{"id":"shiva-mahimna-stotra","code":"4n","title":{"dev":"शिवमहिम्नःस्तोत्रम्","rom":"Shiva Mahimna Stotra"},"type":"stotra","typeLabel":"Stotra","language":"sa","languageName":"Sanskrit","deity":["shiva"],"aliases":["Mahimnah Stotra","Mahimna Paar Te"],"verses":43,"sections":[{"kind":"verse","n":1,"dev":"महिम्नः पारं ते परमविदुषो यद्यसदृशी\nस्तुतिर्ब्रह्मादीनामपि तदवसन्नास्त्वयि गिरः ।\nअथाऽवाच्यः सर्वः स्वमतिपरिणामावधि गृणन्\nममाप्येष स्तोत्रे हर निरपवादः परिकरः ॥ १ ॥","rom":"Mahimnah paaram te paramavidusho yadyasadrushee\nStutirbrahmaadeenaamapi tadavasannaastvayi girah |\nAthaa'vaachyah sarvah svamatiparinaamaavadhi grunan\nMamaapyesha stotre hara nirapavaadah parikarah || 1 ||"},{"kind":"verse","n":2,"dev":"अतीतः पन्थानं तव च महिमा वाङ्मनसयो-\n-रतद्व्यावृत्त्या यं चकितमभिधत्ते श्रुतिरपि ।\nस कस्य स्तोतव्यः कतिविधगुणः कस्य विषयः\nपदे त्वर्वाचीने पतति न मनः कस्य न वचः ॥ २ ॥","rom":"Ateetah panthaanam tava cha mahimaa vaanmanasayo-\n-ratadvyaavruttyaa yam chakitamabhidhatte shrutirapi |\nSa kasya stotavyah katividhagunah kasya vishayah\nPade tvarvaacheene patati na manah kasya na vachah || 2 ||"},{"kind":"verse","n":3,"dev":"मधुस्फीता वाचः परमममृतं निर्मितवत-\n-स्तव ब्रह्मन् किं वागपि सुरगुरोर्विस्मयपदम् ।\nमम त्वेतां वाणीं गुणकथनपुण्येन भवतः\nपुनामीत्यर्थेऽस्मिन् पुरमथन बुद्धिर्व्यवसिता ॥ ३ ॥","rom":"Madhuspheetaa vaachah paramamamrutam nirmitavata-\n-stava brahman kim vaagapi suragurorvismayapadam |\nMama tvetaam vaaneem gunakathanapunyena bhavatah\nPunaameetyarthe'smin puramathana buddhirvyavasitaa || 3 ||"},{"kind":"verse","n":4,"dev":"तवैश्वर्यं यत्तज्जगदुदयरक्षाप्रलयकृत्\nत्रयीवस्तुव्यस्तं तिसृषु गुणभिन्नासु तनुषु ।\nअभव्यानामस्मिन् वरद रमणीयामरमणीं\nविहन्तुं व्याक्रोशीं विदधत इहैके जडधियः ॥ ४ ॥","rom":"Tavaishvaryam yattajjagadudayarakshaapralayakrut\nTrayeevastuvyastam tisrushu gunabhinnaasu tanushu |\nAbhavyaanaamasmin varada ramaneeyaamaramaneem\nVihantum vyaakrosheem vidadhata ihaike jadadhiyah || 4 ||"},{"kind":"verse","n":5,"dev":"किमीहः किं कायः स खलु किमुपायस्त्रिभुवनं\nकिमाधारो धाता सृजति किमुपादान इति च ।\nअतर्क्यैश्वर्ये त्वय्यनवसरदुःस्थो हतधियः\nकुतर्कोऽयं कांश्चिन्मुखरयति मोहाय जगतः ॥ ५ ॥","rom":"Kimeehah kim kaayah sa khalu kimupaayastribhuvanam\nKimaadhaaro dhaataa srujati kimupaadaana iti cha |\nAtarkyaishvarye tvayyanavasaraduhstho hatadhiyah\nKutarko'yam kaanshchinmukharayati mohaaya jagatah || 5 ||"},{"kind":"verse","n":6,"dev":"अजन्मानो लोकाः किमवयववन्तोऽपि जगता-\n-मधिष्ठातारं किं भवविधिरनादृत्य भवति ।