श्रीललितासहस्रनामस्तोत्रम्

ध्यानम्⁠ ⁠। सिन्दूरारुणविग्रहां त्रिणयनां माणिक्यमौलिस्फुर- -त्तारानायकशेखरां स्मितमुखीमापीनवक्षोरुहाम्⁠ ⁠। पाणिभ्यामलिपूर्णरत्नचषकं रक्तोत्पलं बिभ्रतीं सौम्यां रत्नघटस्थरक्तचरणां ध्यायेत्परामम्बिकाम्⁠ ⁠॥

Dhyaanam | Sindooraarunavigrahaam trinayanaam maanikyamaulisphura- -ttaaraanaayakashekharaam smitamukheemaapeenavakshoruhaam | Paanibhyaamalipoornaratnachashakam raktotpalam bibhrateem Saumyaam ratnaghatastharaktacharanaam dhyaayetparaamambikaam ||

अरुणां करुणातरङ्गिताक्षीं धृतपाशाङ्कुशपुष्पबाणचापाम्⁠ ⁠। अणिमादिभिरावृतां मयूखैः अहमित्येव विभावये भवानीम्⁠ ⁠॥

Arunaam karunaatarangitaaksheem Dhrutapaashaankushapushpabaanachaapaam | Animaadibhiraavrutaam mayookhaih Ahamityeva vibhaavaye bhavaaneem ||

ध्यायेत्पद्मासनस्थां विकसितवदनां पद्मपत्रायताक्षीं हेमाभां पीतवस्त्रां करकलितलसद्धेमपद्मां वराङ्गीम्⁠ ⁠। सर्वालङ्कारयुक्तां सततमभयदां भक्तनम्रां भवानीं श्रीविद्यां शान्तमूर्तिं सकलसुरनुतां सर्वसम्पत्प्रदात्रीम्⁠ ⁠॥

Dhyaayetpadmaasanasthaam vikasitavadanaam padmapatraayataaksheem Hemaabhaam peetavastraam karakalitalasaddhemapadmaam varaangeem | Sarvaalankaarayuktaam satatamabhayadaam bhaktanamraam bhavaaneem Shreevidyaam shaantamoortim sakalasuranutaam sarvasampatpradaatreem ||

सकुङ्कुमविलेपनामलिकचुम्बिकस्तूरिकां समन्दहसितेक्षणां सशरचापपाशाङ्कुशाम्⁠ ⁠। अशेषजनमोहिनीमरुणमाल्यभूषाम्बरां जपाकुसुमभासुरां जपविधौ स्मरेदम्बिकाम्⁠ ⁠॥

Sakunkumavilepanaamalikachumbikastoorikaam Samandahasitekshanaam sasharachaapapaashaankushaam | Asheshajanamohineemarunamaalyabhooshaambaraam Japaakusumabhaasuraam japavidhau smaredambikaam ||

श्रीमाता श्रीमहाराज्ञी श्रीमत्सिंहासनेश्वरी⁠ ⁠। चिदग्निकुण्डसम्भूता देवकार्यसमुद्यता⁠ ⁠॥⁠ ⁠१⁠ ⁠॥

Shreemaataa shreemahaaraajnee shreematsinhaasaneshvaree | Chidagnikundasambhootaa devakaaryasamudyataa || 1 ||

उद्यद्भानुसहस्राभा चतुर्बाहुसमन्विता⁠ ⁠। रागस्वरूपपाशाढ्या क्रोधाकाराङ्कुशोज्ज्वला⁠ ⁠॥⁠ ⁠२⁠ ⁠॥

Udyadbhaanusahasraabhaa chaturbaahusamanvitaa | Raagasvaroopapaashaadhyaa krodhaakaaraankushojjvalaa || 2 ||

मनोरूपेक्षुकोदण्डा पञ्चतन्मात्रसायका⁠ ⁠। निजारुणप्रभापूरमज्जद्ब्रह्माण्डमण्डला⁠ ⁠॥⁠ ⁠३⁠ ⁠॥

Manoroopekshukodandaa panchatanmaatrasaayakaa | Nijaarunaprabhaapooramajjadbrahmaandamandalaa || 3 ||

चम्पकाशोकपुन्नागसौगन्धिकलसत्कचा⁠ ⁠। कुरुविन्दमणिश्रेणीकनत्कोटीरमण्डिता⁠ ⁠॥⁠ ⁠४⁠ ⁠॥

Champakaashokapunnaagasaugandhikalasatkachaa | Kuruvindamanishreneekanatkoteeramanditaa || 4 ||

अष्टमीचन्द्रविभ्राजदलिकस्थलशोभिता⁠ ⁠। मुखचन्द्रकलङ्काभमृगनाभिविशेषका⁠ ⁠॥⁠ ⁠५⁠ ⁠॥

Ashtameechandravibhraajadalikasthalashobhitaa | Mukhachandrakalankaabhamruganaabhivisheshakaa || 5 ||

वदनस्मरमाङ्गल्यगृहतोरणचिल्लिका⁠ ⁠। वक्त्रलक्ष्मीपरीवाहचलन्मीनाभलोचना⁠ ⁠॥⁠ ⁠६⁠ ⁠॥

Vadanasmaramaangalyagruhatoranachillikaa | Vaktralakshmeepareevaahachalanmeenaabhalochanaa || 6 ||

नवचम्पकपुष्पाभनासादण्डविराजिता⁠ ⁠। ताराकान्तितिरस्कारिनासाभरणभासुरा⁠ ⁠॥⁠ ⁠७⁠ ⁠॥

Navachampakapushpaabhanaasaadandaviraajitaa | Taaraakaantitiraskaarinaasaabharanabhaasuraa || 7 ||

कदम्बमञ्जरीक्लुप्तकर्णपूरमनोहरा⁠ ⁠। ताटङ्कयुगलीभूततपनोडुपमण्डला⁠ ⁠॥⁠ ⁠८⁠ ⁠॥

Kadambamanjareekluptakarnapooramanoharaa | Taatankayugaleebhootatapanodupamandalaa || 8 ||

पद्मरागशिलादर्शपरिभाविकपोलभूः⁠ ⁠। नवविद्रुमबिम्बश्रीन्यक्कारिरदनच्छदा⁠ ⁠॥⁠ ⁠९⁠ ⁠॥

Padmaraagashilaadarshaparibhaavikapolabhooh | Navavidrumabimbashreenyakkaariradanachchhadaa || 9 ||

शुद्धविद्याङ्कुराकारद्विजपङ्क्तिद्वयोज्ज्वला⁠ ⁠। कर्पूरवीटिकामोदसमाकर्षद्दिगन्तरा⁠ ⁠॥⁠ ⁠१०⁠ ⁠॥

Shuddhavidyaankuraakaaradvijapanktidvayojjvalaa | Karpooraveetikaamodasamaakarshaddigantaraa || 10 ||

निजसल्लापमाधुर्यविनिर्भर्त्सितकच्छपी⁠ ⁠। मन्दस्मितप्रभापूरमज्जत्कामेशमानसा⁠ ⁠॥⁠ ⁠११⁠ ⁠॥

Nijasallaapamaadhuryavinirbhartsitakachchhapee | Mandasmitaprabhaapooramajjatkaameshamaanasaa || 11 ||

अनाकलितसादृश्यचुबुकश्रीविराजिता⁠ ⁠। कामेशबद्धमाङ्गल्यसूत्रशोभितकन्धरा⁠ ⁠॥⁠ ⁠१२⁠ ⁠॥

Anaakalitasaadrushyachubukashreeviraajitaa | Kaameshabaddhamaangalyasootrashobhitakandharaa || 12 ||

कनकाङ्गदकेयूरकमनीयभुजान्विता⁠ ⁠। रत्नग्रैवेयचिन्ताकलोलमुक्ताफलान्विता⁠ ⁠॥⁠ ⁠१३⁠ ⁠॥

Kanakaangadakeyoorakamaneeyabhujaanvitaa | Ratnagraiveyachintaakalolamuktaaphalaanvitaa || 13 ||

कामेश्वरप्रेमरत्नमणिप्रतिपणस्तनी⁠ ⁠। नाभ्यालवालरोमालिलताफलकुचद्वयी⁠ ⁠॥⁠ ⁠१४⁠ ⁠॥

Kaameshvarapremaratnamanipratipanastanee | Naabhyaalavaalaromaalilataaphalakuchadvayee || 14 ||

लक्ष्यरोमलताधारतासमुन्नेयमध्यमा⁠ ⁠। स्तनभारदलन्मध्यपट्‍टबन्धवलित्रया⁠ ⁠॥⁠ ⁠१५⁠ ⁠॥

Lakshyaromalataadhaarataasamunneyamadhyamaa | Stanabhaaradalanmadhyapat‍tabandhavalitrayaa || 15 ||

अरुणारुणकौसुम्भवस्त्रभास्वत्कटीतटी⁠ ⁠। रत्नकिङ्किणिकारम्यरशनादामभूषिता⁠ ⁠॥⁠ ⁠१६⁠ ⁠॥

Arunaarunakausumbhavastrabhaasvatkateetatee | Ratnakinkinikaaramyarashanaadaamabhooshitaa || 16 ||

कामेशज्ञातसौभाग्यमार्दवोरुद्वयान्विता⁠ ⁠। माणिक्यमकुटाकारजानुद्वयविराजिता⁠ ⁠॥⁠ ⁠१७⁠ ⁠॥

Kaameshajnaatasaubhaagyamaardavorudvayaanvitaa | Maanikyamakutaakaarajaanudvayaviraajitaa || 17 ||

इन्द्रगोपपरिक्षिप्तस्मरतूणाभजङ्घिका⁠ ⁠। गूढगुल्फा कूर्मपृष्ठजयिष्णुप्रपदान्विता⁠ ⁠॥⁠ ⁠१८⁠ ⁠॥

