{"id":"kanakadhara-stotra","code":"9z","title":{"dev":"कनकधारास्तोत्रम्","rom":"Kanakadhara Stotra"},"type":"stotra","typeLabel":"Stotra","language":"sa","languageName":"Sanskrit","deity":["lakshmi"],"aliases":["Angam Hareh Pulaka Bhushanam"],"verses":22,"sections":[{"kind":"verse","n":1,"dev":"अङ्गं हरेः पुलकभूषणमाश्रयन्ती\nभृङ्गाङ्गनेव मुकुलाभरणं तमालम् ।\nअङ्गीकृताखिलविभूतिरपाङ्गलीला\nमाङ्गल्यदास्तु मम मङ्गलदेवतायाः ॥ १ ॥","rom":"Angam hareh pulakabhooshanamaashrayantee\nBhrungaanganeva mukulaabharanam tamaalam |\nAngeekrutaakhilavibhootirapaangaleelaa\nMaangalyadaastu mama mangaladevataayaah || 1 ||"},{"kind":"verse","n":2,"dev":"मुग्धा मुहुर्विदधती वदने मुरारेः\nप्रेमत्रपाप्रणिहितानि गतागतानि ।\nमाला दृशोर्मधुकरीव महोत्पले या\nसा मे श्रियं दिशतु सागरसम्भवायाः ॥ २ ॥","rom":"Mugdhaa muhurvidadhatee vadane muraareh\nPrematrapaapranihitaani gataagataani |\nMaalaa drushormadhukareeva mahotpale yaa\nSaa me shriyam dishatu saagarasambhavaayaah || 2 ||"},{"kind":"verse","n":3,"dev":"आमीलिताक्षमधिगम्य मुदा मुकुन्दम्-\nआनन्दकन्दमनिमेषमनङ्गतन्त्रम् ।\nआकेकरस्थितकनीनिकपक्ष्मनेत्रं\nभूत्यै भवेन्मम भुजङ्गशयाङ्गनायाः ॥ ३ ॥","rom":"Aameelitaakshamadhigamya mudaa mukundam-\nAanandakandamanimeshamanangatantram |\nAakekarasthitakaneenikapakshmanetram\nBhootyai bhavenmama bhujangashayaanganaayaah || 3 ||"},{"kind":"verse","n":4,"dev":"बाह्वन्तरे मधुजितः श्रितकौस्तुभे या\nहारावलीव हरिनीलमयी विभाति ।\nकामप्रदा भगवतोऽपि कटाक्षमाला\nकल्याणमावहतु मे कमलालयायाः ॥ ४ ॥","rom":"Baahvantare madhujitah shritakaustubhe yaa\nHaaraavaleeva harineelamayee vibhaati |\nKaamapradaa bhagavato'pi kataakshamaalaa\nKalyaanamaavahatu me kamalaalayaayaah || 4 ||"},{"kind":"verse","n":5,"dev":"कालाम्बुदालिललितोरसि कैटभारेः\nधाराधरे स्फुरति या तटिदङ्गनेव ।\nमातुस्समस्तजगतां महनीयमूर्तिः\nभद्राणि मे दिशतु भार्गवनन्दनायाः ॥ ५ ॥","rom":"Kaalaambudaalilalitorasi kaitabhaareh\nDhaaraadhare sphurati yaa tatidanganeva |\nMaatussamastajagataam mahaneeyamoortih\nBhadraani me dishatu bhaargavanandanaayaah || 5 ||"},{"kind":"verse","n":6,"dev":"प्राप्तं पदं प्रथमतः खलु यत्प्रभावात्\nमाङ्गल्यभाजि मधुमाथिनि मन्मथेन ।\nमय्यापतेत्तदिह मन्थरमीक्षणार्धं\nमन्दालसं च मकरालयकन्यकायाः ॥ ६ ॥","rom":"Praaptam padam prathamatah khalu yatprabhaavaat\nMaangalyabhaaji madhumaathini manmathena |\nMayyaapatettadiha mantharameekshanaardham\nMandaalasam cha makaraalayakanyakaayaah || 6 ||"},{"kind":"verse","n":7,"dev":"विश्वामरेन्द्रपदविभ्रमदानदक्षं\nआनन्दहेतुरधिकं मुरविद्विषोऽपि ।\nईषन्निषीदतु मयि क्षणमीक्षणार्थं\nइन्दीवरोदरसहोदरमिन्दिरायाः ॥ ७ ॥","rom":"Vishvaamarendrapadavibhramadaanadaksham\nAanandaheturadhikam muravidvisho'pi |\nEeshannisheedatu mayi kshanameekshanaartham\nIndeevarodarasahodaramindiraayaah || 7 ||"},{"kind":"verse","n":8,"dev":"इष्टा विशिष्टमतयोऽपि यया दयार्द्र\nदृष्ट्या त्रिविष्टपपदं सुलभं लभन्ते ।