\nअनीशो वा कुर्याद्भुवनजनने कः परिकरो\nयतो मन्दास्त्वां प्रत्यमरवर संशेरत इमे ॥ ६ ॥","rom":"Ajanmaano lokaah kimavayavavanto'pi jagataa-\n-madhishthaataaram kim bhavavidhiranaadrutya bhavati |\nAneesho vaa kuryaadbhuvanajanane kah parikaro\nYato mandaastvaam pratyamaravara sansherata ime || 6 ||"},{"kind":"verse","n":7,"dev":"त्रयी साङ्ख्यं योगः पशुपतिमतं वैष्णवमिति\nप्रभिन्ने प्रस्थाने परमिदमदः पथ्यमिति च ।\nरुचीनां वैचित्र्यादृजुकुटिल नानापथजुषां\nनृणामेको गम्यस्त्वमसि पयसामर्णव इव ॥ ७ ॥","rom":"Trayee saankhyam yogah pashupatimatam vaishnavamiti\nPrabhinne prasthaane paramidamadah pathyamiti cha |\nRucheenaam vaichitryaadrujukutila naanaapathajushaam\nNrunaameko gamyastvamasi payasaamarnava iva || 7 ||"},{"kind":"verse","n":8,"dev":"महोक्षः खट्वाङ्गं परशुरजिनं भस्म फणिनः\nकपालं चेतीयत्तव वरद तन्त्रोपकरणम् ।\nसुरास्तां तामृद्धिं दधति तु भवद्भ्रूप्रणिहितां\nन हि स्वात्मारामं विषयमृगतृष्णा भ्रमयति ॥ ८ ॥","rom":"Mahokshah khatvaangam parashurajinam bhasma phaninah\nKapaalam cheteeyattava varada tantropakaranam |\nSuraastaam taamruddhim dadhati tu bhavadbhroopranihitaam\nNa hi svaatmaaraamam vishayamrugatrushnaa bhramayati || 8 ||"},{"kind":"verse","n":9,"dev":"ध्रुवं कश्चित् सर्वं सकलमपरस्त्वध्रुवमिदं\nपरो ध्रौव्याध्रौव्ये जगति गदति व्यस्तविषये ।\nसमस्तेऽप्येतस्मिन् पुरमथन तैर्विस्मित इव\nस्तुवञ्जिह्रेमि त्वां न खलु ननु धृष्टा मुखरता ॥ ९ ॥","rom":"Dhruvam kashchit sarvam sakalamaparastvadhruvamidam\nParo dhrauvyaadhrauvye jagati gadati vyastavishaye |\nSamaste'pyetasmin puramathana tairvismita iva\nStuvanjihremi tvaam na khalu nanu dhrushtaa mukharataa || 9 ||"},{"kind":"verse","n":10,"dev":"तवैश्वर्यं यत्नाद्यदुपरि विरिञ्चिर्हरिरधः\nपरिच्छेत्तुं यातावनलमनलस्कन्धवपुषः ।\nततो भक्तिश्रद्धाभरगुरुगृणद्भ्यां गिरिश यत्\nस्वयं तस्थे ताभ्यां तव किमनुवृत्तिर्न फलति ॥ १० ॥","rom":"Tavaishvaryam yatnaadyadupari virinchirhariradhah\nParichchhettum yaataavanalamanalaskandhavapushah |\nTato bhaktishraddhaabharagurugrunadbhyaam girisha yat\nSvayam tasthe taabhyaam tava kimanuvruttirna phalati || 10 ||"},{"kind":"verse","n":11,"dev":"अयत्नादापाद्य त्रिभुवनमवैरव्यतिकरं\nदशास्यो यद्बाहूनभृत रणकण्डूपरवशान् ।\nशिरःपद्मश्रेणीरचितचरणाम्भोरुहबलेः\nस्थिरायास्त्वद्भक्तेस्त्रिपुरहर विस्फूर्जितमिदम् ॥ ११ ॥","rom":"Ayatnaadaapaadya tribhuvanamavairavyatikaram\nDashaasyo yadbaahoonabhruta ranakandooparavashaan |\nShirahpadmashreneerachitacharanaambhoruhabaleh\nSthiraayaastvadbhaktestripurahara visphoorjitamidam || 11 ||"},{"kind":"verse","n":12,"dev":"अमुष्य त्वत्सेवासमधिगतसारं भुजवनं\nबलात् कैलासेऽपि त्वदधिवसतौ विक्रमयतः ।