Indragopaparikshiptasmaratoonaabhajanghikaa | Goodhagulphaa koormaprushthajayishnuprapadaanvitaa || 18 ||

नखदीधितिसञ्छन्ननमज्जनतमोगुणा⁠ ⁠। पदद्वयप्रभाजालपराकृतसरोरुहा⁠ ⁠॥⁠ ⁠१९⁠ ⁠॥

Nakhadeedhitisanchhannanamajjanatamogunaa | Padadvayaprabhaajaalaparaakrutasaroruhaa || 19 ||

शिञ्जानमणिमञ्जीरमण्डितश्रीपदाम्बुजा⁠ ⁠। मरालीमन्दगमना महालावण्यशेवधिः⁠ ⁠॥⁠ ⁠२०⁠ ⁠॥

Shinjaanamanimanjeeramanditashreepadaambujaa | Maraaleemandagamanaa mahaalaavanyashevadhih || 20 ||

सर्वारुणाऽनवद्याङ्गी सर्वाभरणभूषिता⁠ ⁠। शिवकामेश्वराङ्कस्था शिवा स्वाधीनवल्लभा⁠ ⁠॥⁠ ⁠२१⁠ ⁠॥

Sarvaarunaa'navadyaangee sarvaabharanabhooshitaa | Shivakaameshvaraankasthaa shivaa svaadheenavallabhaa || 21 ||

सुमेरुमध्यशृङ्गस्था श्रीमन्नगरनायिका⁠ ⁠। चिन्तामणिगृहान्तःस्था पञ्चब्रह्मासनस्थिता⁠ ⁠॥⁠ ⁠२२⁠ ⁠॥

Sumerumadhyashrungasthaa shreemannagaranaayikaa | Chintaamanigruhaantahsthaa panchabrahmaasanasthitaa || 22 ||

महापद्माटवीसंस्था कदम्बवनवासिनी⁠ ⁠। सुधासागरमध्यस्था कामाक्षी कामदायिनी⁠ ⁠॥⁠ ⁠२३⁠ ⁠॥

Mahaapadmaataveesansthaa kadambavanavaasinee | Sudhaasaagaramadhyasthaa kaamaakshee kaamadaayinee || 23 ||

देवर्षिगणसङ्घातस्तूयमानात्मवैभवा⁠ ⁠। भण्डासुरवधोद्युक्तशक्तिसेनासमन्विता⁠ ⁠॥⁠ ⁠२४⁠ ⁠॥

Devarshiganasanghaatastooyamaanaatmavaibhavaa | Bhandaasuravadhodyuktashaktisenaasamanvitaa || 24 ||

सम्पत्करीसमारूढसिन्धुरव्रजसेविता⁠ ⁠। अश्वारूढाधिष्ठिताश्वकोटिकोटिभिरावृता⁠ ⁠॥⁠ ⁠२५⁠ ⁠॥

Sampatkareesamaaroodhasindhuravrajasevitaa | Ashvaaroodhaadhishthitaashvakotikotibhiraavrutaa || 25 ||

चक्रराजरथारूढसर्वायुधपरिष्कृता⁠ ⁠। गेयचक्ररथारूढमन्त्रिणीपरिसेविता⁠ ⁠॥⁠ ⁠२६⁠ ⁠॥

Chakraraajarathaaroodhasarvaayudhaparishkrutaa | Geyachakrarathaaroodhamantrineeparisevitaa || 26 ||

किरिचक्ररथारूढदण्डनाथापुरस्कृता⁠ ⁠। ज्वालामालिनिकाक्षिप्तवह्निप्राकारमध्यगा⁠ ⁠॥⁠ ⁠२७⁠ ⁠॥

Kirichakrarathaaroodhadandanaathaapuraskrutaa | Jvaalaamaalinikaakshiptavahnipraakaaramadhyagaa || 27 ||

भण्डसैन्यवधोद्युक्तशक्तिविक्रमहर्षिता⁠ ⁠। नित्यापराक्रमाटोपनिरीक्षणसमुत्सुका⁠ ⁠॥⁠ ⁠२८⁠ ⁠॥

Bhandasainyavadhodyuktashaktivikramaharshitaa | Nityaaparaakramaatopanireekshanasamutsukaa || 28 ||

भण्डपुत्रवधोद्युक्तबालाविक्रमनन्दिता⁠ ⁠। मन्त्रिण्यम्बाविरचितविषङ्गवधतोषिता⁠ ⁠॥⁠ ⁠२९⁠ ⁠॥

Bhandaputravadhodyuktabaalaavikramananditaa | Mantrinyambaavirachitavishangavadhatoshitaa || 29 ||

विशुक्रप्राणहरणवाराहीवीर्यनन्दिता⁠ ⁠। कामेश्वरमुखालोककल्पितश्रीगणेश्वरा⁠ ⁠॥⁠ ⁠३०⁠ ⁠॥

Vishukrapraanaharanavaaraaheeveeryananditaa | Kaameshvaramukhaalokakalpitashreeganeshvaraa || 30 ||

महागणेशनिर्भिन्नविघ्नयन्त्रप्रहर्षिता⁠ ⁠। भण्डासुरेन्द्रनिर्मुक्तशस्त्रप्रत्यस्त्रवर्षिणी⁠ ⁠॥⁠ ⁠३१⁠ ⁠॥

Mahaaganeshanirbhinnavighnayantrapraharshitaa | Bhandaasurendranirmuktashastrapratyastravarshinee || 31 ||

कराङ्गुलिनखोत्पन्ननारायणदशाकृतिः⁠ ⁠। महापाशुपतास्त्राग्निनिर्दग्धासुरसैनिका⁠ ⁠॥⁠ ⁠३२⁠ ⁠॥

Karaangulinakhotpannanaaraayanadashaakrutih | Mahaapaashupataastraagninirdagdhaasurasainikaa || 32 ||

कामेश्वरास्त्रनिर्दग्धसभण्डासुरशून्यका⁠ ⁠। ब्रह्मोपेन्द्रमहेन्द्रादिदेवसंस्तुतवैभवा⁠ ⁠॥⁠ ⁠३३⁠ ⁠॥

Kaameshvaraastranirdagdhasabhandaasurashoonyakaa | Brahmopendramahendraadidevasanstutavaibhavaa || 33 ||

हरनेत्राग्निसन्दग्धकामसञ्जीवनौषधिः⁠ ⁠। श्रीमद्वाग्भवकूटैकस्वरूपमुखपङ्कजा⁠ ⁠॥⁠ ⁠३४⁠ ⁠॥

Haranetraagnisandagdhakaamasanjeevanaushadhih | Shreemadvaagbhavakootaikasvaroopamukhapankajaa || 34 ||

कण्ठाधःकटिपर्यन्तमध्यकूटस्वरूपिणी⁠ ⁠। शक्तिकूटैकतापन्नकट्यधोभागधारिणी⁠ ⁠॥⁠ ⁠३५⁠ ⁠॥

Kanthaadhahkatiparyantamadhyakootasvaroopinee | Shaktikootaikataapannakatyadhobhaagadhaarinee || 35 ||

मूलमन्त्रात्मिका मूलकूटत्रयकलेबरा⁠ ⁠। कुलामृतैकरसिका कुलसङ्केतपालिनी⁠ ⁠॥⁠ ⁠३६⁠ ⁠॥

Moolamantraatmikaa moolakootatrayakalebaraa | Kulaamrutaikarasikaa kulasanketapaalinee || 36 ||

कुलाङ्गना कुलान्तःस्था कौलिनी कुलयोगिनी⁠ ⁠। अकुला समयान्तःस्था समयाचारतत्परा⁠ ⁠॥⁠ ⁠३७⁠ ⁠॥

Kulaanganaa kulaantahsthaa kaulinee kulayoginee | Akulaa samayaantahsthaa samayaachaaratatparaa || 37 ||

मूलाधारैकनिलया ब्रह्मग्रन्थिविभेदिनी⁠ ⁠। मणिपूरान्तरुदिता विष्णुग्रन्थिविभेदिनी⁠ ⁠॥⁠ ⁠३८⁠ ⁠॥

Moolaadhaaraikanilayaa brahmagranthivibhedinee | Manipooraantaruditaa vishnugranthivibhedinee || 38 ||

आज्ञाचक्रान्तरालस्था रुद्रग्रन्थिविभेदिनी⁠ ⁠। सहस्राराम्बुजारूढा सुधासाराभिवर्षिणी⁠ ⁠॥⁠ ⁠३९⁠ ⁠॥

Aajnaachakraantaraalasthaa rudragranthivibhedinee | Sahasraaraambujaaroodhaa sudhaasaaraabhivarshinee || 39 ||

तटिल्लतासमरुचिः षट्चक्रोपरिसंस्थिता⁠ ⁠। महासक्तिः कुण्डलिनी बिसतन्तुतनीयसी⁠ ⁠॥⁠ ⁠४०⁠ ⁠॥

Tatillataasamaruchih shatchakroparisansthitaa | Mahaasaktih kundalinee bisatantutaneeyasee || 40 ||

भवानी भावनागम्या भवारण्यकुठारिका⁠ ⁠। भद्रप्रिया भद्रमूर्तिर्भक्तसौभाग्यदायिनी⁠ ⁠॥⁠ ⁠४१⁠ ⁠॥

Bhavaanee bhaavanaagamyaa bhavaaranyakuthaarikaa | Bhadrapriyaa bhadramoortirbhaktasaubhaagyadaayinee || 41 ||

भक्तिप्रिया भक्तिगम्या भक्तिवश्या भयापहा⁠ ⁠। शाम्भवी शारदाराध्या शर्वाणी शर्मदायिनी⁠ ⁠॥⁠ ⁠४२⁠ ⁠॥

