कनकधारास्तोत्रम्

अङ्गं हरेः पुलकभूषणमाश्रयन्ती भृङ्गाङ्गनेव मुकुलाभरणं तमालम्⁠ ⁠। अङ्गीकृताखिलविभूतिरपाङ्गलीला माङ्गल्यदास्तु मम मङ्गलदेवतायाः⁠ ⁠॥⁠ ⁠१⁠ ⁠॥

Angam hareh pulakabhooshanamaashrayantee Bhrungaanganeva mukulaabharanam tamaalam | Angeekrutaakhilavibhootirapaangaleelaa Maangalyadaastu mama mangaladevataayaah || 1 ||

मुग्धा मुहुर्विदधती वदने मुरारेः प्रेमत्रपाप्रणिहितानि गतागतानि⁠ ⁠। माला दृशोर्मधुकरीव महोत्पले या सा मे श्रियं दिशतु सागरसम्भवायाः⁠ ⁠॥⁠ ⁠२⁠ ⁠॥

Mugdhaa muhurvidadhatee vadane muraareh Prematrapaapranihitaani gataagataani | Maalaa drushormadhukareeva mahotpale yaa Saa me shriyam dishatu saagarasambhavaayaah || 2 ||

आमीलिताक्षमधिगम्य मुदा मुकुन्दम्- आनन्दकन्दमनिमेषमनङ्गतन्त्रम्⁠ ⁠। आकेकरस्थितकनीनिकपक्ष्मनेत्रं भूत्यै भवेन्मम भुजङ्गशयाङ्गनायाः⁠ ⁠॥⁠ ⁠३⁠ ⁠॥

Aameelitaakshamadhigamya mudaa mukundam- Aanandakandamanimeshamanangatantram | Aakekarasthitakaneenikapakshmanetram Bhootyai bhavenmama bhujangashayaanganaayaah || 3 ||

बाह्वन्तरे मधुजितः श्रितकौस्तुभे या हारावलीव हरिनीलमयी विभाति⁠ ⁠। कामप्रदा भगवतोऽपि कटाक्षमाला कल्याणमावहतु मे कमलालयायाः⁠ ⁠॥⁠ ⁠४⁠ ⁠॥

Baahvantare madhujitah shritakaustubhe yaa Haaraavaleeva harineelamayee vibhaati | Kaamapradaa bhagavato'pi kataakshamaalaa Kalyaanamaavahatu me kamalaalayaayaah || 4 ||

कालाम्बुदालिललितोरसि कैटभारेः धाराधरे स्फुरति या तटिदङ्गनेव⁠ ⁠। मातुस्समस्तजगतां महनीयमूर्तिः भद्राणि मे दिशतु भार्गवनन्दनायाः⁠ ⁠॥⁠ ⁠५⁠ ⁠॥

Kaalaambudaalilalitorasi kaitabhaareh Dhaaraadhare sphurati yaa tatidanganeva | Maatussamastajagataam mahaneeyamoortih Bhadraani me dishatu bhaargavanandanaayaah || 5 ||

प्राप्तं पदं प्रथमतः खलु यत्प्रभावात् माङ्गल्यभाजि मधुमाथिनि मन्मथेन⁠ ⁠। मय्यापतेत्तदिह मन्थरमीक्षणार्धं मन्दालसं च मकरालयकन्यकायाः⁠ ⁠॥⁠ ⁠६⁠ ⁠॥

Praaptam padam prathamatah khalu yatprabhaavaat Maangalyabhaaji madhumaathini manmathena | Mayyaapatettadiha mantharameekshanaardham Mandaalasam cha makaraalayakanyakaayaah || 6 ||

विश्वामरेन्द्रपदविभ्रमदानदक्षं आनन्दहेतुरधिकं मुरविद्विषोऽपि⁠ ⁠। ईषन्निषीदतु मयि क्षणमीक्षणार्थं इन्दीवरोदरसहोदरमिन्दिरायाः⁠ ⁠॥⁠ ⁠७⁠ ⁠॥

Vishvaamarendrapadavibhramadaanadaksham Aanandaheturadhikam muravidvisho'pi | Eeshannisheedatu mayi kshanameekshanaartham Indeevarodarasahodaramindiraayaah || 7 ||

