# Shri Venkateshwara Suprabhatam · श्रीवेङ्कटेश्वरसुप्रभातम्

- Type: Stotra
- Language: Sanskrit
- Verses: 29
- Verified: under review
- Read in the app: https://pocketpothi.com/read?t=venkateshwara-suprabhatam
- Share link: https://pocketpothi.com/p/62
- Page: https://pocketpothi.com/texts/venkateshwara-suprabhatam

## Text (Devanagari, with simple Roman spelling below each verse)

### अथ श्रीवेङ्कटेशसुप्रभातम् ।
_Atha shreevenkateshasuprabhaatam |_

कौसल्या सुप्रजा राम पूर्वा सन्ध्या प्रवर्तते ।  
उत्तिष्ठ नरशार्दूल कर्तव्यं दैवमाह्निकम् ॥ १ ॥  

_Kausalyaa suprajaa raama poorvaa sandhyaa pravartate | / Uttishtha narashaardoola kartavyam daivamaahnikam || 1 ||_

उत्तिष्ठोत्तिष्ठ गोविन्द उत्तिष्ठ गरुडध्वज ।  
उत्तिष्ठ कमलाकान्त त्रैलोक्यं मङ्गलं कुरु ॥ २ ॥  

_Uttishthottishtha govinda uttishtha garudadhvaja | / Uttishtha kamalaakaanta trailokyam mangalam kuru || 2 ||_

मातस्समस्तजगतां मधुकैटभारेः  
वक्षोविहारिणि मनोहरदिव्यमूर्ते ।  
श्रीस्वामिनि श्रितजन प्रियदानशीले  
श्रीवेङ्कटेशदयिते तव सुप्रभातम् ॥ ३ ॥  

_Maatassamastajagataam madhukaitabhaareh / Vakshovihaarini manoharadivyamoorte | / Shreesvaamini shritajana priyadaanasheele / Shreevenkateshadayite tava suprabhaatam || 3 ||_

तव सुप्रभातमरविन्दलोचने  
भवतु प्रसन्नमुखचन्द्रमण्डले ।  
विधिशङ्करेन्द्रवनिताभिरर्चिते  
वृषशैलनाथदयिते दयानिधे ॥ ४ ॥  

_Tava suprabhaatamaravindalochane / Bhavatu prasannamukhachandramandale | / Vidhishankarendravanitaabhirarchite / Vrushashailanaathadayite dayaanidhe || 4 ||_

अत्र्यादि सप्तऋषयस्समुपास्य सन्ध्यां  
आकाशसिन्धुकमलानि मनोहराणि ।  
आदाय पादयुगमर्चयितुं प्रपन्नाः  
शेषाद्रिशेखरविभो तव सुप्रभातम् ॥ ५ ॥  

_Atryaadi saptarushayassamupaasya sandhyaam / Aakaashasindhukamalaani manoharaani | / Aadaaya paadayugamarchayitum prapannaah / Sheshaadrishekharavibho tava suprabhaatam || 5 ||_

पञ्चाननाब्जभवषण्मुखवासवाद्याः  
त्रैविक्रमादिचरितं विबुधाः स्तुवन्ति ।  
भाषापतिः पठति वासरशुद्धिमारात्  
शेषाद्रिशेखरविभो तव सुप्रभातम् ॥ ६ ॥  

_Panchaananaabjabhavashanmukhavaasavaadyaah / Traivikramaadicharitam vibudhaah stuvanti | / Bhaashaapatih pathati vaasarashuddhimaaraat / Sheshaadrishekharavibho tava suprabhaatam || 6 ||_

ईषत्प्रफुल्लसरसीरुहनारिकेल-  
पूगद्रुमादि सुमनोहरपालिकानाम् ।  
आवाति मन्दमनिलस्सह दिव्यगन्धैः  
शेषाद्रिशेखरविभो तव सुप्रभातम् ॥ ७ ॥  

_Eeshatpraphullasaraseeruhanaarikela- / Poogadrumaadi sumanoharapaalikaanaam | / Aavaati mandamanilassaha divyagandhaih / Sheshaadrishekharavibho tava suprabhaatam || 7 ||_