Bhaktipriyaa bhaktigamyaa bhaktivashyaa bhayaapahaa | Shaambhavee shaaradaaraadhyaa sharvaanee sharmadaayinee || 42 ||

शाङ्करी श्रीकरी साध्वी शरच्चन्द्रनिभानना⁠ ⁠। शातोदरी शान्तिमती निराधारा निरञ्जना⁠ ⁠॥⁠ ⁠४३⁠ ⁠॥

Shaankaree shreekaree saadhvee sharachchandranibhaananaa | Shaatodaree shaantimatee niraadhaaraa niranjanaa || 43 ||

निर्लेपा निर्मला नित्या निराकारा निराकुला⁠ ⁠। निर्गुणा निष्कला शान्ता निष्कामा निरुपप्लवा⁠ ⁠॥⁠ ⁠४४⁠ ⁠॥

Nirlepaa nirmalaa nityaa niraakaaraa niraakulaa | Nirgunaa nishkalaa shaantaa nishkaamaa nirupaplavaa || 44 ||

नित्यमुक्ता निर्विकारा निष्प्रपञ्चा निराश्रया⁠ ⁠। नित्यशुद्धा नित्यबुद्धा निरवद्या निरन्तरा⁠ ⁠॥⁠ ⁠४५⁠ ⁠॥

Nityamuktaa nirvikaaraa nishprapanchaa niraashrayaa | Nityashuddhaa nityabuddhaa niravadyaa nirantaraa || 45 ||

निष्कारणा निष्कलङ्का निरुपाधिर्निरीश्वरा⁠ ⁠। नीरागा रागमथनी निर्मदा मदनाशिनी⁠ ⁠॥⁠ ⁠४६⁠ ⁠॥

Nishkaaranaa nishkalankaa nirupaadhirnireeshvaraa | Neeraagaa raagamathanee nirmadaa madanaashinee || 46 ||

निश्चिन्ता निरहङ्कारा निर्मोहा मोहनाशिनी⁠ ⁠। निर्ममा ममताहन्त्री निष्पापा पापनाशिनी⁠ ⁠॥⁠ ⁠४७⁠ ⁠॥

Nishchintaa nirahankaaraa nirmohaa mohanaashinee | Nirmamaa mamataahantree nishpaapaa paapanaashinee || 47 ||

निष्क्रोधा क्रोधशमनी निर्लोभा लोभनाशिनी⁠ ⁠। निःसंशया संशयघ्नी निर्भवा भवनाशिनी⁠ ⁠॥⁠ ⁠४८⁠ ⁠॥

Nishkrodhaa krodhashamanee nirlobhaa lobhanaashinee | Nihsanshayaa sanshayaghnee nirbhavaa bhavanaashinee || 48 ||

निर्विकल्पा निराबाधा निर्भेदा भेदनाशिनी⁠ ⁠। निर्नाशा मृत्युमथनी निष्क्रिया निष्परिग्रहा⁠ ⁠॥⁠ ⁠४९⁠ ⁠॥

Nirvikalpaa niraabaadhaa nirbhedaa bhedanaashinee | Nirnaashaa mrutyumathanee nishkriyaa nishparigrahaa || 49 ||

निस्तुला नीलचिकुरा निरपाया निरत्यया⁠ ⁠। दुर्लभा दुर्गमा दुर्गा दुःखहन्त्री सुखप्रदा⁠ ⁠॥⁠ ⁠५०⁠ ⁠॥

Nistulaa neelachikuraa nirapaayaa niratyayaa | Durlabhaa durgamaa durgaa duhkhahantree sukhapradaa || 50 ||

दुष्टदूरा दुराचारशमनी दोषवर्जिता⁠ ⁠। सर्वज्ञा सान्द्रकरुणा समानाधिकवर्जिता⁠ ⁠॥⁠ ⁠५१⁠ ⁠॥

Dushtadooraa duraachaarashamanee doshavarjitaa | Sarvajnaa saandrakarunaa samaanaadhikavarjitaa || 51 ||

सर्वशक्तिमयी सर्वमङ्गला सद्गतिप्रदा⁠ ⁠। सर्वेश्वरी सर्वमयी सर्वमन्त्रस्वरूपिणी⁠ ⁠॥⁠ ⁠५२⁠ ⁠॥

Sarvashaktimayee sarvamangalaa sadgatipradaa | Sarveshvaree sarvamayee sarvamantrasvaroopinee || 52 ||

सर्वयन्त्रात्मिका सर्वतन्त्ररूपा मनोन्मनी⁠ ⁠। माहेश्वरी महादेवी महालक्ष्मीर्मृडप्रिया⁠ ⁠॥⁠ ⁠५३⁠ ⁠॥

Sarvayantraatmikaa sarvatantraroopaa manonmanee | Maaheshvaree mahaadevee mahaalakshmeermrudapriyaa || 53 ||

महारूपा महापूज्या महापातकनाशिनी⁠ ⁠। महामाया महासत्त्वा महाशक्तिर्महारतिः⁠ ⁠॥⁠ ⁠५४⁠ ⁠॥

Mahaaroopaa mahaapoojyaa mahaapaatakanaashinee | Mahaamaayaa mahaasattvaa mahaashaktirmahaaratih || 54 ||

महाभोगा महैश्वर्या महावीर्या महाबला⁠ ⁠। महाबुद्धिर्महासिद्धिर्महायोगेश्वरेश्वरी⁠ ⁠॥⁠ ⁠५५⁠ ⁠॥

Mahaabhogaa mahaishvaryaa mahaaveeryaa mahaabalaa | Mahaabuddhirmahaasiddhirmahaayogeshvareshvaree || 55 ||

महातन्त्रा महामन्त्रा महायन्त्रा महासना⁠ ⁠। महायागक्रमाराध्या महाभैरवपूजिता⁠ ⁠॥⁠ ⁠५६⁠ ⁠॥

Mahaatantraa mahaamantraa mahaayantraa mahaasanaa | Mahaayaagakramaaraadhyaa mahaabhairavapoojitaa || 56 ||

महेश्वरमहाकल्पमहाताण्डवसाक्षिणी⁠ ⁠। महाकामेशमहिषी महात्रिपुरसुन्दरी⁠ ⁠॥⁠ ⁠५७⁠ ⁠॥

Maheshvaramahaakalpamahaataandavasaakshinee | Mahaakaameshamahishee mahaatripurasundaree || 57 ||

चतुःषष्ट्युपचाराढ्या चतुःषष्टिकलामयी⁠ ⁠। महाचतुःषष्टिकोटियोगिनीगणसेविता⁠ ⁠॥⁠ ⁠५८⁠ ⁠॥

Chatuhshashtyupachaaraadhyaa chatuhshashtikalaamayee | Mahaachatuhshashtikotiyogineeganasevitaa || 58 ||

मनुविद्या चन्द्रविद्या चन्द्रमण्डलमध्यगा⁠ ⁠। चारुरूपा चारुहासा चारुचन्द्रकलाधरा⁠ ⁠॥⁠ ⁠५९⁠ ⁠॥

Manuvidyaa chandravidyaa chandramandalamadhyagaa | Chaaruroopaa chaaruhaasaa chaaruchandrakalaadharaa || 59 ||

चराचरजगन्नाथा चक्रराजनिकेतना⁠ ⁠। पार्वती पद्मनयना पद्मरागसमप्रभा⁠ ⁠॥⁠ ⁠६०⁠ ⁠॥

Charaacharajagannaathaa chakraraajaniketanaa | Paarvatee padmanayanaa padmaraagasamaprabhaa || 60 ||

पञ्चप्रेतासनासीना पञ्चब्रह्मस्वरूपिणी⁠ ⁠। चिन्मयी परमानन्दा विज्ञानघनरूपिणी⁠ ⁠॥⁠ ⁠६१⁠ ⁠॥

Panchapretaasanaaseenaa panchabrahmasvaroopinee | Chinmayee paramaanandaa vijnaanaghanaroopinee || 61 ||

ध्यानध्यातृध्येयरूपा धर्माधर्मविवर्जिता⁠ ⁠। विश्वरूपा जागरिणी स्वपन्ती तैजसात्मिका⁠ ⁠॥⁠ ⁠६२⁠ ⁠॥

Dhyaanadhyaatrudhyeyaroopaa dharmaadharmavivarjitaa | Vishvaroopaa jaagarinee svapantee taijasaatmikaa || 62 ||

सुप्ता प्राज्ञात्मिका तुर्या सर्वावस्थाविवर्जिता⁠ ⁠। सृष्टिकर्त्री ब्रह्मरूपा गोप्त्री गोविन्दरूपिणी⁠ ⁠॥⁠ ⁠६३⁠ ⁠॥

Suptaa praajnaatmikaa turyaa sarvaavasthaavivarjitaa | Srushtikartree brahmaroopaa goptree govindaroopinee || 63 ||

संहारिणी रुद्ररूपा तिरोधानकरीश्वरी⁠ ⁠। सदाशिवानुग्रहदा पञ्चकृत्यपरायणा⁠ ⁠॥⁠ ⁠६४⁠ ⁠॥

Sanhaarinee rudraroopaa tirodhaanakareeshvaree | Sadaashivaanugrahadaa panchakrutyaparaayanaa || 64 ||

भानुमण्डलमध्यस्था भैरवी भगमालिनी⁠ ⁠। पद्मासना भगवती पद्मनाभसहोदरी⁠ ⁠॥⁠ ⁠६५⁠ ⁠॥

Bhaanumandalamadhyasthaa bhairavee bhagamaalinee | Padmaasanaa bhagavatee padmanaabhasahodaree || 65 ||

उन्मेषनिमिषोत्पन्नविपन्नभुवनावलिः⁠ ⁠। सहस्रशीर्षवदना सहस्राक्षी सहस्रपात्⁠ ⁠॥⁠ ⁠६६⁠ ⁠॥

