# Navagraha Stotra · नवग्रहस्तोत्रम्

- Type: Stotra
- Language: Sanskrit
- Verses: 12
- Verified: yes
- Read in the app: https://pocketpothi.com/read?t=navagraha-stotra
- Share link: https://pocketpothi.com/p/au
- Page: https://pocketpothi.com/texts/navagraha-stotra

## Text (Devanagari, with simple Roman spelling below each verse)

जपाकुसुमसंकाशं काश्यपेयं महाद्युतिम् ।  
तमोऽरिं सर्वपापघ्नं प्रणतोऽस्मि दिवाकरम् ॥ १ ॥  

_Japaakusumasankaasham kaashyapeyam mahaadyutim | / Tamo'rim sarvapaapaghnam pranato'smi divaakaram || 1 ||_

दधिशङ्खतुषाराभं क्षीरोदार्णवसंभवम् ।  
नमामि शशिनं सोमं शम्भोर्मुकुटभूषणम् ॥ २ ॥  

_Dadhishankhatushaaraabham ksheerodaarnavasambhavam | / Namaami shashinam somam shambhormukutabhooshanam || 2 ||_

धरणीगर्भसंभूतं विद्युत्कान्तिसमप्रभम् ।  
कुमारं शक्तिहस्तं तं मङ्गलं प्रणमाम्यहम् ॥ ३ ॥  

_Dharaneegarbhasambhootam vidyutkaantisamaprabham | / Kumaaram shaktihastam tam mangalam pranamaamyaham || 3 ||_

प्रियङ्गुकलिकाश्यामं रूपेणाप्रतिमं बुधम् ।  
सौम्यं सौम्यगुणोपेतं तं बुधं प्रणमाम्यहम् ॥ ४ ॥  

_Priyangukalikaashyaamam roopenaapratimam budham | / Saumyam saumyagunopetam tam budham pranamaamyaham || 4 ||_

देवानां च ऋषीणां च गुरुं काञ्चनसंनिभम् ।  
बुद्धिभूतं त्रिलोकेशं तं नमामि बृहस्पतिम् ॥ ५ ॥  

_Devaanaam cha rusheenaam cha gurum kaanchanasannibham | / Buddhibhootam trilokesham tam namaami bruhaspatim || 5 ||_

हिमकुन्दमृणालाभं दैत्यानां परमं गुरुम् ।  
सर्वशास्त्रप्रवक्तारं भार्गवं प्रणमाम्यहम् ॥ ६ ॥  

_Himakundamrunaalaabham daityaanaam paramam gurum | / Sarvashaastrapravaktaaram bhaargavam pranamaamyaham || 6 ||_

नीलांजनसमाभासं रविपुत्रं यमाग्रजम् ।  
छायामार्तण्डसंभूतं तं नमामि शनैश्चरम् ॥ ७ ॥  

_Neelaanjanasamaabhaasam raviputram yamaagrajam | / Chhaayaamaartandasambhootam tam namaami shanaishcharam || 7 ||_

अर्धकायं महावीर्यं चन्द्रादित्यविमर्दनम् ।  
सिंहिकागर्भसंभूतं तं राहुं प्रणमाम्यहम् ॥ ८ ॥  

_Ardhakaayam mahaaveeryam chandraadityavimardanam | / Sinhikaagarbhasambhootam tam raahum pranamaamyaham || 8 ||_

पलाशपुष्पसंकाशं तारकाग्रहमस्तकम् ।  
रौद्रं रौद्रात्मकं घोरं तं केतुं प्रणमाम्यहम् ॥ ९ ॥  

_Palaashapushpasankaasham taarakaagrahamastakam | / Raudram raudraatmakam ghoram tam ketum pranamaamyaham || 9 ||_

इति व्यासमुखोद्गीतं यः पठेत्सुसमाहितः ।  
दिवा वा यदि वा रात्रौ विघ्नशान्तिर्भविष्यति ॥ १० ॥  

_Iti vyaasamukhodgeetam yah pathetsusamaahitah | / Divaa vaa yadi vaa raatrau vighnashaantirbhavishyati || 10 ||_

नरनारीनृपाणां च भवेद्दुःस्वप्ननाशनम् ।  
ऐश्वर्यमतुलं तेषामारोग्यं पुष्टिवर्धनम् ॥ ११ ॥  

_Naranaareenrupaanaam cha bhavedduhsvapnanaashanam | / Aishvaryamatulam teshaamaarogyam pushtivardhanam || 11 ||_

ग्रहनक्षत्रजाः पीडास्तस्कराग्निसमुद्भवाः ।  
ताः सर्वाः प्रशमं यान्ति व्यासो ब्रूते न संशयः ॥ १२ ॥  

_Grahanakshatrajaah peedaastaskaraagnisamudbhavaah | / Taah sarvaah prashamam yaanti vyaaso broote na sanshayah || 12 ||_

### ॥ इति श्रीव्यासविरचितं नवग्रहस्तोत्रं सम्पूर्णम् ॥
_|| Iti shreevyaasavirachitam navagrahastotram sampoornam ||_