उन्मील्य नेत्रयुगमुत्तमपञ्जरस्थाः  
पात्रावशिष्टकदलीफलपायसानि ।  
भुक्त्वा सलीलमथ केलिशुकाः पठन्ति  
शेषाद्रिशेखरविभो तव सुप्रभातम् ॥ ८ ॥  

_Unmeelya netrayugamuttamapanjarasthaah / Paatraavashishtakadaleephalapaayasaani | / Bhuktvaa saleelamatha kelishukaah pathanti / Sheshaadrishekharavibho tava suprabhaatam || 8 ||_

तन्त्रीप्रकर्षमधुरस्वनया विपञ्च्या  
गायत्यनन्तचरितं तव नारदोऽपि ।  
भाषासमग्रमसकृत्करचाररम्यं  
शेषाद्रिशेखरविभो तव सुप्रभातम् ॥ ९ ॥  

_Tantreeprakarshamadhurasvanayaa vipanchyaa / Gaayatyanantacharitam tava naarado'pi | / Bhaashaasamagramasakrutkarachaararamyam / Sheshaadrishekharavibho tava suprabhaatam || 9 ||_

भृङ्गावली च मकरन्दरसानुविद्ध-  
झङ्कारगीतनिनदैः सह सेवनाय ।  
निर्यात्युपान्तसरसीकमलोदरेभ्यः  
शेषाद्रिशेखरविभो तव सुप्रभातम् ॥ १० ॥  

_Bhrungaavalee cha makarandarasaanuviddha- / Jhankaarageetaninadaih saha sevanaaya | / Niryaatyupaantasaraseekamalodarebhyah / Sheshaadrishekharavibho tava suprabhaatam || 10 ||_

योषागणेन वरदध्नि विमथ्यमाने  
घोषालयेषु दधिमन्थनतीव्रघोषाः ।  
रोषात्कलिं विदधते ककुभश्च कुम्भाः  
शेषाद्रिशेखरविभो तव सुप्रभातम् ॥ ११ ॥  

_Yoshaaganena varadadhni vimathyamaane / Ghoshaalayeshu dadhimanthanateevraghoshaah | / Roshaatkalim vidadhate kakubhashcha kumbhaah / Sheshaadrishekharavibho tava suprabhaatam || 11 ||_

पद्मेशमित्रशतपत्रगतालिवर्गाः  
हर्तुं श्रियं कुवलयस्य निजाङ्गलक्ष्म्या ।  
भेरीनिनादमिव बिभ्रति तीव्रनादं  
शेषाद्रिशेखरविभो तव सुप्रभातम् ॥ १२ ॥  

_Padmeshamitrashatapatragataalivargaah / Hartum shriyam kuvalayasya nijaangalakshmyaa | / Bhereeninaadamiva bibhrati teevranaadam / Sheshaadrishekharavibho tava suprabhaatam || 12 ||_

श्रीमन्नभीष्टवरदाखिललोकबन्धो  
श्रीश्रीनिवास जगदेकदयैकसिन्धो ।  
श्रीदेवतागृहभुजान्तर दिव्यमूर्ते  
श्रीवेङ्कटाचलपते तव सुप्रभातम् ॥ १३ ॥  

_Shreemannabheeshtavaradaakhilalokabandho / Shreeshreenivaasa jagadekadayaikasindho | / Shreedevataagruhabhujaantara divyamoorte / Shreevenkataachalapate tava suprabhaatam || 13 ||_

श्रीस्वामिपुष्करिणिकाऽऽप्लवनिर्मलाङ्गाः  
श्रेयोऽर्थिनो हरविरिञ्चिसनन्दनाद्याः ।  
द्वारे वसन्ति वरवेत्रहतोत्तमाङ्गाः  
श्रीवेङ्कटाचलपते तव सुप्रभातम् ॥ १४ ॥  

_Shreesvaamipushkarinikaa''plavanirmalaangaah / Shreyo'rthino haravirinchisanandanaadyaah | / Dvaare vasanti varavetrahatottamaangaah / Shreevenkataachalapate tava suprabhaatam || 14 ||_

श्रीशेषशैलगरुडाचलवेङ्कटाद्रि  
नारायणाद्रिवृषभाद्रिवृषाद्रिमुख्याम् ।  
आख्यां त्वदीयवसतेरनिशं वदन्ति  
श्रीवेङ्कटाचलपते तव सुप्रभातम् ॥ १५ ॥  