Unmeshanimishotpannavipannabhuvanaavalih | Sahasrasheershavadanaa sahasraakshee sahasrapaat || 66 ||

आब्रह्मकीटजननी वर्णाश्रमविधायिनी⁠ ⁠। निजाज्ञारूपनिगमा पुण्यापुण्यफलप्रदा⁠ ⁠॥⁠ ⁠६७⁠ ⁠॥

Aabrahmakeetajananee varnaashramavidhaayinee | Nijaajnaaroopanigamaa punyaapunyaphalapradaa || 67 ||

श्रुतिसीमन्तसिन्दूरीकृतपादाब्जधूलिका⁠ ⁠। सकलागमसन्दोहशुक्तिसम्पुटमौक्तिका⁠ ⁠॥⁠ ⁠६८⁠ ⁠॥

Shrutiseemantasindooreekrutapaadaabjadhoolikaa | Sakalaagamasandohashuktisamputamauktikaa || 68 ||

पुरुषार्थप्रदा पूर्णा भोगिनी भुवनेश्वरी⁠ ⁠। अम्बिकाऽनादिनिधना हरिब्रह्मेन्द्रसेविता⁠ ⁠॥⁠ ⁠६९⁠ ⁠॥

Purushaarthapradaa poornaa bhoginee bhuvaneshvaree | Ambikaa'naadinidhanaa haribrahmendrasevitaa || 69 ||

नारायणी नादरूपा नामरूपविवर्जिता⁠ ⁠। ह्रीङ्कारी ह्रीमती हृद्या हेयोपादेयवर्जिता⁠ ⁠॥⁠ ⁠७०⁠ ⁠॥

Naaraayanee naadaroopaa naamaroopavivarjitaa | Hreenkaaree hreematee hrudyaa heyopaadeyavarjitaa || 70 ||

राजराजार्चिता राज्ञी रम्या राजीवलोचना⁠ ⁠। रञ्जनी रमणी रस्या रणत्किङ्किणिमेखला⁠ ⁠॥⁠ ⁠७१⁠ ⁠॥

Raajaraajaarchitaa raajnee ramyaa raajeevalochanaa | Ranjanee ramanee rasyaa ranatkinkinimekhalaa || 71 ||

रमा राकेन्दुवदना रतिरूपा रतिप्रिया⁠ ⁠। रक्षाकरी राक्षसघ्नी रामा रमणलम्पटा⁠ ⁠॥⁠ ⁠७२⁠ ⁠॥

Ramaa raakenduvadanaa ratiroopaa ratipriyaa | Rakshaakaree raakshasaghnee raamaa ramanalampataa || 72 ||

काम्या कामकलारूपा कदम्बकुसुमप्रिया⁠ ⁠। कल्याणी जगतीकन्दा करुणारससागरा⁠ ⁠॥⁠ ⁠७३⁠ ⁠॥

Kaamyaa kaamakalaaroopaa kadambakusumapriyaa | Kalyaanee jagateekandaa karunaarasasaagaraa || 73 ||

कलावती कलालापा कान्ता कादम्बरीप्रिया⁠ ⁠। वरदा वामनयना वारुणीमदविह्वला⁠ ⁠॥⁠ ⁠७४⁠ ⁠॥

Kalaavatee kalaalaapaa kaantaa kaadambareepriyaa | Varadaa vaamanayanaa vaaruneemadavihvalaa || 74 ||

विश्वाधिका वेदवेद्या विन्ध्याचलनिवासिनी⁠ ⁠। विधात्री वेदजननी विष्णुमाया विलासिनी⁠ ⁠॥⁠ ⁠७५⁠ ⁠॥

Vishvaadhikaa vedavedyaa vindhyaachalanivaasinee | Vidhaatree vedajananee vishnumaayaa vilaasinee || 75 ||

क्षेत्रस्वरूपा क्षेत्रेशी क्षेत्रक्षेत्रज्ञपालिनी⁠ ⁠। क्षयवृद्धिविनिर्मुक्ता क्षेत्रपालसमर्चिता⁠ ⁠॥⁠ ⁠७६⁠ ⁠॥

Kshetrasvaroopaa kshetreshee kshetrakshetrajnapaalinee | Kshayavruddhivinirmuktaa kshetrapaalasamarchitaa || 76 ||

विजया विमला वन्द्या वन्दारुजनवत्सला⁠ ⁠। वाग्वादिनी वामकेशी वह्निमण्डलवासिनी⁠ ⁠॥⁠ ⁠७७⁠ ⁠॥

Vijayaa vimalaa vandyaa vandaarujanavatsalaa | Vaagvaadinee vaamakeshee vahnimandalavaasinee || 77 ||

भक्तिमत्कल्पलतिका पशुपाशविमोचनी⁠ ⁠। संहृताशेषपाषण्डा सदाचारप्रवर्तिका⁠ ⁠॥⁠ ⁠७८⁠ ⁠॥

Bhaktimatkalpalatikaa pashupaashavimochanee | Sanhrutaasheshapaashandaa sadaachaarapravartikaa || 78 ||

तापत्रयाग्निसन्तप्तसमाह्लादनचन्द्रिका⁠ ⁠। तरुणी तापसाराध्या तनुमध्या तमोऽपहा⁠ ⁠॥⁠ ⁠७९⁠ ⁠॥

Taapatrayaagnisantaptasamaahlaadanachandrikaa | Tarunee taapasaaraadhyaa tanumadhyaa tamo'pahaa || 79 ||

चितिस्तत्पदलक्ष्यार्था चिदेकरसरूपिणी⁠ ⁠। स्वात्मानन्दलवीभूतब्रह्माद्यानन्दसन्ततिः⁠ ⁠॥⁠ ⁠८०⁠ ⁠॥

Chitistatpadalakshyaarthaa chidekarasaroopinee | Svaatmaanandalaveebhootabrahmaadyaanandasantatih || 80 ||

परा प्रत्यक्चितीरूपा पश्यन्ती परदेवता⁠ ⁠। मध्यमा वैखरीरूपा भक्तमानसहंसिका⁠ ⁠॥⁠ ⁠८१⁠ ⁠॥

Paraa pratyakchiteeroopaa pashyantee paradevataa | Madhyamaa vaikhareeroopaa bhaktamaanasahansikaa || 81 ||

कामेश्वरप्राणनाडी कृतज्ञा कामपूजिता⁠ ⁠। शृङ्गाररससम्पूर्णा जया जालन्धरस्थिता⁠ ⁠॥⁠ ⁠८२⁠ ⁠॥

Kaameshvarapraananaadee krutajnaa kaamapoojitaa | Shrungaararasasampoornaa jayaa jaalandharasthitaa || 82 ||

ओड्याणपीठनिलया बिन्दुमण्डलवासिनी⁠ ⁠। रहोयागक्रमाराध्या रहस्तर्पणतर्पिता⁠ ⁠॥⁠ ⁠८३⁠ ⁠॥

Odyaanapeethanilayaa bindumandalavaasinee | Rahoyaagakramaaraadhyaa rahastarpanatarpitaa || 83 ||

सद्यःप्रसादिनी विश्वसाक्षिणी साक्षिवर्जिता⁠ ⁠। षडङ्गदेवतायुक्ता षाड्गुण्यपरिपूरिता⁠ ⁠॥⁠ ⁠८४⁠ ⁠॥

Sadyahprasaadinee vishvasaakshinee saakshivarjitaa | Shadangadevataayuktaa shaadgunyaparipooritaa || 84 ||

नित्यक्लिन्ना निरुपमा निर्वाणसुखदायिनी⁠ ⁠। नित्याषोडशिकारूपा श्रीकण्ठार्धशरीरिणी⁠ ⁠॥⁠ ⁠८५⁠ ⁠॥

Nityaklinnaa nirupamaa nirvaanasukhadaayinee | Nityaashodashikaaroopaa shreekanthaardhashareerinee || 85 ||

प्रभावती प्रभारूपा प्रसिद्धा परमेश्वरी⁠ ⁠। मूलप्रकृतिरव्यक्ता व्यक्ताव्यक्तस्वरूपिणी⁠ ⁠॥⁠ ⁠८६⁠ ⁠॥

Prabhaavatee prabhaaroopaa prasiddhaa parameshvaree | Moolaprakrutiravyaktaa vyaktaavyaktasvaroopinee || 86 ||

व्यापिनी विविधाकारा विद्याऽविद्यास्वरूपिणी⁠ ⁠। महाकामेशनयनकुमुदाह्लादकौमुदी⁠ ⁠॥⁠ ⁠८७⁠ ⁠॥

Vyaapinee vividhaakaaraa vidyaa'vidyaasvaroopinee | Mahaakaameshanayanakumudaahlaadakaumudee || 87 ||

भक्तहार्दतमोभेदभानुमद्भानुसन्ततिः⁠ ⁠। शिवदूती शिवाराध्या शिवमूर्तिः शिवङ्करी⁠ ⁠॥⁠ ⁠८८⁠ ⁠॥

Bhaktahaardatamobhedabhaanumadbhaanusantatih | Shivadootee shivaaraadhyaa shivamoortih shivankaree || 88 ||

शिवप्रिया शिवपरा शिष्टेष्टा शिष्टपूजिता⁠ ⁠। अप्रमेया स्वप्रकाशा मनोवाचामगोचरा⁠ ⁠॥⁠ ⁠८९⁠ ⁠॥

Shivapriyaa shivaparaa shishteshtaa shishtapoojitaa | Aprameyaa svaprakaashaa manovaachaamagocharaa || 89 ||

चिच्छक्तिश्चेतनारूपा जडशक्तिर्जडात्मिका⁠ ⁠। गायत्री व्याहृतिः सन्ध्या द्विजबृन्दनिषेविता⁠ ⁠॥⁠ ⁠९०⁠ ⁠॥

