॥ श्री गणेशाय नमः ॥
|| Shree ganeshaaya namah ||
अस्य श्रीरामरक्षास्तोत्रमन्त्रस्य । बुधकौशिकऋषिः । श्रीसीतारामचन्द्रो देवता । अनुष्टुप् छन्दः । सीता शक्तिः । श्रीमद् हनुमान् कीलकम् । श्रीरामचन्द्रप्रीत्यर्थे जपे विनियोगः ।
Asya shreeraamarakshaastotramantrasya | Budhakaushikarushih | Shreeseetaaraamachandro devataa | Anushtup chhandah | seetaa shaktih | Shreemad hanumaan keelakam | Shreeraamachandrapreetyarthe jape viniyogah |
अथ ध्यानम् । ध्यायेदाजानुबाहुं धृतशरधनुषं बद्धपद्मासनस्थम् । पीतं वासो वसानं नवकमलदलस्पर्धिनेत्रं प्रसन्नम् । वामाङ्कारूढसीतामुखकमलमिलल्लोचनं नीरदाभम् । नानालङ्कारदीप्तं दधतमुरुजटामण्डलं रामचन्द्रम् ॥ इति ध्यानम् ।
Atha dhyaanam | Dhyaayedaajaanubaahum dhrutasharadhanusham baddhapadmaasanastham | Peetam vaaso vasaanam navakamaladalaspardhinetram prasannam | Vaamaankaaroodhaseetaamukhakamalamilallochanam neeradaabham | Naanaalankaaradeeptam dadhatamurujataamandalam raamachandram || Iti dhyaanam |
चरितं रघुनाथस्य शतकोटिप्रविस्तरम् । एकैकमक्षरं पुंसां महापातकनाशनम् ॥ १ ॥
Charitam raghunaathasya shatakotipravistaram | Ekaikamaksharam punsaam mahaapaatakanaashanam || 1 ||
ध्यात्वा नीलोत्पलश्यामं रामं राजीवलोचनम् । जानकीलक्ष्मणोपेतं जटामुकुटमण्डितम् ॥ २ ॥
Dhyaatvaa neelotpalashyaamam raamam raajeevalochanam | Jaanakeelakshmanopetam jataamukutamanditam || 2 ||
सासितूणधनुर्बाणपाणिं नक्तंचरान्तकम् । स्वलीलया जगत्त्रातुमाविर्भूतमजं विभुम् ॥ ३ ॥
Saasitoonadhanurbaanapaanim naktancharaantakam | Svaleelayaa jagattraatumaavirbhootamajam vibhum || 3||
रामरक्षां पठेत् प्राज्ञः पापघ्नीं सर्वकामदाम् । शिरो मे राघवः पातु भालं दशरथात्मजः ॥ ४ ॥
Raamarakshaam pathet praajnah paapaghneem sarvakaamadaam | Shiro me raaghavah paatu bhaalam dasharathaatmajah || 4 ||
कौसल्येयो दृशौ पातु विश्वामित्रप्रियः श्रुती । घ्राणं पातु मखत्राता मुखं सौमित्रिवत्सलः ॥ ५ ॥
Kausalyeyo drushau paatu vishvaamitrapriyah shrutee | Ghraanam paatu makhatraataa mukham saumitrivatsalah || 5 ||
जिह्वां विद्यानिधिः पातु कण्ठं भरतवन्दितः । स्कन्धौ दिव्यायुधः पातु भुजौ भग्नेशकार्मुकः ॥ ६ ॥
Jihvaam vidyaanidhih paatu kantham bharatavanditah | Skandhau divyaayudhah paatu bhujau bhagneshakaarmukah || 6 ||
करौ सीतापतिः पातु हृदयं जामदग्न्यजित् । मध्यं पातु खरध्वंसी नाभिं जाम्बवदाश्रयः ॥ ७ ॥
Karau seetaapatih paatu hrudayam jaamadagnyajit | Madhyam paatu kharadhvansee naabhim jaambavadaashrayah || 7 ||
सुग्रीवेशः कटी पातु सक्थिनी हनुमत्प्रभुः । ऊरू रघूत्तमः पातु रक्षःकुलविनाशकृत् ॥ ८ ॥