इष्टा विशिष्टमतयोऽपि यया दयार्द्र दृष्ट्या त्रिविष्टपपदं सुलभं लभन्ते⁠ ⁠। दृष्टिः प्रहृष्ट कमलोदरदीप्तिरिष्टां पुष्टिं कृषीष्ट मम पुष्करविष्टरायाः⁠ ⁠॥⁠ ⁠८⁠ ⁠॥

Ishtaa vishishtamatayo'pi yayaa dayaardra Drushtyaa trivishtapapadam sulabham labhante | Drushtih prahrushta kamalodaradeeptirishtaam Pushtim krusheeshta mama pushkaravishtaraayaah || 8 ||

दद्याद्दयानुपवनो द्रविणाम्बुधारा- मस्मिन्नकिञ्चनविहङ्गशिशौ विषण्णे⁠ ⁠। दुष्कर्मघर्ममपनीय चिराय दूरं नारायणप्रणयिनीनयनाम्बुवाहः⁠ ⁠॥⁠ ⁠९⁠ ⁠॥

Dadyaaddayaanupavano dravinaambudhaaraa- Masminnakinchanavihangashishau vishanne | Dushkarmagharmamapaneeya chiraaya dooram Naaraayanapranayineenayanaambuvaahah || 9 ||

गीर्देवतेति गरुडध्वजसुन्दरीति शाकम्भरीति शशिशेखरवल्लभेति⁠ ⁠। सृष्टिस्थितिप्रलयकेलिषु संस्थितायै तस्यै नमस्त्रिभुवनैकगुरोस्तरुण्यै⁠ ⁠॥⁠ ⁠१०⁠ ⁠॥

Geerdevateti garudadhvajasundareeti Shaakambhareeti shashishekharavallabheti | Srushtisthitipralayakelishu sansthitaayai Tasyai namastribhuvanaikagurostarunyai || 10 ||

श्रुत्यै नमोऽस्तु शुभकर्मफलप्रसूत्यै रत्यै नमोऽस्तु रमणीयगुणार्णवायै⁠ ⁠। शक्त्यै नमोऽस्तु शतपत्रनिकेतनायै पुष्ट्यै नमोऽस्तु पुरुषोत्तमवल्लभायै⁠ ⁠॥⁠ ⁠११⁠ ⁠॥

Shrutyai namo'stu shubhakarmaphalaprasootyai Ratyai namo'stu ramaneeyagunaarnavaayai | Shaktyai namo'stu shatapatraniketanaayai Pushtyai namo'stu purushottamavallabhaayai || 11 ||

नमोऽस्तु नालीकनिभाननायै नमोऽस्तु दुग्धोदधिजन्मभूम्यै⁠ ⁠। नमोऽस्तु सोमामृतसोदरायै नमोऽस्तु नारायणवल्लभायै⁠ ⁠॥⁠ ⁠१२⁠ ⁠॥

Namo'stu naaleekanibhaananaayai Namo'stu dugdhodadhijanmabhoomyai | Namo'stu somaamrutasodaraayai Namo'stu naaraayanavallabhaayai || 12 ||

नमोऽस्तु हेमाम्बुजपीठिकायै नमोऽस्तु भूमण्डलनायिकायै⁠ ⁠। नमोऽस्तु देवादिदयापरायै नमोऽस्तु शार्ङ्गायुधवल्लभायै⁠ ⁠॥⁠ ⁠१३⁠ ⁠॥

Namo'stu hemaambujapeethikaayai Namo'stu bhoomandalanaayikaayai | Namo'stu devaadidayaaparaayai Namo'stu shaarngaayudhavallabhaayai || 13 ||

नमोऽस्तु देव्यै भृगुनन्दनायै नमोऽस्तु विष्णोरुरसिस्थितायै⁠ ⁠। नमोऽस्तु लक्ष्म्यै कमलालयायै नमोऽस्तु दामोदरवल्लभायै⁠ ⁠॥⁠ ⁠१४⁠ ⁠॥

Namo'stu devyai bhrugunandanaayai Namo'stu vishnorurasisthitaayai | Namo'stu lakshmyai kamalaalayaayai Namo'stu daamodaravallabhaayai || 14 ||

नमोऽस्तु कान्त्यै कमलेक्षणायै नमोऽस्तु भूत्यै भुवनप्रसूत्यै⁠ ⁠। नमोऽस्तु देवादिभिरर्चितायै नमोऽस्तु नन्दात्मजवल्लभायै⁠ ⁠॥⁠ ⁠१५⁠ ⁠॥