\nअलभ्या पातालेऽप्यलसचलिताङ्गुष्ठशिरसि\nप्रतिष्ठा त्वय्यासीद्ध्रुवमुपचितो मुह्यति खलः ॥ १२ ॥","rom":"Amushya tvatsevaasamadhigatasaaram bhujavanam\nBalaat kailaase'pi tvadadhivasatau vikramayatah |\nAlabhyaa paataale'pyalasachalitaangushthashirasi\nPratishthaa tvayyaaseeddhruvamupachito muhyati khalah || 12 ||"},{"kind":"verse","n":13,"dev":"यदृद्धिं सुत्राम्णो वरद परमोच्चैरपि सती-\n-मधश्चक्रे बाणः परिजनविधेयत्रिभुवनः ।\nन तच्चित्रं तस्मिन् वरिवसितरि त्वच्चरणयो-\n-र्न कस्याप्युन्नत्यै भवति शिरसस्त्वय्यवनतिः ॥ १३ ॥","rom":"Yadruddhim sutraamno varada paramochchairapi satee-\n-madhashchakre baanah parijanavidheyatribhuvanah |\nNa tachchitram tasmin varivasitari tvachcharanayo-\n-rna kasyaapyunnatyai bhavati shirasastvayyavanatih || 13 ||"},{"kind":"verse","n":14,"dev":"अकाण्डब्रह्माण्डक्षयचकितदेवासुरकृपा-\n-विधेयस्यासीद्यस्त्रिनयनविषं संहृतवतः ।\nस कल्माषः कण्ठे तव न कुरुते न श्रियमहो\nविकारोऽपि श्लाघ्यो भुवनभयभङ्गव्यसनिनः ॥ १४ ॥","rom":"Akaandabrahmaandakshayachakitadevaasurakrupaa-\n-vidheyasyaaseedyastrinayanavisham sanhrutavatah |\nSa kalmaashah kanthe tava na kurute na shriyamaho\nVikaaro'pi shlaaghyo bhuvanabhayabhangavyasaninah || 14 ||"},{"kind":"verse","n":15,"dev":"असिद्धार्था नैव क्वचिदपि सदेवासुरनरे\nनिवर्तन्ते नित्यं जगति जयिनो यस्य विशिखाः ।\nस पश्यन्नीश त्वामितरसुरसाधारणमभूत्\nस्मरः स्मर्तव्यात्मा न हि वशिषु पथ्यः परिभवः ॥ १५ ॥","rom":"Asiddhaarthaa naiva kvachidapi sadevaasuranare\nNivartante nityam jagati jayino yasya vishikhaah |\nSa pashyanneesha tvaamitarasurasaadhaaranamabhoot\nSmarah smartavyaatmaa na hi vashishu pathyah paribhavah || 15 ||"},{"kind":"verse","n":16,"dev":"मही पादाघाताद्व्रजति सहसा संशयपदं\nपदं विष्णोर्भ्राम्यद्भुजपरिघरुग्णग्रहगणम् ।\nमुहुर्द्यौर्दौस्थ्यं यात्यनिभृतजटाताडिततटा\nजगद्रक्षायै त्वं नटसि ननु वामैव विभुता ॥ १६ ॥","rom":"Mahee paadaaghaataadvrajati sahasaa sanshayapadam\nPadam vishnorbhraamyadbhujaparigharugnagrahaganam |\nMuhurdyaurdausthyam yaatyanibhrutajataataaditatataa\nJagadrakshaayai tvam natasi nanu vaamaiva vibhutaa || 16 ||"},{"kind":"verse","n":17,"dev":"वियद्व्यापी तारागणगुणितफेनोद्गमरुचिः\nप्रवाहो वारां यः पृषतलघुदृष्टः शिरसि ते ।\nजगद्द्वीपाकारं जलधिवलयं तेन कृतमि-\n-त्यनेनैवोन्नेयं धृतमहिम दिव्यं तव वपुः ॥ १७ ॥","rom":"Viyadvyaapee taaraaganagunitaphenodgamaruchih\nPravaaho vaaraam yah prushatalaghudrushtah shirasi te |\nJagaddveepaakaaram jaladhivalayam tena krutami-\n-tyanenaivonneyam dhrutamahima divyam tava vapuh || 17 ||"},{"kind":"verse","n":18,"dev":"रथः क्षोणी यन्ता शतधृतिरगेन्द्रो धनुरथो\nरथाङ्गे चन्द्रार्कौ रथचरणपाणिः शर इति ।