Chichchhaktishchetanaaroopaa jadashaktirjadaatmikaa | Gaayatree vyaahrutih sandhyaa dvijabrundanishevitaa || 90 ||

तत्त्वासना तत्त्वमयी पञ्चकोशान्तरस्थिता⁠ ⁠। निःसीममहिमा नित्ययौवना मदशालिनी⁠ ⁠॥⁠ ⁠९१⁠ ⁠॥

Tattvaasanaa tattvamayee panchakoshaantarasthitaa | Nihseemamahimaa nityayauvanaa madashaalinee || 91 ||

मदघूर्णितरक्ताक्षी मदपाटलगण्डभूः⁠ ⁠। चन्दनद्रवदिग्धाङ्गी चाम्पेयकुसुमप्रिया⁠ ⁠॥⁠ ⁠९२⁠ ⁠॥

Madaghoornitaraktaakshee madapaatalagandabhooh | Chandanadravadigdhaangee chaampeyakusumapriyaa || 92 ||

कुशला कोमलाकारा कुरुकुल्ला कुलेश्वरी⁠ ⁠। कुलकुण्डालया कौलमार्गतत्परसेविता⁠ ⁠॥⁠ ⁠९३⁠ ⁠॥

Kushalaa komalaakaaraa kurukullaa kuleshvaree | Kulakundaalayaa kaulamaargatatparasevitaa || 93 ||

कुमारगणनाथाम्बा तुष्टिः पुष्टिर्मतिर्धृतिः⁠ ⁠। शान्तिः स्वस्तिमती कान्तिर्नन्दिनी विघ्ननाशिनी⁠ ⁠॥⁠ ⁠९४⁠ ⁠॥

Kumaaragananaathaambaa tushtih pushtirmatirdhrutih | Shaantih svastimatee kaantirnandinee vighnanaashinee || 94 ||

तेजोवती त्रिनयना लोलाक्षीकामरूपिणी⁠ ⁠। मालिनी हंसिनी माता मलयाचलवासिनी⁠ ⁠॥⁠ ⁠९५⁠ ⁠॥

Tejovatee trinayanaa lolaaksheekaamaroopinee | Maalinee hansinee maataa malayaachalavaasinee || 95 ||

सुमुखी नलिनी सुभ्रूः शोभना सुरनायिका⁠ ⁠। कालकण्ठी कान्तिमती क्षोभिणी सूक्ष्मरूपिणी⁠ ⁠॥⁠ ⁠९६⁠ ⁠॥

Sumukhee nalinee subhrooh shobhanaa suranaayikaa | Kaalakanthee kaantimatee kshobhinee sookshmaroopinee || 96 ||

वज्रेश्वरी वामदेवी वयोऽवस्थाविवर्जिता⁠ ⁠। सिद्धेश्वरी सिद्धविद्या सिद्धमाता यशस्विनी⁠ ⁠॥⁠ ⁠९७⁠ ⁠॥

Vajreshvaree vaamadevee vayo'vasthaavivarjitaa | Siddheshvaree siddhavidyaa siddhamaataa yashasvinee || 97 ||

विशुद्धिचक्रनिलयाऽऽरक्तवर्णा त्रिलोचना⁠ ⁠। खट्वाङ्गादिप्रहरणा वदनैकसमन्विता⁠ ⁠॥⁠ ⁠९८⁠ ⁠॥

Vishuddhichakranilayaa''raktavarnaa trilochanaa | Khatvaangaadipraharanaa vadanaikasamanvitaa || 98 ||

पायसान्नप्रिया त्वक्‍स्था पशुलोकभयङ्करी⁠ ⁠। अमृतादिमहाशक्तिसंवृता डाकिनीश्वरी⁠ ⁠॥⁠ ⁠९९⁠ ⁠॥

Paayasaannapriyaa tvak‍sthaa pashulokabhayankaree | Amrutaadimahaashaktisanvrutaa daakineeshvaree || 99 ||

अनाहताब्जनिलया श्यामाभा वदनद्वया⁠ ⁠। दंष्ट्रोज्ज्वलाऽक्षमालादिधरा रुधिरसंस्थिता⁠ ⁠॥⁠ ⁠१००⁠ ⁠॥

Anaahataabjanilayaa shyaamaabhaa vadanadvayaa | Danshtrojjvalaa'kshamaalaadidharaa rudhirasansthitaa || 100 ||

कालरात्र्यादिशक्त्यौघवृता स्निग्धौदनप्रिया⁠ ⁠। महावीरेन्द्रवरदा राकिण्यम्बास्वरूपिणी⁠ ⁠॥⁠ ⁠१०१⁠ ⁠॥

Kaalaraatryaadishaktyaughavrutaa snigdhaudanapriyaa | Mahaaveerendravaradaa raakinyambaasvaroopinee || 101 ||

मणिपूराब्जनिलया वदनत्रयसम्युता⁠ ⁠। वज्रादिकायुधोपेता डामर्यादिभिरावृता⁠ ⁠॥⁠ ⁠१०२⁠ ⁠॥

Manipooraabjanilayaa vadanatrayasamyutaa | Vajraadikaayudhopetaa daamaryaadibhiraavrutaa || 102 ||

रक्तवर्णा मांसनिष्ठा गुडान्नप्रीतमानसा⁠ ⁠। समस्तभक्तसुखदा लाकिन्यम्बास्वरूपिणी⁠ ⁠॥⁠ ⁠१०३⁠ ⁠॥

Raktavarnaa maansanishthaa gudaannapreetamaanasaa | Samastabhaktasukhadaa laakinyambaasvaroopinee || 103 ||

स्वाधिष्ठानाम्बुजगता चतुर्वक्त्रमनोहरा⁠ ⁠। शूलाद्यायुधसम्पन्ना पीतवर्णाऽतिगर्विता⁠ ⁠॥⁠ ⁠१०४⁠ ⁠॥

Svaadhishthaanaambujagataa chaturvaktramanoharaa | Shoolaadyaayudhasampannaa peetavarnaa'tigarvitaa || 104 ||

मेदोनिष्ठा मधुप्रीता बन्धिन्यादिसमन्विता⁠ ⁠। दध्यन्नासक्तहृदया काकिनीरूपधारिणी⁠ ⁠॥⁠ ⁠१०५⁠ ⁠॥

Medonishthaa madhupreetaa bandhinyaadisamanvitaa | Dadhyannaasaktahrudayaa kaakineeroopadhaarinee || 105 ||

मूलाधाराम्बुजारूढा पञ्चवक्त्राऽस्थिसंस्थिता⁠ ⁠। अङ्कुशादिप्रहरणा वरदादिनिषेविता⁠ ⁠॥⁠ ⁠१०६⁠ ⁠॥

Moolaadhaaraambujaaroodhaa panchavaktraa'sthisansthitaa | Ankushaadipraharanaa varadaadinishevitaa || 106 ||

मुद्गौदनासक्तचित्ता साकिन्यम्बास्वरूपिणी⁠ ⁠। आज्ञाचक्राब्जनिलया शुक्लवर्णा षडानना⁠ ⁠॥⁠ ⁠१०७⁠ ⁠॥

Mudgaudanaasaktachittaa saakinyambaasvaroopinee | Aajnaachakraabjanilayaa shuklavarnaa shadaananaa || 107 ||

मज्जासंस्था हंसवतीमुख्यशक्तिसमन्विता⁠ ⁠। हरिद्रान्नैकरसिका हाकिनीरूपधारिणी⁠ ⁠॥⁠ ⁠१०८⁠ ⁠॥

Majjaasansthaa hansavateemukhyashaktisamanvitaa | Haridraannaikarasikaa haakineeroopadhaarinee || 108 ||

सहस्रदलपद्मस्था सर्ववर्णोपशोभिता⁠ ⁠। सर्वायुधधरा शुक्लसंस्थिता सर्वतोमुखी⁠ ⁠॥⁠ ⁠१०९⁠ ⁠॥

Sahasradalapadmasthaa sarvavarnopashobhitaa | Sarvaayudhadharaa shuklasansthitaa sarvatomukhee || 109 ||

सर्वौदनप्रीतचित्ता याकिन्यम्बास्वरूपिणी⁠ ⁠। स्वाहा स्वधाऽमतिर्मेधा श्रुतिः स्मृतिरनुत्तमा⁠ ⁠॥⁠ ⁠११०⁠ ⁠॥

Sarvaudanapreetachittaa yaakinyambaasvaroopinee | Svaahaa svadhaa'matirmedhaa shrutih smrutiranuttamaa || 110 ||

पुण्यकीर्तिः पुण्यलभ्या पुण्यश्रवणकीर्तना⁠ ⁠। पुलोमजार्चिता बन्धमोचनी बन्धुरालका⁠ ⁠॥⁠ ⁠१११⁠ ⁠॥

Punyakeertih punyalabhyaa punyashravanakeertanaa | Pulomajaarchitaa bandhamochanee bandhuraalakaa || 111 ||

विमर्शरूपिणी विद्या वियदादिजगत्प्रसूः⁠ ⁠। सर्वव्याधिप्रशमनी सर्वमृत्युनिवारिणी⁠ ⁠॥⁠ ⁠११२⁠ ⁠॥

Vimarsharoopinee vidyaa viyadaadijagatprasooh | Sarvavyaadhiprashamanee sarvamrutyunivaarinee || 112 ||

अग्रगण्याऽचिन्त्यरूपा कलिकल्मषनाशिनी⁠ ⁠। कात्यायनी कालहन्त्री कमलाक्षनिषेविता⁠ ⁠॥⁠ ⁠११३⁠ ⁠॥

Agraganyaa'chintyaroopaa kalikalmashanaashinee | Kaatyaayanee kaalahantree kamalaakshanishevitaa || 113 ||