\nदृष्टिः प्रहृष्ट कमलोदरदीप्तिरिष्टां\nपुष्टिं कृषीष्ट मम पुष्करविष्टरायाः ॥ ८ ॥","rom":"Ishtaa vishishtamatayo'pi yayaa dayaardra\nDrushtyaa trivishtapapadam sulabham labhante |\nDrushtih prahrushta kamalodaradeeptirishtaam\nPushtim krusheeshta mama pushkaravishtaraayaah || 8 ||"},{"kind":"verse","n":9,"dev":"दद्याद्दयानुपवनो द्रविणाम्बुधारा-\nमस्मिन्नकिञ्चनविहङ्गशिशौ विषण्णे ।\nदुष्कर्मघर्ममपनीय चिराय दूरं\nनारायणप्रणयिनीनयनाम्बुवाहः ॥ ९ ॥","rom":"Dadyaaddayaanupavano dravinaambudhaaraa-\nMasminnakinchanavihangashishau vishanne |\nDushkarmagharmamapaneeya chiraaya dooram\nNaaraayanapranayineenayanaambuvaahah || 9 ||"},{"kind":"verse","n":10,"dev":"गीर्देवतेति गरुडध्वजसुन्दरीति\nशाकम्भरीति शशिशेखरवल्लभेति ।\nसृष्टिस्थितिप्रलयकेलिषु संस्थितायै\nतस्यै नमस्त्रिभुवनैकगुरोस्तरुण्यै ॥ १० ॥","rom":"Geerdevateti garudadhvajasundareeti\nShaakambhareeti shashishekharavallabheti |\nSrushtisthitipralayakelishu sansthitaayai\nTasyai namastribhuvanaikagurostarunyai || 10 ||"},{"kind":"verse","n":11,"dev":"श्रुत्यै नमोऽस्तु शुभकर्मफलप्रसूत्यै\nरत्यै नमोऽस्तु रमणीयगुणार्णवायै ।\nशक्त्यै नमोऽस्तु शतपत्रनिकेतनायै\nपुष्ट्यै नमोऽस्तु पुरुषोत्तमवल्लभायै ॥ ११ ॥","rom":"Shrutyai namo'stu shubhakarmaphalaprasootyai\nRatyai namo'stu ramaneeyagunaarnavaayai |\nShaktyai namo'stu shatapatraniketanaayai\nPushtyai namo'stu purushottamavallabhaayai || 11 ||"},{"kind":"verse","n":12,"dev":"नमोऽस्तु नालीकनिभाननायै\nनमोऽस्तु दुग्धोदधिजन्मभूम्यै ।\nनमोऽस्तु सोमामृतसोदरायै\nनमोऽस्तु नारायणवल्लभायै ॥ १२ ॥","rom":"Namo'stu naaleekanibhaananaayai\nNamo'stu dugdhodadhijanmabhoomyai |\nNamo'stu somaamrutasodaraayai\nNamo'stu naaraayanavallabhaayai || 12 ||"},{"kind":"verse","n":13,"dev":"नमोऽस्तु हेमाम्बुजपीठिकायै\nनमोऽस्तु भूमण्डलनायिकायै ।\nनमोऽस्तु देवादिदयापरायै\nनमोऽस्तु शार्ङ्गायुधवल्लभायै ॥ १३ ॥","rom":"Namo'stu hemaambujapeethikaayai\nNamo'stu bhoomandalanaayikaayai |\nNamo'stu devaadidayaaparaayai\nNamo'stu shaarngaayudhavallabhaayai || 13 ||"},{"kind":"verse","n":14,"dev":"नमोऽस्तु देव्यै भृगुनन्दनायै\nनमोऽस्तु विष्णोरुरसिस्थितायै ।\nनमोऽस्तु लक्ष्म्यै कमलालयायै\nनमोऽस्तु दामोदरवल्लभायै ॥ १४ ॥","rom":"Namo'stu devyai bhrugunandanaayai\nNamo'stu vishnorurasisthitaayai |\nNamo'stu lakshmyai kamalaalayaayai\nNamo'stu daamodaravallabhaayai || 14 ||"},{"kind":"verse","n":15,"dev":"नमोऽस्तु कान्त्यै कमलेक्षणायै\nनमोऽस्तु भूत्यै भुवनप्रसूत्यै ।\nनमोऽस्तु देवादिभिरर्चितायै\nनमोऽस्तु नन्दात्मजवल्लभायै ॥ १५ ॥","rom":"Namo'stu kaantyai kamalekshanaayai\nNamo'stu bhootyai bhuvanaprasootyai |\nNamo'stu devaadibhirarchitaayai\nNamo'stu nandaatmajavallabhaayai || 15 ||"},{"kind":"verse","n":16,"dev":"सम्पत्कराणि सकलेन्द्रियनन्दनानि\nसाम्राज्यदानविभवानि सरोरुहाक्षि ।\nत्वद्वन्दनानि दुरितोद्धरणोद्यतानि\nमामेव मातरनिशं कलयन्तु मान्ये ॥ १६ ॥","rom":"Sampatkaraani sakalendriyanandanaani\nSaamraajyadaanavibhavaani saroruhaakshi |\nTvadvandanaani duritoddharanodyataani\nMaameva maataranisham kalayantu maanye || 16 ||"},{"kind":"verse","n":17,"dev":"यत्कटाक्षसमुपासनाविधिः\nसेवकस्य सकलार्थसम्पदः ।\nसन्तनोति वचनाङ्गमानसैः\nत्वां मुरारिहृदयेश्वरीं भजे ॥ १७ ॥","rom":"Yatkataakshasamupaasanaavidhih\nSevakasya sakalaarthasampadah |\nSantanoti vachanaangamaanasaih\nTvaam muraarihrudayeshvareem bhaje || 17 ||"},{"kind":"verse","n":18,"dev":"सरसिजनिलये सरोजहस्ते\nधवलतमांशुकगन्धमाल्यशोभे ।\nभगवति हरिवल्लभे मनोज्ञे\nत्रिभुवनभूतिकरि प्रसीद मह्यम् ॥ १८ ॥","rom":"Sarasijanilaye sarojahaste\nDhavalatamaanshukagandhamaalyashobhe |\nBhagavati harivallabhe manojne\nTribhuvanabhootikari praseeda mahyam || 18 ||"},{"kind":"verse","n":19,"dev":"दिग्घस्तिभिः कनककुम्भमुखावसृष्ट\nस्वर्वाहिनी विमलचारुजलप्लुताङ्गीम् ।\nप्रातर्नमामि जगतां जननीमशेष\nलोकाधिनाथगृहिणीममृताब्धिपुत्रीम् ॥ १९ ॥","rom":"Digghastibhih kanakakumbhamukhaavasrushta\nSvarvaahinee vimalachaarujalaplutaangeem |\nPraatarnamaami jagataam jananeemashesha\nLokaadhinaathagruhineemamrutaabdhiputreem || 19 ||"},{"kind":"verse","n":20,"dev":"कमले कमलाक्षवल्लभे त्वं\nकरुणापूरतरङ्गितैरपाङ्गैः ।\nअवलोकय मामकिञ्चनानां\nप्रथमं पात्रमकृत्रिमं दयायाः ॥ २० ॥","rom":"Kamale kamalaakshavallabhe tvam\nKarunaapooratarangitairapaangaih |\nAvalokaya maamakinchanaanaam\nPrathamam paatramakrutrimam dayaayaah || 20 ||"},{"kind":"verse","n":21,"dev":"देवि प्रसीद जगदीश्वरि लोकमातः\nकल्याणगात्रि कमलेक्षणजीवनाथे ।\nदारिद्र्यभीतिहृदयं शरणागतं माम्\nआलोकय प्रतिदिनं सदयैरपाङ्गैः ॥ २१ ॥","rom":"Devi praseeda jagadeeshvari lokamaatah\nKalyaanagaatri kamalekshanajeevanaathe |\nDaaridryabheetihrudayam sharanaagatam maam\nAalokaya pratidinam sadayairapaangaih || 21 ||"},{"kind":"verse","n":22,"dev":"स्तुवन्ति ये स्तुतिभिरमूभिरन्वहं\nत्रयीमयीं त्रिभुवनमातरं रमाम् ।\nगुणाधिका गुरुतरभाग्यभागिनो\nभवन्ति ते भुवि बुधभाविताशयाः ॥ २२ ॥","rom":"Stuvanti ye stutibhiramoobhiranvaham\nTrayeemayeem tribhuvanamaataram ramaam |\nGunaadhikaa gurutarabhaagyabhaagino\nBhavanti te bhuvi budhabhaavitaashayaah || 22 ||"},{"kind":"heading","dev":"॥ इति श्रीमच्छङ्कराचार्यकृतं श्रीकनकधारास्तोत्रं सम्पूर्णम् ॥","rom":"|| Iti shreemachchhankaraachaaryakrutam shreekanakadhaaraastotram sampoornam ||"}],"verified":false,"url":"https://pocketpothi.com/texts/kanakadhara-stotra","appUrl":"https://pocketpothi.com/read?t=kanakadhara-stotra","shareUrl":"https://pocketpothi.com/p/9z"}