# Kalabhairavashtakam · कालभैरवाष्टकम्

- Type: Ashtakam
- Language: Sanskrit
- Verses: 9
- Verified: under review
- Read in the app: https://pocketpothi.com/read?t=kalabhairavashtakam
- Share link: https://pocketpothi.com/p/56
- Page: https://pocketpothi.com/texts/kalabhairavashtakam

## Text (Devanagari, with simple Roman spelling below each verse)

देवराजसेव्यमानपावनांघ्रिपङ्कजं  
व्यालयज्ञसूत्रमिन्दुशेखरं कृपाकरम् ।  
नारदादियोगिवृन्दवन्दितं दिगंबरं  
काशिकापुराधिनाथकालभैरवं भजे ॥ १ ॥  

_Devaraajasevyamaanapaavanaanghripankajam / Vyaalayajnasootramindushekharam krupaakaram | / Naaradaadiyogivrundavanditam digambaram / Kaashikaapuraadhinaathakaalabhairavam bhaje || 1 ||_

भानुकोटिभास्वरं भवाब्धितारकं परं  
नीलकण्ठमीप्सितार्थदायकं त्रिलोचनम् ।  
कालकालमंबुजाक्षमक्षशूलमक्षरं  
काशिकापुराधिनाथकालभैरवं भजे ॥ २ ॥  

_Bhaanukotibhaasvaram bhavaabdhitaarakam param / Neelakanthameepsitaarthadaayakam trilochanam | / Kaalakaalamambujaakshamakshashoolamaksharam / Kaashikaapuraadhinaathakaalabhairavam bhaje || 2 ||_

शूलटंकपाशदण्डपाणिमादिकारणं  
श्यामकायमादिदेवमक्षरं निरामयम् ।  
भीमविक्रमं प्रभुं विचित्रताण्डवप्रियं  
काशिकापुराधिनाथकालभैरवं भजे ॥ ३ ॥  

_Shoolatankapaashadandapaanimaadikaaranam / Shyaamakaayamaadidevamaksharam niraamayam | / Bheemavikramam prabhum vichitrataandavapriyam / Kaashikaapuraadhinaathakaalabhairavam bhaje || 3 ||_

भुक्तिमुक्तिदायकं प्रशस्तचारुविग्रहं  
भक्तवत्सलं स्थितं समस्तलोकविग्रहम् ।  
विनिक्वणन्मनोज्ञहेमकिङ्किणीलसत्कटिं  
काशिकापुराधिनाथकालभैरवं भजे ॥ ४ ॥  

_Bhuktimuktidaayakam prashastachaaruvigraham / Bhaktavatsalam sthitam samastalokavigraham | / Vinikvananmanojnahemakinkineelasatkatim / Kaashikaapuraadhinaathakaalabhairavam bhaje || 4 ||_

धर्मसेतुपालकं त्वधर्ममार्गनाशकं  
कर्मपाशमोचकं सुशर्मदायकं विभुम् ।  
स्वर्णवर्णशेषपाशशोभितांगमण्डलं  
काशिकापुराधिनाथकालभैरवं भजे ॥ ५ ॥  

_Dharmasetupaalakam tvadharmamaarganaashakam / Karmapaashamochakam susharmadaayakam vibhum | / Svarnavarnasheshapaashashobhitaangamandalam / Kaashikaapuraadhinaathakaalabhairavam bhaje || 5 ||_

रत्नपादुकाप्रभाभिरामपादयुग्मकं  
नित्यमद्वितीयमिष्टदैवतं निरंजनम् ।  
मृत्युदर्पनाशनं करालदंष्ट्रमोक्षदं  
काशिकापुराधिनाथकालभैरवं भजे ॥ ६ ॥  

_Ratnapaadukaaprabhaabhiraamapaadayugmakam / Nityamadviteeyamishtadaivatam niranjanam | / Mrutyudarpanaashanam karaaladanshtramokshadam / Kaashikaapuraadhinaathakaalabhairavam bhaje || 6 ||_

अट्टहासभिन्नपद्मजाण्डकोशसंततिं  
दृष्टिपातनष्टपापजालमुग्रशासनम् ।  
अष्टसिद्धिदायकं कपालमालिकाधरं  
काशिकापुराधिनाथकालभैरवं भजे ॥ ७ ॥  

_Attahaasabhinnapadmajaandakoshasantatim / Drushtipaatanashtapaapajaalamugrashaasanam | / Ashtasiddhidaayakam kapaalamaalikaadharam / Kaashikaapuraadhinaathakaalabhairavam bhaje || 7 ||_

भूतसंघनायकं विशालकीर्तिदायकं  
काशिवासलोकपुण्यपापशोधकं विभुम् ।  
नीतिमार्गकोविदं पुरातनं जगत्पतिं  
काशिकापुराधिनाथकालभैरवं भजे ॥ ८ ॥  

_Bhootasanghanaayakam vishaalakeertidaayakam / Kaashivaasalokapunyapaapashodhakam vibhum | / Neetimaargakovidam puraatanam jagatpatim / Kaashikaapuraadhinaathakaalabhairavam bhaje || 8 ||_

कालभैरवाष्टकं पठंति ये मनोहरं  
ज्ञानमुक्तिसाधनं विचित्रपुण्यवर्धनम् ।  
शोकमोहदैन्यलोभकोपतापनाशनं  
प्रयान्ति कालभैरवांघ्रिसन्निधिं नरा ध्रुवम् ॥ ९ ॥  

_Kaalabhairavaashtakam pathanti ye manoharam / Jnaanamuktisaadhanam vichitrapunyavardhanam | / Shokamohadainyalobhakopataapanaashanam / Prayaanti kaalabhairavaanghrisannidhim naraa dhruvam || 9 ||_

### ॥ इति श्रीमच्छङ्कराचार्यविरचितं कालभैरवाष्टकं सम्पूर्णम् ॥
_|| Iti shreemachchhankaraachaaryavirachitam kaalabhairavaashtakam sampoornam ||_