ताम्बूलपूरितमुखी दाडिमीकुसुमप्रभा⁠ ⁠। मृगाक्षी मोहिनी मुख्या मृडानी मित्ररूपिणी⁠ ⁠॥⁠ ⁠११४⁠ ⁠॥

Taamboolapooritamukhee daadimeekusumaprabhaa | Mrugaakshee mohinee mukhyaa mrudaanee mitraroopinee || 114 ||

नित्यतृप्ता भक्तनिधिर्नियन्त्री निखिलेश्वरी⁠ ⁠। मैत्र्यादिवासनालभ्या महाप्रलयसाक्षिणी⁠ ⁠॥⁠ ⁠११५⁠ ⁠॥

Nityatruptaa bhaktanidhirniyantree nikhileshvaree | Maitryaadivaasanaalabhyaa mahaapralayasaakshinee || 115 ||

पराशक्तिः परानिष्ठा प्रज्ञानघनरूपिणी⁠ ⁠। माध्वीपानालसा मत्ता मातृकावर्णरूपिणी⁠ ⁠॥⁠ ⁠११६⁠ ⁠॥

Paraashaktih paraanishthaa prajnaanaghanaroopinee | Maadhveepaanaalasaa mattaa maatrukaavarnaroopinee || 116 ||

महाकैलासनिलया मृणालमृदुदोर्लता⁠ ⁠। महनीया दयामूर्तिर्महासाम्राज्यशालिनी⁠ ⁠॥⁠ ⁠११७⁠ ⁠॥

Mahaakailaasanilayaa mrunaalamrududorlataa | Mahaneeyaa dayaamoortirmahaasaamraajyashaalinee || 117 ||

आत्मविद्या महाविद्या श्रीविद्या कामसेविता⁠ ⁠। श्रीषोडशाक्षरीविद्या त्रिकूटा कामकोटिका⁠ ⁠॥⁠ ⁠११८⁠ ⁠॥

Aatmavidyaa mahaavidyaa shreevidyaa kaamasevitaa | Shreeshodashaakshareevidyaa trikootaa kaamakotikaa || 118 ||

कटाक्षकिङ्करीभूतकमलाकोटिसेविता⁠ ⁠। शिरःस्थिता चन्द्रनिभा भालस्थेन्द्रधनुःप्रभा⁠ ⁠॥⁠ ⁠११९⁠ ⁠॥

Kataakshakinkareebhootakamalaakotisevitaa | Shirahsthitaa chandranibhaa bhaalasthendradhanuhprabhaa || 119 ||

हृदयस्था रविप्रख्या त्रिकोणान्तरदीपिका⁠ ⁠। दाक्षायणी दैत्यहन्त्री दक्षयज्ञविनाशिनी⁠ ⁠॥⁠ ⁠१२०⁠ ⁠॥

Hrudayasthaa raviprakhyaa trikonaantaradeepikaa | Daakshaayanee daityahantree dakshayajnavinaashinee || 120 ||

दरान्दोलितदीर्घाक्षी दरहासोज्ज्वलन्मुखी⁠ ⁠। गुरुमूर्तिर्गुणनिधिर्गोमाता गुहजन्मभूः⁠ ⁠॥⁠ ⁠१२१⁠ ⁠॥

Daraandolitadeerghaakshee darahaasojjvalanmukhee | Gurumoortirgunanidhirgomaataa guhajanmabhooh || 121 ||

देवेशी दण्डनीतिस्था दहराकाशरूपिणी⁠ ⁠। प्रतिपन्मुख्यराकान्ततिथिमण्डलपूजिता⁠ ⁠॥⁠ ⁠१२२⁠ ⁠॥

Deveshee dandaneetisthaa daharaakaasharoopinee | Pratipanmukhyaraakaantatithimandalapoojitaa || 122 ||

कलात्मिका कलानाथा काव्यालापविनोदिनी⁠ ⁠। सचामररमावाणीसव्यदक्षिणसेविता⁠ ⁠॥⁠ ⁠१२३⁠ ⁠॥

Kalaatmikaa kalaanaathaa kaavyaalaapavinodinee | Sachaamararamaavaaneesavyadakshinasevitaa || 123 ||

आदिशक्तिरमेयात्मा परमा पावनाकृतिः⁠ ⁠। अनेककोटिब्रह्माण्डजननी दिव्यविग्रहा⁠ ⁠॥⁠ ⁠१२४⁠ ⁠॥

Aadishaktirameyaatmaa paramaa paavanaakrutih | Anekakotibrahmaandajananee divyavigrahaa || 124 ||

क्लीङ्कारी केवला गुह्या कैवल्यपददायिनी⁠ ⁠। त्रिपुरा त्रिजगद्वन्द्या त्रिमूर्तिस्त्रिदशेश्वरी⁠ ⁠॥⁠ ⁠१२५⁠ ⁠॥

Kleenkaaree kevalaa guhyaa kaivalyapadadaayinee | Tripuraa trijagadvandyaa trimoortistridasheshvaree || 125 ||

त्र्यक्षरी दिव्यगन्धाढ्या सिन्दूरतिलकाञ्चिता⁠ ⁠। उमा शैलेन्द्रतनया गौरी गन्धर्वसेविता⁠ ⁠॥⁠ ⁠१२६⁠ ⁠॥

Tryaksharee divyagandhaadhyaa sindooratilakaanchitaa | Umaa shailendratanayaa gauree gandharvasevitaa || 126 ||

विश्वगर्भा स्वर्णगर्भाऽवरदा वागधीश्वरी⁠ ⁠। ध्यानगम्याऽपरिच्छेद्या ज्ञानदा ज्ञानविग्रहा⁠ ⁠॥⁠ ⁠१२७⁠ ⁠॥

Vishvagarbhaa svarnagarbhaa'varadaa vaagadheeshvaree | Dhyaanagamyaa'parichchhedyaa jnaanadaa jnaanavigrahaa || 127 ||

सर्ववेदान्तसंवेद्या सत्यानन्दस्वरूपिणी⁠ ⁠। लोपामुद्रार्चिता लीलाक्लुप्तब्रह्माण्डमण्डला⁠ ⁠॥⁠ ⁠१२८⁠ ⁠॥

Sarvavedaantasanvedyaa satyaanandasvaroopinee | Lopaamudraarchitaa leelaakluptabrahmaandamandalaa || 128 ||

अदृश्या दृश्यरहिता विज्ञात्री वेद्यवर्जिता⁠ ⁠। योगिनी योगदा योग्या योगानन्दा युगन्धरा⁠ ⁠॥⁠ ⁠१२९⁠ ⁠॥

Adrushyaa drushyarahitaa vijnaatree vedyavarjitaa | Yoginee yogadaa yogyaa yogaanandaa yugandharaa || 129 ||

इच्छाशक्तिज्ञानशक्तिक्रियाशक्तिस्वरूपिणी⁠ ⁠। सर्वाधारा सुप्रतिष्ठा सदसद्रूपधारिणी⁠ ⁠॥⁠ ⁠१३०⁠ ⁠॥

Ichchhaashaktijnaanashaktikriyaashaktisvaroopinee | Sarvaadhaaraa supratishthaa sadasadroopadhaarinee || 130 ||

अष्टमूर्तिरजाजैत्री लोकयात्राविधायिनी⁠ ⁠। एकाकिनी भूमरूपा निर्द्वैता द्वैतवर्जिता⁠ ⁠॥⁠ ⁠१३१⁠ ⁠॥

Ashtamoortirajaajaitree lokayaatraavidhaayinee | Ekaakinee bhoomaroopaa nirdvaitaa dvaitavarjitaa || 131 ||

अन्नदा वसुदा वृद्धा ब्रह्मात्मैक्यस्वरूपिणी⁠ ⁠। बृहती ब्राह्मणी ब्राह्मी ब्रह्मानन्दा बलिप्रिया⁠ ⁠॥⁠ ⁠१३२⁠ ⁠॥

Annadaa vasudaa vruddhaa brahmaatmaikyasvaroopinee | Bruhatee braahmanee braahmee brahmaanandaa balipriyaa || 132 ||

भाषारूपा बृहत्सेना भावाभावविवर्जिता⁠ ⁠। सुखाराध्या शुभकरी शोभना सुलभा गतिः⁠ ⁠॥⁠ ⁠१३३⁠ ⁠॥

Bhaashaaroopaa bruhatsenaa bhaavaabhaavavivarjitaa | Sukhaaraadhyaa shubhakaree shobhanaa sulabhaa gatih || 133 ||

राजराजेश्वरी राज्यदायिनी राज्यवल्लभा⁠ ⁠। राजत्कृपा राजपीठनिवेशितनिजाश्रिता⁠ ⁠॥⁠ ⁠१३४⁠ ⁠॥

Raajaraajeshvaree raajyadaayinee raajyavallabhaa | Raajatkrupaa raajapeethaniveshitanijaashritaa || 134 ||

राज्यलक्ष्मीः कोशनाथा चतुरङ्गबलेश्वरी⁠ ⁠। साम्राज्यदायिनी सत्यसन्धा सागरमेखला⁠ ⁠॥⁠ ⁠१३५⁠ ⁠॥

Raajyalakshmeeh koshanaathaa chaturangabaleshvaree | Saamraajyadaayinee satyasandhaa saagaramekhalaa || 135 ||

दीक्षिता दैत्यशमनी सर्वलोकवशङ्करी⁠ ⁠। सर्वार्थदात्री सावित्री सच्चिदानन्दरूपिणी⁠ ⁠॥⁠ ⁠१३६⁠ ⁠॥

Deekshitaa daityashamanee sarvalokavashankaree | Sarvaarthadaatree saavitree sachchidaanandaroopinee || 136 ||

देशकालापरिच्छिन्ना सर्वगा सर्वमोहिनी⁠ ⁠। सरस्वती शास्त्रमयी गुहाम्बा गुह्यरूपिणी⁠ ⁠॥⁠ ⁠१३७⁠ ⁠॥