Sugreeveshah katee paatu sakthinee hanumatprabhuh | Ooroo raghoottamah paatu rakshahkulavinaashakrut || 8 ||
जानुनी सेतुकृत् पातु जङ्घे दशमुखान्तकः । पादौ विभीषणश्रीदः पातु रामोऽखिलं वपुः ॥ ९ ॥
Jaanunee setukrut paatu janghe dashamukhaantakah | Paadau vibheeshanashreedah paatu raamo'khilam vapuh || 9 ||
एतां रामबलोपेतां रक्षां यः सुकृती पठेत् । स चिरायुः सुखी पुत्री विजयी विनयी भवेत् ॥ १० ॥
Etaam raamabalopetaam rakshaam yah sukrutee pathet | Sa chiraayuh sukhee putree vijayee vinayee bhavet || 10 ||
पातालभूतलव्योम चारिणश्छद्मचारिणः । न द्रष्टुमपि शक्तास्ते रक्षितं रामनामभिः ॥ ११ ॥
Paataalabhootalavyoma chaarinashchhadmachaarinah | Na drashtumapi shaktaaste rakshitam raamanaamabhih || 11 ||
रामेति रामभद्रेति रामचन्द्रेति वा स्मरन् । नरो न लिप्यते पापैर्भुक्तिं मुक्तिं च विन्दति ॥ १२ ॥
Raameti raamabhadreti raamachandreti vaa smaran | Naro na lipyate paapairbhuktim muktim cha vindati || 12 ||
जगज्जैत्रैकमन्त्रेण रामनाम्नाभिरक्षितम् । यः कण्ठे धारयेत्तस्य करस्थाः सर्वसिद्धयः ॥ १३ ॥
Jagajjaitraikamantrena raamanaamnaabhirakshitam | Yah kanthe dhaarayettasya karasthaah sarvasiddhayah || 13 ||
वज्रपञ्जरनामेदं यो रामकवचं स्मरेत् । अव्याहताज्ञः सर्वत्र लभते जयमङ्गलम् ॥ १४ ॥
Vajrapanjaranaamedam yo raamakavacham smaret | Avyaahataajnah sarvatra labhate jayamangalam || 14 ||
आदिष्टवान् यथा स्वप्ने रामरक्षामिमां हरः । तथा लिखितवान् प्रातः प्रबुद्धो बुधकौशिकः ॥ १५ ॥
Aadishtavaan yathaa svapne raamarakshaamimaam harah | Tathaa likhitavaan praatah prabuddho budhakaushikah || 15 ||
आरामः कल्पवृक्षाणां विरामः सकलापदाम् । अभिरामस्त्रिलोकानां रामः श्रीमान् स नः प्रभुः ॥ १६ ॥
Aaraamah kalpavrukshaanaam viraamah sakalaapadaam | Abhiraamastrilokaanaam raamah shreemaan sa nah prabhuh || 16 ||
तरुणौ रूपसंपन्नौ सुकुमारौ महाबलौ । पुण्डरीक विशालाक्षौ चीरकृष्णाजिनाम्बरौ ॥ १७ ॥
Tarunau roopasampannau sukumaarau mahaabalau | Pundareeka vishaalaakshau cheerakrushnaajinaambarau || 17 ||
फलमूलाशिनौ दान्तौ तापसौ ब्रह्मचारिणौ । पुत्रौ दशरथस्यैतौ भ्रातरौ रामलक्ष्मणौ ॥ १८ ॥
Phalamoolaashinau daantau taapasau brahmachaarinau | Putrau dasharathasyaitau bhraatarau raamalakshmanau || 18 ||
शरण्यौ सर्वसत्वानां श्रेष्ठौ सर्वधनुष्मताम् । रक्षः कुलनिहन्तारौ त्रायेतां नो रघूत्तमौ ॥ १९ ॥
Sharanyau sarvasatvaanaam shreshthau sarvadhanushmataam | Rakshah kulanihantaarau traayetaam no raghoottamau || 19 ||
आत्तसज्जधनुषाविषुस्पृशावक्षयाशुगनिषङ्गसङ्गिनौ । रक्षणाय मम रामलक्ष्मणावग्रतः पथि सदैव गच्छताम् ॥ २० ॥
