अच्युताष्टकम्

अच्युतं केशवं रामनारायणं कृष्णदामोदरं वासुदेवं हरिम्⁠ ⁠। श्रीधरं माधवं गोपिकावल्लभं जानकीनायकं रामचन्द्रं भजे⁠ ⁠॥⁠ ⁠१⁠ ⁠॥

Achyutam keshavam raamanaaraayanam krushnadaamodaram vaasudevam harim | Shreedharam maadhavam gopikaavallabham jaanakeenaayakam raamachandram bhaje || 1 ||

अच्युतं केशवं सत्यभामाधवं माधवं श्रीधरं राधिकाराधितम्⁠ ⁠। इन्दिरामन्दिरं चेतसा सुन्दरं देवकीनन्दनं नन्दनं सन्दधे⁠ ⁠॥⁠ ⁠२⁠ ⁠॥

Achyutam keshavam satyabhaamaadhavam maadhavam shreedharam raadhikaaraadhitam | Indiraamandiram chetasaa sundaram devakeenandanam nandanam sandadhe || 2 ||

विष्णवे जिष्णवे शङ्खिने चक्रिणे रुक्मिणीरागिणे जानकीजानये⁠ ⁠। वल्लवीवल्लभायाऽर्चितायात्मने कंसविध्वंसिने वंशिने ते नमः⁠ ⁠॥⁠ ⁠३⁠ ⁠॥

Vishnave jishnave shankhine chakrine rukmineeraagine jaanakeejaanaye | Vallaveevallabhaayaa'rchitaayaatmane kansavidhvansine vanshine te namah || 3 ||

कृष्ण गोविन्द हे राम नारायण श्रीपते वासुदेवाजित श्रीनिधे⁠ ⁠। अच्युतानन्त हे माधवाधोक्षज द्वारकानायक द्रौपदीरक्षक⁠ ⁠॥⁠ ⁠४⁠ ⁠॥

Krushna govinda he raama naaraayana shreepate vaasudevaajita shreenidhe | Achyutaananta he maadhavaadhokshaja dvaarakaanaayaka draupadeerakshaka || 4 ||

राक्षसक्षोभितः सीतया शोभितो दण्डकारण्यभूपुण्यताकारणः⁠ ⁠। लक्ष्मणेनान्वितो वानरैः सेवितोऽगस्त्यसम्पूजितो राघवः पातु माम्⁠ ⁠॥⁠ ⁠५⁠ ⁠॥

Raakshasakshobhitah seetayaa shobhito dandakaaranyabhoopunyataakaaranah | Lakshmanenaanvito vaanaraih sevito'gastyasampoojito raaghavah paatu maam || 5 ||

धेनुकारिष्टकोऽनिष्टकृद्द्वेषिणां केशिहा कंसहृद्वंशिकावादकः⁠ ⁠। पूतनाकोपकः सूरजाखेलनो बालगोपालकः पातु माम् सर्वदा⁠ ⁠॥⁠ ⁠६⁠ ⁠॥

Dhenukaarishtako'nishtakruddveshinaam keshihaa kansahrudvanshikaavaadakah | Pootanaakopakah soorajaakhelano baalagopaalakah paatu maam sarvadaa || 6 ||

विद्युदुद्योतवत्प्रस्फुरद्वाससं प्रावृडम्भोदवत्प्रोल्लसद्विग्रहम्⁠ ⁠। वन्यया मालया शोभितोरःस्थलं लोहिताङ्घ्रिद्वयं वारिजाक्षं भजे⁠ ⁠॥⁠ ⁠७⁠ ⁠॥

Vidyududyotavatprasphuradvaasasam praavrudambhodavatprollasadvigraham | Vanyayaa maalayaa shobhitorahsthalam lohitaanghridvayam vaarijaaksham bhaje || 7 ||

कुञ्चितैः कुन्तलैर्भ्राजमानाननं रत्नमौलिं लसत्कुण्डलं गण्डयोः⁠ ⁠। हारकेयूरकं कङ्कणप्रोज्ज्वलं किङ्किणीमञ्जुलं श्यामलं तं भजे⁠ ⁠॥⁠ ⁠८⁠ ⁠॥

Kunchitaih kuntalairbhraajamaanaananam ratnamaulim lasatkundalam gandayoh | Haarakeyoorakam kankanaprojjvalam kinkineemanjulam shyaamalam tam bhaje || 8 ||

अच्युतस्याष्टकं यः पठेदिष्टदं प्रेमतः प्रत्यहं पूरुषः सस्पृहम्⁠ ⁠। वृत्ततः सुन्दरं कर्तृ विश्वम्भरस्तस्य वश्यो हरिर्जायते सत्वरम्⁠ ⁠॥⁠ ⁠९⁠ ⁠॥

Achyutasyaashtakam yah pathedishtadam prematah pratyaham poorushah saspruham | Vruttatah sundaram kartru vishvambharastasya vashyo harirjaayate satvaram || 9 ||