Deshakaalaaparichchhinnaa sarvagaa sarvamohinee | Sarasvatee shaastramayee guhaambaa guhyaroopinee || 137 ||

सर्वोपाधिविनिर्मुक्ता सदाशिवपतिव्रता⁠ ⁠। सम्प्रदायेश्वरी साध्वी गुरुमण्डलरूपिणी⁠ ⁠॥⁠ ⁠१३८⁠ ⁠॥

Sarvopaadhivinirmuktaa sadaashivapativrataa | Sampradaayeshvaree saadhvee gurumandalaroopinee || 138 ||

कुलोत्तीर्णा भगाराध्या माया मधुमती मही⁠ ⁠। गणाम्बा गुह्यकाराध्या कोमलाङ्गी गुरुप्रिया⁠ ⁠॥⁠ ⁠१३९⁠ ⁠॥

Kulotteernaa bhagaaraadhyaa maayaa madhumatee mahee | Ganaambaa guhyakaaraadhyaa komalaangee gurupriyaa || 139 ||

स्वतन्त्रा सर्वतन्त्रेशी दक्षिणामूर्तिरूपिणी⁠ ⁠। सनकादिसमाराध्या शिवज्ञानप्रदायिनी⁠ ⁠॥⁠ ⁠१४०⁠ ⁠॥

Svatantraa sarvatantreshee dakshinaamoortiroopinee | Sanakaadisamaaraadhyaa shivajnaanapradaayinee || 140 ||

चित्कलाऽऽनन्दकलिका प्रेमरूपा प्रियङ्करी⁠ ⁠। नामपारायणप्रीता नन्दिविद्या नटेश्वरी⁠ ⁠॥⁠ ⁠१४१⁠ ⁠॥

Chitkalaa''nandakalikaa premaroopaa priyankaree | Naamapaaraayanapreetaa nandividyaa nateshvaree || 141 ||

मिथ्याजगदधिष्ठाना मुक्तिदा मुक्तिरूपिणी⁠ ⁠। लास्यप्रिया लयकरी लज्जा रम्भादिवन्दिता⁠ ⁠॥⁠ ⁠१४२⁠ ⁠॥

Mithyaajagadadhishthaanaa muktidaa muktiroopinee | Laasyapriyaa layakaree lajjaa rambhaadivanditaa || 142 ||

भवदावसुधावृष्टिः पापारण्यदवानला⁠ ⁠। दौर्भाग्यतूलवातूला जराध्वान्तरविप्रभा⁠ ⁠॥⁠ ⁠१४३⁠ ⁠॥

Bhavadaavasudhaavrushtih paapaaranyadavaanalaa | Daurbhaagyatoolavaatoolaa jaraadhvaantaraviprabhaa || 143 ||

भाग्याब्धिचन्द्रिका भक्तचित्तकेकिघनाघना⁠ ⁠। रोगपर्वतदम्भोलिर्मृत्युदारुकुठारिका⁠ ⁠॥⁠ ⁠१४४⁠ ⁠॥

Bhaagyaabdhichandrikaa bhaktachittakekighanaaghanaa | Rogaparvatadambholirmrutyudaarukuthaarikaa || 144 ||

महेश्वरी महाकाली महाग्रासा महाशना⁠ ⁠। अपर्णा चण्डिका चण्डमुण्डासुरनिषूदिनी⁠ ⁠॥⁠ ⁠१४५⁠ ⁠॥

Maheshvaree mahaakaalee mahaagraasaa mahaashanaa | Aparnaa chandikaa chandamundaasuranishoodinee || 145 ||

क्षराक्षरात्मिका सर्वलोकेशी विश्वधारिणी⁠ ⁠। त्रिवर्गदात्री सुभगा त्र्यम्बका त्रिगुणात्मिका⁠ ⁠॥⁠ ⁠१४६⁠ ⁠॥

Ksharaaksharaatmikaa sarvalokeshee vishvadhaarinee | Trivargadaatree subhagaa tryambakaa trigunaatmikaa || 146 ||

स्वर्गापवर्गदा शुद्धा जपापुष्पनिभाकृतिः⁠ ⁠। ओजोवती द्युतिधरा यज्ञरूपा प्रियव्रता⁠ ⁠॥⁠ ⁠१४७⁠ ⁠॥

Svargaapavargadaa shuddhaa japaapushpanibhaakrutih | Ojovatee dyutidharaa yajnaroopaa priyavrataa || 147 ||

दुराराध्या दुराधर्षा पाटलीकुसुमप्रिया⁠ ⁠। महती मेरुनिलया मन्दारकुसुमप्रिया⁠ ⁠॥⁠ ⁠१४८⁠ ⁠॥

Duraaraadhyaa duraadharshaa paataleekusumapriyaa | Mahatee merunilayaa mandaarakusumapriyaa || 148 ||

वीराराध्या विराड्रूपा विरजा विश्वतोमुखी⁠ ⁠। प्रत्यग्रूपा पराकाशा प्राणदा प्राणरूपिणी⁠ ⁠॥⁠ ⁠१४९⁠ ⁠॥

Veeraaraadhyaa viraadroopaa virajaa vishvatomukhee | Pratyagroopaa paraakaashaa praanadaa praanaroopinee || 149 ||

मार्ताण्डभैरवाराध्या मन्त्रिणीन्यस्तराज्यधूः⁠ ⁠। त्रिपुरेशी जयत्सेना निस्त्रैगुण्या परापरा⁠ ⁠॥⁠ ⁠१५०⁠ ⁠॥

Maartaandabhairavaaraadhyaa mantrineenyastaraajyadhooh | Tripureshee jayatsenaa nistraigunyaa paraaparaa || 150 ||

सत्यज्ञानानन्दरूपा सामरस्यपरायणा⁠ ⁠। कपर्दिनी कलामाला कामधुक्कामरूपिणी⁠ ⁠॥⁠ ⁠१५१⁠ ⁠॥

Satyajnaanaanandaroopaa saamarasyaparaayanaa | Kapardinee kalaamaalaa kaamadhukkaamaroopinee || 151 ||

कलानिधिः काव्यकला रसज्ञा रसशेवधिः⁠ ⁠। पुष्टा पुरातना पूज्या पुष्करा पुष्करेक्षणा⁠ ⁠॥⁠ ⁠१५२⁠ ⁠॥

Kalaanidhih kaavyakalaa rasajnaa rasashevadhih | Pushtaa puraatanaa poojyaa pushkaraa pushkarekshanaa || 152 ||

परञ्ज्योतिः परन्धाम परमाणुः परात्परा⁠ ⁠। पाशहस्ता पाशहन्त्री परमन्त्रविभेदिनी⁠ ⁠॥⁠ ⁠१५३⁠ ⁠॥

Paranjyotih parandhaama paramaanuh paraatparaa | Paashahastaa paashahantree paramantravibhedinee || 153 ||

मूर्ताऽमूर्ताऽनित्यतृप्ता मुनिमानसहंसिका⁠ ⁠। सत्यव्रता सत्यरूपा सर्वान्तर्यामिनी सती⁠ ⁠॥⁠ ⁠१५४⁠ ⁠॥

Moortaa'moortaa'nityatruptaa munimaanasahansikaa | Satyavrataa satyaroopaa sarvaantaryaaminee satee || 154 ||

ब्रह्माणी ब्रह्मजननी बहुरूपा बुधार्चिता⁠ ⁠। प्रसवित्री प्रचण्डाऽऽज्ञा प्रतिष्ठा प्रकटाकृतिः⁠ ⁠॥⁠ ⁠१५५⁠ ⁠॥

Brahmaanee brahmajananee bahuroopaa budhaarchitaa | Prasavitree prachandaa''jnaa pratishthaa prakataakrutih || 155 ||

प्राणेश्वरी प्राणदात्री पञ्चाशत्पीठरूपिणी⁠ ⁠। विशृङ्खला विविक्तस्था वीरमाता वियत्प्रसूः⁠ ⁠॥⁠ ⁠१५६⁠ ⁠॥

Praaneshvaree praanadaatree panchaashatpeetharoopinee | Vishrunkhalaa viviktasthaa veeramaataa viyatprasooh || 156 ||

मुकुन्दा मुक्तिनिलया मूलविग्रहरूपिणी⁠ ⁠। भावज्ञा भवरोगघ्नी भवचक्रप्रवर्तिनी⁠ ⁠॥⁠ ⁠१५७⁠ ⁠॥

Mukundaa muktinilayaa moolavigraharoopinee | Bhaavajnaa bhavarogaghnee bhavachakrapravartinee || 157 ||

छन्दःसारा शास्त्रसारा मन्त्रसारा तलोदरी⁠ ⁠। उदारकीर्तिरुद्दामवैभवा वर्णरूपिणी⁠ ⁠॥⁠ ⁠१५८⁠ ⁠॥

Chhandahsaaraa shaastrasaaraa mantrasaaraa talodaree | Udaarakeertiruddaamavaibhavaa varnaroopinee || 158 ||

जन्ममृत्युजरातप्तजनविश्रान्तिदायिनी⁠ ⁠। सर्वोपनिषदुद्घुष्टा शान्त्यतीतकलात्मिका⁠ ⁠॥⁠ ⁠१५९⁠ ⁠॥

Janmamrutyujaraataptajanavishraantidaayinee | Sarvopanishadudghushtaa shaantyateetakalaatmikaa || 159 ||

गम्भीरा गगनान्तस्था गर्विता गानलोलुपा⁠ ⁠। कल्पनारहिता काष्ठाऽकान्ता कान्तार्धविग्रहा⁠ ⁠॥⁠ ⁠१६०⁠ ⁠॥

Gambheeraa gaganaantasthaa garvitaa gaanalolupaa | Kalpanaarahitaa kaashthaa'kaantaa kaantaardhavigrahaa || 160 ||