_Shreesheshashailagarudaachalavenkataadri / Naaraayanaadrivrushabhaadrivrushaadrimukhyaam | / Aakhyaam tvadeeyavasateranisham vadanti / Shreevenkataachalapate tava suprabhaatam || 15 ||_

सेवापराः शिवसुरेशकृशानुधर्म-  
रक्षोऽम्बुनाथपवमानधनाधिनाथाः ।  
बद्धाञ्जलिप्रविलसन्निजशीर्षदेशाः  
श्रीवेङ्कटाचलपते तव सुप्रभातम् ॥ १६ ॥  

_Sevaaparaah shivasureshakrushaanudharma- / Raksho'mbunaathapavamaanadhanaadhinaathaah | / Baddhaanjalipravilasannijasheershadeshaah / Shreevenkataachalapate tava suprabhaatam || 16 ||_

धाटीषु ते विहगराजमृगाधिराज-  
नागाधिराजगजराजहयाधिराजाः ।  
स्वस्वाधिकारमहिमाधिकमर्थयन्ते  
श्रीवेङ्कटाचलपते तव सुप्रभातम् ॥ १७ ॥  

_Dhaateeshu te vihagaraajamrugaadhiraaja- / Naagaadhiraajagajaraajahayaadhiraajaah | / Svasvaadhikaaramahimaadhikamarthayante / Shreevenkataachalapate tava suprabhaatam || 17 ||_

सूर्येन्दुभौमबुधवाक्पतिकाव्यसौरि-  
स्वर्भानुकेतुदिविषत्परिषत्प्रधानाः ।  
त्वद्दासदासचरमावधिदासदासाः  
श्रीवेङ्कटाचलपते तव सुप्रभातम् ॥ १८ ॥  

_Sooryendubhaumabudhavaakpatikaavyasauri- / Svarbhaanuketudivishatparishatpradhaanaah | / Tvaddaasadaasacharamaavadhidaasadaasaah / Shreevenkataachalapate tava suprabhaatam || 18 ||_

त्वत्पादधूलिभरितस्फुरितोत्तमाङ्गाः  
स्वर्गापवर्गनिरपेक्षनिजान्तरङ्गाः ।  
कल्पागमाकलनयाऽऽकुलतां लभन्ते  
श्रीवेङ्कटाचलपते तव सुप्रभातम् ॥ १९ ॥  

_Tvatpaadadhoolibharitasphuritottamaangaah / Svargaapavarganirapekshanijaantarangaah | / Kalpaagamaakalanayaa''kulataam labhante / Shreevenkataachalapate tava suprabhaatam || 19 ||_

त्वद्गोपुराग्रशिखराणि निरीक्षमाणाः  
स्वर्गापवर्गपदवीं परमां श्रयन्तः ।  
मर्त्या मनुष्यभुवने मतिमाश्रयन्ते  
श्रीवेङ्कटाचलपते तव सुप्रभातम् ॥ २० ॥  

_Tvadgopuraagrashikharaani nireekshamaanaah / Svargaapavargapadaveem paramaam shrayantah | / Martyaa manushyabhuvane matimaashrayante / Shreevenkataachalapate tava suprabhaatam || 20 ||_

श्रीभूमिनायक दयादिगुणामृताब्धे  
देवाधिदेव जगदेकशरण्यमूर्ते ।  
श्रीमन्ननन्तगरुडादिभिरर्चिताङ्घ्रे  
श्रीवेङ्कटाचलपते तव सुप्रभातम् ॥ २१ ॥  

_Shreebhoominaayaka dayaadigunaamrutaabdhe / Devaadhideva jagadekasharanyamoorte | / Shreemannanantagarudaadibhirarchitaanghre / Shreevenkataachalapate tava suprabhaatam || 21 ||_

श्रीपद्मनाभ पुरुषोत्तम वासुदेव  
वैकुण्ठ माधव जनार्दन चक्रपाणे ।  
श्रीवत्सचिह्न शरणागतपारिजात  
श्रीवेङ्कटाचलपते तव सुप्रभातम् ॥ २२ ॥  

_Shreepadmanaabha purushottama vaasudeva / Vaikuntha maadhava janaardana chakrapaane | / Shreevatsachihna sharanaagatapaarijaata / Shreevenkataachalapate tava suprabhaatam || 22 ||_

