्ते महालक्ष्मि नमोऽस्तुते ॥ १ ॥
Namaste'stu mahaamaaye shreepeethe surapoojite | Shankhachakragadaahaste mahaalakshmi namo'stute || 1 ||
नमस्ते गरुडारूढे कोलासुरभयंकरि । सर्वपापहरे देवि महालक्ष्मि नमोऽस्तुते ॥ २ ॥
Namaste garudaaroodhe kolaasurabhayankari | Sarvapaapahare devi mahaalakshmi namo'stute || 2 ||
सर्वज्ञे सर्ववरदे सर्वदुष्टभयंकरि । सर्वदुःखहरे देवि महालक्ष्मि नमोऽस्तुते ॥ ३ ॥
Sarvajne sarvavarade sarvadushtabhayankari | Sarvaduhkhahare devi mahaalakshmi namo'stute || 3 ||
सिद्धिबुद्धिप्रदे देवि भुक्तिमुक्तिप्रदायिनि । मन्त्रमूर्ते सदा देवि महालक्ष्मि नमोऽस्तुते ॥ ४ ॥
Siddhibuddhiprade devi bhuktimuktipradaayini | Mantramoorte sadaa devi mahaalakshmi namo'stute || 4 ||
आद्यन्तरहिते देवि आद्यशक्तिमहेश्वरि । योगजे योगसम्भूते महालक्ष्मि नमोऽस्तुते ॥ ५ ॥
Aadyantarahite devi aadyashaktimaheshvari | Yogaje yogasambhoote mahaalakshmi namo'stute || 5 ||
स्थूलसूक्ष्ममहारौद्रे महाशक्तिमहोदरे । महापापहरे देवि महालक्ष्मि नमोऽस्तुते ॥ ६ ॥
Sthoolasookshmamahaaraudre mahaashaktimahodare | Mahaapaapahare devi mahaalakshmi namo'stute || 6 ||
पद्मासनस्थिते देवि परब्रह्मस्वरूपिणि । परमेशि जगन्मातर्महालक्ष्मि नमोऽस्तुते ॥ ७ ॥
Padmaasanasthite devi parabrahmasvaroopini | Parameshi jaganmaatarmahaalakshmi namo'stute || 7 ||
श्वेताम्बरधरे देवि नानालङ्कारभूषिते । जगत्स्थिते जगन्मातर्महालक्ष्मि नमोऽस्तुते ॥ ८ ॥
Shvetaambaradhare devi naanaalankaarabhooshite | Jagatsthite jaganmaatarmahaalakshmi namo'stute || 8 ||
महालक्ष्म्यष्टकं स्तोत्रं यः पठेद्भक्तिमान्नरः । सर्वसिद्धिमवाप्नोति राज्यं प्राप्नोति सर्वदा ॥ ९ ॥
Mahaalakshmyashtakam stotram yah pathedbhaktimaannarah | Sarvasiddhimavaapnoti raajyam praapnoti sarvadaa || 9 ||
एककाले पठेन्नित्यं महापापविनाशनम् । द्विकालं यः पठेन्नित्यं धनधान्यसमन्वितः ॥ १० ॥
Ekakaale pathennityam mahaapaapavinaashanam | Dvikaalam yah pathennityam dhanadhaanyasamanvitah || 10 ||
त्रिकालं यः पठेन्नित्यं महाशत्रुविनाशनम् । महालक्ष्मीर्भवेन्नित्यं प्रसन्ना वरदा शुभा ॥ ११ ॥
Trikaalam yah pathennityam mahaashatruvinaashanam | Mahaalakshmeerbhavennityam prasannaa varadaa shubhaa || 11 ||
इति श्री महालक्ष्म्यष्टकम् ॥
Iti shree mahaalakshmyashtakam ||