Namo'stu kaantyai kamalekshanaayai Namo'stu bhootyai bhuvanaprasootyai | Namo'stu devaadibhirarchitaayai Namo'stu nandaatmajavallabhaayai || 15 ||

सम्पत्कराणि सकलेन्द्रियनन्दनानि साम्राज्यदानविभवानि सरोरुहाक्षि⁠ ⁠। त्वद्वन्दनानि दुरितोद्धरणोद्यतानि मामेव मातरनिशं कलयन्तु मान्ये⁠ ⁠॥⁠ ⁠१६⁠ ⁠॥

Sampatkaraani sakalendriyanandanaani Saamraajyadaanavibhavaani saroruhaakshi | Tvadvandanaani duritoddharanodyataani Maameva maataranisham kalayantu maanye || 16 ||

यत्कटाक्षसमुपासनाविधिः सेवकस्य सकलार्थसम्पदः⁠ ⁠। सन्तनोति वचनाङ्गमानसैः त्वां मुरारिहृदयेश्वरीं भजे⁠ ⁠॥⁠ ⁠१७⁠ ⁠॥

Yatkataakshasamupaasanaavidhih Sevakasya sakalaarthasampadah | Santanoti vachanaangamaanasaih Tvaam muraarihrudayeshvareem bhaje || 17 ||

सरसिजनिलये सरोजहस्ते धवलतमांशुकगन्धमाल्यशोभे⁠ ⁠। भगवति हरिवल्लभे मनोज्ञे त्रिभुवनभूतिकरि प्रसीद मह्यम्⁠ ⁠॥⁠ ⁠१८⁠ ⁠॥

Sarasijanilaye sarojahaste Dhavalatamaanshukagandhamaalyashobhe | Bhagavati harivallabhe manojne Tribhuvanabhootikari praseeda mahyam || 18 ||

दिग्घस्तिभिः कनककुम्भमुखावसृष्ट स्वर्वाहिनी विमलचारुजलप्लुताङ्गीम्⁠ ⁠। प्रातर्नमामि जगतां जननीमशेष लोकाधिनाथगृहिणीममृताब्धिपुत्रीम्⁠ ⁠॥⁠ ⁠१९⁠ ⁠॥

Digghastibhih kanakakumbhamukhaavasrushta Svarvaahinee vimalachaarujalaplutaangeem | Praatarnamaami jagataam jananeemashesha Lokaadhinaathagruhineemamrutaabdhiputreem || 19 ||

कमले कमलाक्षवल्लभे त्वं करुणापूरतरङ्गितैरपाङ्गैः⁠ ⁠। अवलोकय मामकिञ्चनानां प्रथमं पात्रमकृत्रिमं दयायाः⁠ ⁠॥⁠ ⁠२०⁠ ⁠॥

Kamale kamalaakshavallabhe tvam Karunaapooratarangitairapaangaih | Avalokaya maamakinchanaanaam Prathamam paatramakrutrimam dayaayaah || 20 ||

देवि प्रसीद जगदीश्वरि लोकमातः कल्याणगात्रि कमलेक्षणजीवनाथे⁠ ⁠। दारिद्र्यभीतिहृदयं शरणागतं माम् आलोकय प्रतिदिनं सदयैरपाङ्गैः⁠ ⁠॥⁠ ⁠२१⁠ ⁠॥

Devi praseeda jagadeeshvari lokamaatah Kalyaanagaatri kamalekshanajeevanaathe | Daaridryabheetihrudayam sharanaagatam maam Aalokaya pratidinam sadayairapaangaih || 21 ||

स्तुवन्ति ये स्तुतिभिरमूभिरन्वहं त्रयीमयीं त्रिभुवनमातरं रमाम्⁠ ⁠। गुणाधिका गुरुतरभाग्यभागिनो भवन्ति ते भुवि बुधभाविताशयाः⁠ ⁠॥⁠ ⁠२२⁠ ⁠॥

Stuvanti ye stutibhiramoobhiranvaham Trayeemayeem tribhuvanamaataram ramaam | Gunaadhikaa gurutarabhaagyabhaagino Bhavanti te bhuvi budhabhaavitaashayaah || 22 ||