Aattasajjadhanushaavishusprushaavakshayaashuganishangasanginau | Rakshanaaya mama raamalakshmanaavagratah pathi sadaiva gachchhataam || 20 ||
संनद्धः कवची खड्गी चापबाणधरो युवा । गच्छन् मनोरथोऽस्माकं रामः पातु सलक्ष्मणः ॥ २१ ॥
Sannaddhah kavachee khadgee chaapabaanadharo yuvaa | Gachchhan manoratho'smaakam raamah paatu salakshmanah || 21 ||
रामो दाशरथिः शूरो लक्ष्मणानुचरो बली । काकुत्स्थः पुरुषः पूर्णः कौसल्येयो रघूत्तमः ॥ २२ ॥
Raamo daasharathih shooro lakshmanaanucharo balee | Kaakutsthah purushah poornah kausalyeyo raghoottamah || 22 ||
वेदान्तवेद्यो यज्ञेशः पुराणपुरुषोत्तमः । जानकीवल्लभः श्रीमानप्रमेयपराक्रमः ॥ २३ ॥
Vedaantavedyo yajneshah puraanapurushottamah | Jaanakeevallabhah shreemaanaprameyaparaakramah || 23 ||
इत्येतानि जपेन्नित्यं मद्भक्तः श्रद्धयान्वितः । अश्वमेधाधिकं पुण्यं सम्प्राप्नोति न संशयः ॥ २४ ॥
Ityetaani japennityam madbhaktah shraddhayaanvitah | Ashvamedhaadhikam punyam sampraapnoti na sanshayah || 24 ||
रामं दूर्वादलश्यामं पद्माक्षं पीतवाससम् । स्तुवन्ति नामभिर्दिव्यैर्न ते संसारिणो नरः ॥ २५ ॥
Raamam doorvaadalashyaamam padmaaksham peetavaasasam | Stuvanti naamabhirdivyairna te sansaarino narah || 25 ||
रामं लक्ष्मणपूर्वजम् रघुवरं सीतापतिं सुन्दरम् । काकुत्स्थं करुणार्णवं गुणनिधिं विप्रप्रियं धार्मिकम् ॥ राजेन्द्रं सत्यसन्धं दशरथतनयं श्यामलं शान्तमूर्तिम् । वन्दे लोकाभिरामं रघुकुलतिलकम् राघवं रावणारिम् ॥ २६ ॥
Raamam lakshmanapoorvajam raghuvaram seetaapatim sundaram | Kaakutstham karunaarnavam gunanidhim viprapriyam dhaarmikam || Raajendram satyasandham dasharathatanayam shyaamalam shaantamoortim | Vande lokaabhiraamam raghukulatilakam raaghavam raavanaarim || 26 ||
रामाय रामभद्राय रामचन्द्राय वेधसे । रघुनाथाय नाथाय सीतायाः पतये नमः ॥ २७ ॥
Raamaaya raamabhadraaya raamachandraaya vedhase | Raghunaathaaya naathaaya seetaayaah pataye namah || 27 ||
श्रीराम राम रघुनन्दन राम राम । श्रीराम राम भरताग्रज राम राम ॥ श्रीराम राम रणकर्कश राम राम । श्रीराम राम शरणं भव राम राम ॥ २८ ॥
Shreeraama raama raghunandana raama raama | Shreeraama raama bharataagraja raama raama || Shreeraama raama ranakarkasha raama raama | Shreeraama raama sharanam bhava raama raama || 28 ||
श्रीरामचन्द्रचरणौ मनसा स्मरामि । श्रीरामचन्द्रचरणौ वचसा गृणामि ॥ श्रीरामचन्द्रचरणौ शिरसा नमामि । श्रीरामचन्द्रचरणौ शरणं प्रपद्ये ॥ २९ ॥
Shreeraamachandracharanau manasaa smaraami | Shreeraamachandracharanau vachasaa grunaami || Shreeraamachandracharanau shirasaa namaami | Shreeraamachandracharanau sharanam prapadye || 29 ||