\nदिधक्षोस्ते कोऽयं त्रिपुरतृणमाडम्बरविधि-\n-र्विधेयैः क्रीडन्त्यो न खलु परतन्त्राः प्रभुधियः ॥ १८ ॥","rom":"Rathah kshonee yantaa shatadhrutiragendro dhanuratho\nRathaange chandraarkau rathacharanapaanih shara iti |\nDidhakshoste ko'yam tripuratrunamaadambaravidhi-\n-rvidheyaih kreedantyo na khalu paratantraah prabhudhiyah || 18 ||"},{"kind":"verse","n":19,"dev":"हरिस्ते साहस्रं कमलबलिमाधाय पदयो-\n-र्यदेकोने तस्मिन् निजमुदहरन्नेत्रकमलम् ।\nगतो भक्त्युद्रेकः परिणतिमसौ चक्रवपुषा\nत्रयाणां रक्षायै त्रिपुरहर जागर्ति जगताम् ॥ १९ ॥","rom":"Hariste saahasram kamalabalimaadhaaya padayo-\n-ryadekone tasmin nijamudaharannetrakamalam |\nGato bhaktyudrekah parinatimasau chakravapushaa\nTrayaanaam rakshaayai tripurahara jaagarti jagataam || 19 ||"},{"kind":"verse","n":20,"dev":"क्रतौ सुप्ते जाग्रत्त्वमसि फलयोगे क्रतुमतां\nक्व कर्म प्रध्वस्तं फलति पुरुषाराधनमृते ।\nअतस्त्वां सम्प्रेक्ष्य क्रतुषु फलदानप्रतिभुवं\nश्रुतौ श्रद्धां बद्ध्वा दृढपरिकरः कर्मसु जनः ॥ २० ॥","rom":"Kratau supte jaagrattvamasi phalayoge kratumataam\nKva karma pradhvastam phalati purushaaraadhanamrute |\nAtastvaam samprekshya kratushu phaladaanapratibhuvam\nShrutau shraddhaam baddhvaa drudhaparikarah karmasu janah || 20 ||"},{"kind":"verse","n":21,"dev":"क्रियादक्षो दक्षः क्रतुपतिरधीशस्तनुभृता-\n-मृषीणामार्त्विज्यं शरणद सदस्याः सुरगणाः ।\nक्रतुभ्रेषस्त्वत्तः क्रतुफलविधानव्यसनिनो\nध्रुवं कर्तुः श्रद्धाविधुरमभिचाराय हि मखाः ॥ २१ ॥","rom":"Kriyaadaksho dakshah kratupatiradheeshastanubhrutaa-\n-mrusheenaamaartvijyam sharanada sadasyaah suraganaah |\nKratubhreshastvattah kratuphalavidhaanavyasanino\nDhruvam kartuh shraddhaavidhuramabhichaaraaya hi makhaah || 21 ||"},{"kind":"verse","n":22,"dev":"प्रजानाथं नाथ प्रसभमभिकं स्वां दुहितरं\nगतं रोहिद्भूतां रिरमयिषुमृष्यस्य वपुषा ।\nधनुष्पाणेर्यातं दिवमपि सपत्राकृतममुं\nत्रसन्तं तेऽद्यापि त्यजति न मृगव्याधरभसः ॥ २२ ॥","rom":"Prajaanaatham naatha prasabhamabhikam svaam duhitaram\nGatam rohidbhootaam riramayishumrushyasya vapushaa |\nDhanushpaaneryaatam divamapi sapatraakrutamamum\nTrasantam te'dyaapi tyajati na mrugavyaadharabhasah || 22 ||"},{"kind":"verse","n":23,"dev":"स्वलावण्याशंसाधृतधनुषमह्नाय तृणवत्\nपुरः प्लुष्टं दृष्ट्वा पुरमथन पुष्पायुधमपि ।\nयदि स्त्रैणं देवी यमनिरत देहार्धघटना-\n-दवैति त्वामद्धा बत वरद मुग्धा युवतयः ॥ २३ ॥","rom":"Svalaavanyaashansaadhrutadhanushamahnaaya trunavat\nPurah plushtam drushtvaa puramathana pushpaayudhamapi |\nYadi strainam devee yamanirata dehaardhaghatanaa-\n-davaiti tvaamaddhaa bata varada mugdhaa yuvatayah || 23 ||"},{"kind":"verse","n":24,"dev":"श्मशानेष्वाक्रीडा स्मरहर पिशाचाः सहचरा-\n-श्चिताभस्मालेपः स्रगपि नृकरोटीपरिकरः ।\nअमङ्गल्यं शीलं तव भवतु नामैवमखिलं\nतथापि स्मर्तॄणां वरद परमं मङ्गलमसि ॥ २४ ॥","rom":"Shmashaaneshvaakreedaa smarahara pishaachaah sahacharaa-\n-shchitaabhasmaalepah sragapi nrukaroteeparikarah |\nAmangalyam sheelam tava bhavatu naamaivamakhilam\nTathaapi smartroonaam varada paramam mangalamasi || 24 ||"},{"kind":"verse","n":25,"dev":"मनः प्रत्यक्चित्ते सविधमवधायात्तमरुतः\nप्रहृष्यद्रोमाणः प्रमदसलिलोत्सङ्गितदृशः ।\nयदालोक्याह्लादं ह्रद इव निमज्यामृतमये\nदधत्यन्तस्तत्त्वं किमपि यमिनस्तत् किल भवान् ॥ २५ ॥","rom":"Manah pratyakchitte savidhamavadhaayaattamarutah\nPrahrushyadromaanah pramadasalilotsangitadrushah |\nYadaalokyaahlaadam hrada iva nimajyaamrutamaye\nDadhatyantastattvam kimapi yaminastat kila bhavaan || 25 ||"},{"kind":"verse","n":26,"dev":"त्वमर्कस्त्वं सोमस्त्वमसि पवनस्त्वं हुतवह-\n-स्त्वमापस्त्वं व्योम त्वमु धरणिरात्मा त्वमिति च ।\nपरिच्छिन्नामेवं त्वयि परिणता बिभ्रति गिरं\nन विद्मस्तत्तत्त्वं वयमिह तु यत्त्वं न भवसि ॥ २६ ॥","rom":"Tvamarkastvam somastvamasi pavanastvam hutavaha-\n-stvamaapastvam vyoma tvamu dharaniraatmaa tvamiti cha |\nParichchhinnaamevam tvayi parinataa bibhrati giram\nNa vidmastattattvam vayamiha tu yattvam na bhavasi || 26 ||"},{"kind":"verse","n":27,"dev":"त्रयीं तिस्रो वृत्तीस्त्रिभुवनमथो त्रीनपि सुरा-\n-नकाराद्यैर्वर्णैस्त्रिभिरभिदधत् तीर्णविकृति ।\nतुरीयं ते धाम ध्वनिभिरवरुन्धानमणुभिः\nसमस्तं व्यस्तं त्वां शरणद गृणात्योमिति पदम् ॥ २७ ॥","rom":"Trayeem tisro vrutteestribhuvanamatho treenapi suraa-\n-nakaaraadyairvarnaistribhirabhidadhat teernavikruti |\nTureeyam te dhaama dhvanibhiravarundhaanamanubhih\nSamastam vyastam tvaam sharanada grunaatyomiti padam || 27 ||"},{"kind":"verse","n":28,"dev":"भवः शर्वो रुद्रः पशुपतिरथोग्रः सहमहां-\n-स्तथा भीमेशानाविति यदभिधानाष्टकमिदम् ।\nअमुष्मिन् प्रत्येकं प्रविचरति देव श्रुतिरपि\nप्रियायास्मै धाम्ने प्रविहितनमस्योऽस्मि भवते ॥ २८ ॥","rom":"Bhavah sharvo rudrah pashupatirathograh sahamahaam-\n-stathaa bheemeshaanaaviti yadabhidhaanaashtakamidam |\nAmushmin pratyekam pravicharati deva shrutirapi\nPriyaayaasmai dhaamne pravihitanamasyo'smi bhavate || 28 ||"},{"kind":"verse","n":29,"dev":"नमो नेदिष्ठाय प्रियदव दविष्ठाय च नमो\nनमः क्षोदिष्ठाय स्मरहर महिष्ठाय च नमः ।\nनमो वर्षिष्ठाय त्रिनयन यविष्ठाय च नमो\nनमः सर्वस्मै ते तदिदमिति शर्वाय च नमः ॥ २९ ॥","rom":"Namo nedishthaaya priyadava davishthaaya cha namo\nNamah kshodishthaaya smarahara mahishthaaya cha namah |\nNamo varshishthaaya trinayana yavishthaaya cha namo\nNamah sarvasmai te tadidamiti sharvaaya cha namah || 29 ||"},{"kind":"verse","n":30,"dev":"बहुलरजसे विश्वोत्पत्तौ भवाय नमो नमः\nप्रबलतमसे तत्संहारे हराय नमो नमः ।\nजनसुखकृते सत्त्वोद्रिक्तौ मृडाय नमो नमः\nप्रमहसि पदे निस्त्रैगुण्ये शिवाय नमो नमः ॥ ३० ॥","rom":"Bahularajase vishvotpattau bhavaaya namo namah\nPrabalatamase tatsanhaare haraaya namo namah |\nJanasukhakrute sattvodriktau mrudaaya namo namah\nPramahasi pade nistraigunye shivaaya namo namah || 30 ||"},{"kind":"verse","n":31,"dev":"कृशपरिणति चेतः क्लेशवश्यं क्व चेदं\nक्व च तव गुणसीमोल्लङ्घिनी शश्वदृद्धिः ।\nइति चकितममन्दीकृत्य मां भक्तिराधा-\n-द्वरद चरणयोस्ते वाक्यपुष्पोपहारम् ॥ ३१ ॥","rom":"Krushaparinati chetah kleshavashyam kva chedam\nKva cha tava gunaseemollanghinee shashvadruddhih |\nIti chakitamamandeekrutya maam bhaktiraadhaa-\n-dvarada charanayoste vaakyapushpopahaaram || 31 ||"},{"kind":"verse","n":32,"dev":"असितगिरिसमं स्यात्कज्जलं सिन्धुपात्रे\nसुरतरुवरशाखा लेखनी पत्रमुर्वी ।\nलिखति यदि गृहीत्वा शारदा सर्वकालं\nतदपि तव गुणानामीश पारं न याति ॥ ३२ ॥","rom":"Asitagirisamam syaatkajjalam sindhupaatre\nSurataruvarashaakhaa lekhanee patramurvee |\nLikhati yadi gruheetvaa shaaradaa sarvakaalam\nTadapi tava gunaanaameesha paaram na yaati || 32 ||"},{"kind":"verse","n":33,"dev":"असुरसुरमुनीन्द्रैरर्चितस्येन्दुमौले-\n-र्ग्रथितगुणमहिम्नो निर्गुणस्येश्वरस्य ।\nसकलगणवरिष्ठः पुष्पदन्ताभिधानः\nरुचिरमलघुवृत्तैः स्तोत्रमेतच्चकार ॥ ३३ ॥","rom":"Asurasuramuneendrairarchitasyendumaule-\n-rgrathitagunamahimno nirgunasyeshvarasya |\nSakalaganavarishthah pushpadantaabhidhaanah\nRuchiramalaghuvruttaih stotrametachchakaara || 33 ||"},{"kind":"verse","n":34,"dev":"अहरहरनवद्यं धूर्जटेः स्तोत्रमेतत्\nपठति परमभक्त्या शुद्धचित्तः पुमान् यः ।\nस भवति शिवलोके रुद्रतुल्यस्तथात्र\nप्रचुरतरधनायुः पुत्रवान् कीर्तिमांश्च ॥ ३४ ॥","rom":"Aharaharanavadyam dhoorjateh stotrametat\nPathati paramabhaktyaa shuddhachittah pumaan yah |\nSa bhavati shivaloke rudratulyastathaatra\nPrachurataradhanaayuh putravaan keertimaanshcha || 34 ||"},{"kind":"verse","n":35,"dev":"महेशान्नापरो देवो महिम्नो नापरा स्तुतिः ।\nअघोरान्नापरो मन्त्रो नास्ति तत्त्वं गुरोः परम् ॥ ३५ ॥","rom":"Maheshaannaaparo devo mahimno naaparaa stutih |\nAghoraannaaparo mantro naasti tattvam guroh param || 35 ||"},{"kind":"verse","n":36,"dev":"दीक्षा दानं तपस्तीर्थं ज्ञानं यागादिकाः क्रियाः ।\nमहिम्नः स्तव पाठस्य कलां नार्हन्ति षोडशीम् ॥ ३६ ॥","rom":"Deekshaa daanam tapasteertham jnaanam yaagaadikaah kriyaah |\nMahimnah stava paathasya kalaam naarhanti shodasheem || 36 ||"},{"kind":"verse","n":37,"dev":"कुसुमदशननामा सर्वगन्धर्वराजः\nशशिधरवरमौलेर्देवदेवस्य दासः ।\nस खलु निजमहिम्नो भ्रष्ट एवास्य रोषात्\nस्तवनमिदमकार्षीद्दिव्यदिव्यं महिम्नः ॥ ३७ ॥","rom":"Kusumadashananaamaa sarvagandharvaraajah\nShashidharavaramaulerdevadevasya daasah |\nSa khalu nijamahimno bhrashta evaasya roshaat\nStavanamidamakaarsheeddivyadivyam mahimnah || 37 ||"},{"kind":"verse","n":38,"dev":"सुरवरमुनिपूज्यं स्वर्गमोक्षैकहेतुं\nपठति यदि मनुष्यः प्राञ्जलिर्नान्यचेताः ।\nव्रजति शिवसमीपं किन्नरैः स्तूयमानः\nस्तवनमिदममोघं पुष्पदन्तप्रणीतम् ॥ ३८ ॥","rom":"Suravaramunipoojyam svargamokshaikahetum\nPathati yadi manushyah praanjalirnaanyachetaah |\nVrajati shivasameepam kinnaraih stooyamaanah\nStavanamidamamogham pushpadantapraneetam || 38 ||"},{"kind":"verse","n":39,"dev":"आसमाप्तमिदं स्तोत्रं पुण्यं गन्धर्वभाषितम् ।\nअनौपम्यं मनोहारि शिवमीश्वरवर्णनम् ॥ ३९ ॥","rom":"Aasamaaptamidam stotram punyam gandharvabhaashitam |\nAnaupamyam manohaari shivameeshvaravarnanam || 39 ||"},{"kind":"verse","n":40,"dev":"इत्येषा वाङ्मयी पूजा श्रीमच्छङ्करपादयोः ।\nअर्पिता तेन देवेशः प्रीयतां मे सदाशिवः ॥ ४० ॥","rom":"Ityeshaa vaanmayee poojaa shreemachchhankarapaadayoh |\nArpitaa tena deveshah preeyataam me sadaashivah || 40 ||"},{"kind":"verse","n":41,"dev":"तव तत्त्वं न जानामि कीदृशोऽसि महेश्वर ।\nयादृशोऽसि महादेव तादृशाय नमो नमः ॥ ४१ ॥","rom":"Tava tattvam na jaanaami keedrusho'si maheshvara |\nYaadrusho'si mahaadeva taadrushaaya namo namah || 41 ||"},{"kind":"verse","n":42,"dev":"एककालं द्विकालं वा त्रिकालं यः पठेन्नरः ।\nसर्वपापविनिर्मुक्तः शिवलोके महीयते ॥ ४२ ॥","rom":"Ekakaalam dvikaalam vaa trikaalam yah pathennarah |\nSarvapaapavinirmuktah shivaloke maheeyate || 42 ||"},{"kind":"verse","n":43,"dev":"श्रीपुष्पदन्तमुखपङ्कजनिर्गतेन\nस्तोत्रेण किल्बिषहरेण हरप्रियेण ।\nकण्ठस्थितेन पठितेन समाहितेन\nसुप्रीणितो भवति भूतपतिर्महेशः ॥ ४३ ॥","rom":"Shreepushpadantamukhapankajanirgatena\nStotrena kilbishaharena harapriyena |\nKanthasthitena pathitena samaahitena\nSupreenito bhavati bhootapatirmaheshah || 43 ||"},{"kind":"heading","dev":"॥ इति श्रीपुष्पदन्त विरचितं श्री शिव महिम्नः स्तोत्रम् ॥","rom":"|| Iti shreepushpadanta virachitam shree shiva mahimnah stotram ||"}],"verified":false,"url":"https://pocketpothi.com/texts/shiva-mahimna-stotra","appUrl":"https://pocketpothi.com/read?t=shiva-mahimna-stotra","shareUrl":"https://pocketpothi.com/p/4n"}