कन्दर्पदर्पहरसुन्दरदिव्यमूर्ते  
कान्ताकुचाम्बुरुहकुड्मललोलदृष्टे ।  
कल्याणनिर्मलगुणाकरदिव्यकीर्ते  
श्रीवेङ्कटाचलपते तव सुप्रभातम् ॥ २३ ॥  

_Kandarpadarpaharasundaradivyamoorte / Kaantaakuchaamburuhakudmalaloladrushte | / Kalyaananirmalagunaakaradivyakeerte / Shreevenkataachalapate tava suprabhaatam || 23 ||_

मीनाकृते कमठकोलनृसिंहवर्णिन्  
स्वामिन् परश्वथतपोधन रामचन्द्र ।  
शेषांशराम यदुनन्दन कल्किरूप  
श्रीवेङ्कटाचलपते तव सुप्रभातम् ॥ २४ ॥  

_Meenaakrute kamathakolanrusinhavarnin / Svaamin parashvathatapodhana raamachandra | / Sheshaansharaama yadunandana kalkiroopa / Shreevenkataachalapate tava suprabhaatam || 24 ||_

एलालवङ्गघनसारसुगन्धितीर्थं  
दिव्यं वियत्सरिति हेमघटेषु पूर्णम् ।  
धृत्वाऽऽद्य वैदिकशिखामणयः प्रहृष्टाः  
तिष्ठन्ति वेङ्कटपते तव सुप्रभातम् ॥ २५ ॥  

_Elaalavangaghanasaarasugandhiteertham / Divyam viyatsariti hemaghateshu poornam | / Dhrutvaa''dya vaidikashikhaamanayah prahrushtaah / Tishthanti venkatapate tava suprabhaatam || 25 ||_

भास्वानुदेति विकचानि सरोरुहाणि  
सम्पूरयन्ति निनदैः ककुभो विहङ्गाः ।  
श्रीवैष्णवास्सततमर्थितमङ्गलास्ते  
धामाश्रयन्ति तव वेङ्कट सुप्रभातम् ॥ २६ ॥  

_Bhaasvaanudeti vikachaani saroruhaani / Sampoorayanti ninadaih kakubho vihangaah | / Shreevaishnavaassatatamarthitamangalaaste / Dhaamaashrayanti tava venkata suprabhaatam || 26 ||_

ब्रह्मादयस्सुरवरास्समहर्षयस्ते  
सन्तस्सनन्दनमुखास्त्वथ योगिवर्याः ।  
धामान्तिके तव हि मङ्गलवस्तुहस्ताः  
श्रीवेङ्कटाचलपते तव सुप्रभातम् ॥ २७ ॥  

_Brahmaadayassuravaraassamaharshayaste / Santassanandanamukhaastvatha yogivaryaah | / Dhaamaantike tava hi mangalavastuhastaah / Shreevenkataachalapate tava suprabhaatam || 27 ||_

लक्ष्मीनिवास निरवद्यगुणैकसिन्धो  
संसारसागरसमुत्तरणैकसेतो ।  
वेदान्तवेद्य निजवैभव भक्तभोग्य  
श्रीवेङ्कटाचलपते तव सुप्रभातम् ॥ २८ ॥  

_Lakshmeenivaasa niravadyagunaikasindho / Sansaarasaagarasamuttaranaikaseto | / Vedaantavedya nijavaibhava bhaktabhogya / Shreevenkataachalapate tava suprabhaatam || 28 ||_

इत्थं वृषाचलपतेरिह सुप्रभातम्  
ये मानवाः प्रतिदिनं पठितुं प्रवृत्ताः ।  
तेषां प्रभातसमये स्मृतिरङ्गभाजां  
प्रज्ञां परार्थसुलभां परमां प्रसूते ॥ २९ ॥  

_Ittham vrushaachalapateriha suprabhaatam / Ye maanavaah pratidinam pathitum pravruttaah | / Teshaam prabhaatasamaye smrutirangabhaajaam / Prajnaam paraarthasulabhaam paramaam prasoote || 29 ||_

### ॥ इति श्रीवेङ्कटेशसुप्रभातम् ॥
_|| Iti shreevenkateshasuprabhaatam ||_