माता रामो मत्पिता रामचन्द्रः । स्वामी रामो मत्सखा रामचन्द्रः ॥ सर्वस्वं मे रामचन्द्रो दयालुः । नान्यं जाने नैव जाने न जाने ॥ ३० ॥
Maataa raamo matpitaa raamachandrah | Svaamee raamo matsakhaa raamachandrah || Sarvasvam me raamachandro dayaaluh | Naanyam jaane naiva jaane na jaane || 30 ||
दक्षिणे लक्ष्मणो यस्य वामे तु जनकात्मजा । पुरतो मारुतिर्यस्य तं वन्दे रघुनन्दनम् ॥ ३१ ॥
Dakshine lakshmano yasya vaame tu janakaatmajaa | Purato maarutiryasya tam vande raghunandanam || 31 ||
लोकाभिरामं रणरङ्गधीरं राजीवनेत्रं रघुवंशनाथम् । कारुण्यरूपं करुणाकरं तं श्रीरामचन्द्रं शरणं प्रपद्ये ॥ ३२ ॥
Lokaabhiraamam ranarangadheeram raajeevanetram raghuvanshanaatham | Kaarunyaroopam karunaakaram tam shreeraamachandram sharanam prapadye || 32 ||
मनोजवं मारुततुल्यवेगं जितेन्द्रियं बुद्धिमतां वरिष्ठम् । वातात्मजं वानरयूथमुख्यं श्रीरामदूतं शरणं प्रपद्ये ॥ ३३ ॥
Manojavam maarutatulyavegam jitendriyam buddhimataam varishtham | Vaataatmajam vaanarayoothamukhyam shreeraamadootam sharanam prapadye || 33 ||
कूजन्तं रामरामेति मधुरं मधुराक्षरम् । आरुह्य कविताशाखां वन्दे वाल्मीकिकोकिलम् ॥ ३४ ॥
Koojantam raamaraameti madhuram madhuraaksharam | Aaruhya kavitaashaakhaam vande vaalmeekikokilam || 34 ||
आपदामपहर्तारं दातारं सर्वसंपदाम् । लोकाभिरामं श्रीरामं भूयो भूयो नमाम्यहम् ॥ ३५ ॥
Aapadaamapahartaaram daataaram sarvasampadaam | Lokaabhiraamam shreeraamam bhooyo bhooyo namaamyaham || 35 ||
भर्जनं भवबीजानामर्जनं सुखसंपदाम् । तर्जनं यमदूतानां रामरामेति गर्जनम् ॥ ३६ ॥
Bharjanam bhavabeejaanaamarjanam sukhasampadaam | Tarjanam yamadootaanaam raamaraameti garjanam || 36 ||
रामो राजमणिः सदा विजयते रामं रमेशं भजे । रामेणाभिहता निशाचरचमू रामाय तस्मै नमः ॥ रामान्नास्ति परायणं परतरं रामस्य दासोऽस्म्यहम् । रामे चित्तलयः सदा भवतु मे भो राम मामुद्धर ॥ ३७ ॥
Raamo raajamanih sadaa vijayate raamam ramesham bhaje | Raamenaabhihataa nishaacharachamoo raamaaya tasmai namah || Raamaannaasti paraayanam parataram raamasya daaso'smyaham | Raame chittalayah sadaa bhavatu me bho raama maamuddhara || 37 ||
रामरामेति रामेति रमे रामे मनोरमे । सहस्रनामतत्तुल्यं रामनाम वरानने ॥ ३८ ॥
Raamaraameti raameti rame raame manorame | Sahasranaamatattulyam raamanaama varaanane || 38 ||
इति श्रीबुधकौशिकविरचितं श्रीरामरक्षास्तोत्रं सम्पूर्णम् ।
Iti shreebudhakaushikavirachitam shreeraamarakshaastotram sampoornam |
॥ श्रीसीतारामचन्द्रार्पणमस्तु ॥
|| Shreeseetaaraamachandraarpanamastu ||
॥ शुभं भवतु ॥
|| Shubham bhavatu ||