कार्यकारणनिर्मुक्ता कामकेलितरङ्गिता⁠ ⁠। कनत्कनकताटङ्का लीलाविग्रहधारिणी⁠ ⁠॥⁠ ⁠१६१⁠ ⁠॥

Kaaryakaarananirmuktaa kaamakelitarangitaa | Kanatkanakataatankaa leelaavigrahadhaarinee || 161 ||

अजा क्षयविनिर्मुक्ता मुग्धा क्षिप्रप्रसादिनी⁠ ⁠। अन्तर्मुखसमाराध्या बहिर्मुखसुदुर्लभा⁠ ⁠॥⁠ ⁠१६२⁠ ⁠॥

Ajaa kshayavinirmuktaa mugdhaa kshipraprasaadinee | Antarmukhasamaaraadhyaa bahirmukhasudurlabhaa || 162 ||

त्रयी त्रिवर्गनिलया त्रिस्था त्रिपुरमालिनी⁠ ⁠। निरामया निरालम्बा स्वात्मारामा सुधासृतिः⁠ ⁠॥⁠ ⁠१६३⁠ ⁠॥

Trayee trivarganilayaa tristhaa tripuramaalinee | Niraamayaa niraalambaa svaatmaaraamaa sudhaasrutih || 163 ||

संसारपङ्कनिर्मग्नसमुद्धरणपण्डिता⁠ ⁠। यज्ञप्रिया यज्ञकर्त्री यजमानस्वरूपिणी⁠ ⁠॥⁠ ⁠१६४⁠ ⁠॥

Sansaarapankanirmagnasamuddharanapanditaa | Yajnapriyaa yajnakartree yajamaanasvaroopinee || 164 ||

धर्माधारा धनाध्यक्षा धनधान्यविवर्धिनी⁠ ⁠। विप्रप्रिया विप्ररूपा विश्वभ्रमणकारिणी⁠ ⁠॥⁠ ⁠१६५⁠ ⁠॥

Dharmaadhaaraa dhanaadhyakshaa dhanadhaanyavivardhinee | Viprapriyaa vipraroopaa vishvabhramanakaarinee || 165 ||

विश्वग्रासा विद्रुमाभा वैष्णवी विष्णुरूपिणी⁠ ⁠। अयोनिर्योनिनिलया कूटस्था कुलरूपिणी⁠ ⁠॥⁠ ⁠१६६⁠ ⁠॥

Vishvagraasaa vidrumaabhaa vaishnavee vishnuroopinee | Ayoniryoninilayaa kootasthaa kularoopinee || 166 ||

वीरगोष्ठीप्रिया वीरा नैष्कर्म्या नादरूपिणी⁠ ⁠। विज्ञानकलना कल्या विदग्धा बैन्दवासना⁠ ⁠॥⁠ ⁠१६७⁠ ⁠॥

Veeragoshtheepriyaa veeraa naishkarmyaa naadaroopinee | Vijnaanakalanaa kalyaa vidagdhaa baindavaasanaa || 167 ||

तत्त्वाधिका तत्त्वमयी तत्त्वमर्थस्वरूपिणी⁠ ⁠। सामगानप्रिया सौम्या सदाशिवकुटुम्बिनी⁠ ⁠॥⁠ ⁠१६८⁠ ⁠॥

Tattvaadhikaa tattvamayee tattvamarthasvaroopinee | Saamagaanapriyaa saumyaa sadaashivakutumbinee || 168 ||

सव्यापसव्यमार्गस्था सर्वापद्विनिवारिणी⁠ ⁠। स्वस्था स्वभावमधुरा धीरा धीरसमर्चिता⁠ ⁠॥⁠ ⁠१६९⁠ ⁠॥

Savyaapasavyamaargasthaa sarvaapadvinivaarinee | Svasthaa svabhaavamadhuraa dheeraa dheerasamarchitaa || 169 ||

चैतन्यार्घ्यसमाराध्या चैतन्यकुसुमप्रिया⁠ ⁠। सदोदिता सदातुष्टा तरुणादित्यपाटला⁠ ⁠॥⁠ ⁠१७०⁠ ⁠॥

Chaitanyaarghyasamaaraadhyaa chaitanyakusumapriyaa | Sadoditaa sadaatushtaa tarunaadityapaatalaa || 170 ||

दक्षिणादक्षिणाराध्या दरस्मेरमुखाम्बुजा⁠ ⁠। कौलिनीकेवलाऽनर्घ्यकैवल्यपददायिनी⁠ ⁠॥⁠ ⁠१७१⁠ ⁠॥

Dakshinaadakshinaaraadhyaa darasmeramukhaambujaa | Kaulineekevalaa'narghyakaivalyapadadaayinee || 171 ||

स्तोत्रप्रिया स्तुतिमती श्रुतिसंस्तुतवैभवा⁠ ⁠। मनस्विनी मानवती महेशी मङ्गलाकृतिः⁠ ⁠॥⁠ ⁠१७२⁠ ⁠॥

Stotrapriyaa stutimatee shrutisanstutavaibhavaa | Manasvinee maanavatee maheshee mangalaakrutih || 172 ||

विश्वमाता जगद्धात्री विशालाक्षी विरागिणी⁠ ⁠। प्रगल्भा परमोदारा परामोदा मनोमयी⁠ ⁠॥⁠ ⁠१७३⁠ ⁠॥

Vishvamaataa jagaddhaatree vishaalaakshee viraaginee | Pragalbhaa paramodaaraa paraamodaa manomayee || 173 ||

व्योमकेशी विमानस्था वज्रिणी वामकेश्वरी⁠ ⁠। पञ्चयज्ञप्रिया पञ्चप्रेतमञ्चाधिशायिनी⁠ ⁠॥⁠ ⁠१७४⁠ ⁠॥

Vyomakeshee vimaanasthaa vajrinee vaamakeshvaree | Panchayajnapriyaa panchapretamanchaadhishaayinee || 174 ||

पञ्चमी पञ्चभूतेशी पञ्चसङ्ख्योपचारिणी⁠ ⁠। शाश्वती शाश्वतैश्वर्या शर्मदा शम्भुमोहिनी⁠ ⁠॥⁠ ⁠१७५⁠ ⁠॥

Panchamee panchabhooteshee panchasankhyopachaarinee | Shaashvatee shaashvataishvaryaa sharmadaa shambhumohinee || 175 ||

धरा धरसुता धन्या धर्मिणी धर्मवर्धिनी⁠ ⁠। लोकातीता गुणातीता सर्वातीता शमात्मिका⁠ ⁠॥⁠ ⁠१७६⁠ ⁠॥

Dharaa dharasutaa dhanyaa dharminee dharmavardhinee | Lokaateetaa gunaateetaa sarvaateetaa shamaatmikaa || 176 ||

बन्धूककुसुमप्रख्या बाला लीलाविनोदिनी⁠ ⁠। सुमङ्गली सुखकरी सुवेषाढ्या सुवासिनी⁠ ⁠॥⁠ ⁠१७७⁠ ⁠॥

Bandhookakusumaprakhyaa baalaa leelaavinodinee | Sumangalee sukhakaree suveshaadhyaa suvaasinee || 177 ||

सुवासिन्यर्चनप्रीताऽऽशोभना शुद्धमानसा⁠ ⁠। बिन्दुतर्पणसन्तुष्टा पूर्वजा त्रिपुराम्बिका⁠ ⁠॥⁠ ⁠१७८⁠ ⁠॥

Suvaasinyarchanapreetaa''shobhanaa shuddhamaanasaa | Bindutarpanasantushtaa poorvajaa tripuraambikaa || 178 ||

दशमुद्रासमाराध्या त्रिपुराश्रीवशङ्करी⁠ ⁠। ज्ञानमुद्रा ज्ञानगम्या ज्ञानज्ञेयस्वरूपिणी⁠ ⁠॥⁠ ⁠१७९⁠ ⁠॥

Dashamudraasamaaraadhyaa tripuraashreevashankaree | Jnaanamudraa jnaanagamyaa jnaanajneyasvaroopinee || 179 ||

योनिमुद्रा त्रिखण्डेशी त्रिगुणाऽम्बा त्रिकोणगा⁠ ⁠। अनघाऽद्भुतचारित्रा वाञ्छितार्थप्रदायिनी⁠ ⁠॥⁠ ⁠१८०⁠ ⁠॥

Yonimudraa trikhandeshee trigunaa'mbaa trikonagaa | Anaghaa'dbhutachaaritraa vaanchhitaarthapradaayinee || 180 ||

अभ्यासातिशयज्ञाता षडध्वातीतरूपिणी⁠ ⁠। अव्याजकरुणामूर्तिरज्ञानध्वान्तदीपिका⁠ ⁠॥⁠ ⁠१८१⁠ ⁠॥

Abhyaasaatishayajnaataa shadadhvaateetaroopinee | Avyaajakarunaamoortirajnaanadhvaantadeepikaa || 181 ||

आबालगोपविदिता सर्वानुल्लङ्घ्यशासना⁠ ⁠। श्रीचक्रराजनिलया श्रीमत्त्रिपुरसुन्दरी⁠ ⁠॥⁠ ⁠१८२⁠ ⁠॥

Aabaalagopaviditaa sarvaanullanghyashaasanaa | Shreechakraraajanilayaa shreemattripurasundaree || 182 ||

श्रीशिवा शिवशक्त्यैक्यरूपिणी ललिताम्बिका⁠ ⁠। एवं श्रीललितादेव्या नाम्नां साहस्रकं जगुः⁠ ⁠॥⁠ ⁠१८३⁠ ⁠॥

Shreeshivaa shivashaktyaikyaroopinee lalitaambikaa | Evam shreelalitaadevyaa naamnaam saahasrakam jaguh || 183 ||