श्रीहनुमान चालीसा

श्रीगुरु चरन सरोज रज निज मनु मुकुरु सुधारि⁠ ⁠। बरनउँ रघुबर बिमल जसु जो दायकु फल चारि⁠ ⁠॥

Shreeguru charan saroj raj nij manu mukuru sudhaari | Baranaum raghubar bimal jasu jo daayaku phal chaari ||

बुद्धिहीन तनु जानिके, सुमिरौं पवन-कुमार⁠ ⁠। बल बुद्धि बिद्या देहु मोहिं, हरहु कलेस बिकार⁠ ⁠॥

Buddhiheen tanu jaanike, sumirau pavan-kumaar | Bal buddhi bidyaa dehu mohi, harahu kales bikaar ||

जय हनुमान ज्ञान गुन सागर⁠ ⁠। जय कपीस तिहुँ लोक उजागर⁠ ⁠॥⁠ ⁠१⁠ ⁠॥

Jay hanumaan gyaan gun saagar | Jay kapees tihu lok ujaagar || 1 ||

राम दूत अतुलित बल धामा⁠ ⁠। अंजनि-पुत्र पवनसुत नामा⁠ ⁠॥⁠ ⁠२⁠ ⁠॥

Raam doot atulit bal dhaamaa | Anjani-putra pavanasut naamaa || 2 ||

महाबीर बिक्रम बजरंगी⁠ ⁠। कुमति निवार सुमति के संगी⁠ ⁠॥⁠ ⁠३⁠ ⁠॥

Mahaabeer bikram bajarangee | Kumati nivaar sumati ke sangee || 3 ||

कंचन बरन बिराज सुबेसा⁠ ⁠। कानन कुंडल कुंचित केसा⁠ ⁠॥⁠ ⁠४⁠ ⁠॥

Kanchan baran biraaj subesaa | Kaanan kundal kunchit kesaa || 4 ||

हाथ बज्र औ ध्वजा बिराजै⁠ ⁠। काँधे मूँज जनेऊ साजै⁠ ⁠॥⁠ ⁠५⁠ ⁠॥

Haath bajra au dhvajaa biraajai | Kaandhe moonj janeoo saajai || 5 ||

संकर सुवन केसरीनंदन⁠ ⁠। तेज प्रताप महा जग बंदन⁠ ⁠॥⁠ ⁠६⁠ ⁠॥

Sankar suvan kesareenandan | Tej prataap mahaa jag bandan || 6 ||

बिद्यावान गुनी अति चातुर⁠ ⁠। राम काज करिबे को आतुर⁠ ⁠॥⁠ ⁠७⁠ ⁠॥

Bidyaavaan gunee ati chaatur | Raam kaaj karibe ko aatur || 7 ||

प्रभु चरित्र सुनिबे को रसिया⁠ ⁠। राम लखन सीता मन बसिया⁠ ⁠॥⁠ ⁠८⁠ ⁠॥

Prabhu charitra sunibe ko rasiyaa | Raam lakhan seetaa man basiyaa || 8 ||

सूक्ष्म रूप धरि सियहिं दिखावा⁠ ⁠। बिकट रूप धरि लंक जरावा⁠ ⁠॥⁠ ⁠९⁠ ⁠॥

Sookshma roop dhari siyahi dikhaavaa | Bikat roop dhari lank jaraavaa || 9 ||

भीम रूप धरि असुर सँहारे⁠ ⁠। रामचंद्र के काज सँवारे⁠ ⁠॥⁠ ⁠१०⁠ ⁠॥

Bheem roop dhari asur sanhaare | Raamachandra ke kaaj sanvaare || 10 ||

लाय सजीवन लखन जियाये⁠ ⁠। श्रीरघुबीर हरषि उर लाये⁠ ⁠॥⁠ ⁠११⁠ ⁠॥

Laay sajeevan lakhan jiyaaye | Shreeraghubeer harashi ur laaye || 11 ||

रघुपति कीन्ही बहुत बड़ाई⁠ ⁠। तुम मम प्रिय भरतहि सम भाई⁠ ⁠॥⁠ ⁠१२⁠ ⁠॥

Raghupati keenhee bahut baraaee | Tum mam priy bharatahi sam bhaaee || 12 ||

सहस बदन तुम्हरो जस गावैं⁠ ⁠। अस कहि श्रीपति कंठ लगावैं⁠ ⁠॥⁠ ⁠१३⁠ ⁠॥

Sahas badan tumharo jas gaavai | As kahi shreepati kanth lagaavai || 13 ||

सनकादिक ब्रह्मादि मुनीसा⁠ ⁠। नारद सारद सहित अहीसा⁠ ⁠॥⁠ ⁠१४⁠ ⁠॥

Sanakaadik brahmaadi muneesaa | Naarad saarad sahit aheesaa || 14 ||

जम कुबेर दिगपाल जहाँ ते⁠ ⁠। कबि कोबिद कहि सके कहाँ ते⁠ ⁠॥⁠ ⁠१५⁠ ⁠॥

Jam kuber digapaal jahaa te | Kabi kobid kahi sake kahaa te || 15 ||

तुम उपकार सुग्रीवहिं कीन्हा⁠ ⁠। राम मिलाय राज पद दीन्हा⁠ ⁠॥⁠ ⁠१६⁠ ⁠॥

Tum upakaar sugreevahi keenhaa | Raam milaay raaj pad deenhaa || 16 ||

तुम्हरो मन्त्र बिभीषन माना⁠ ⁠। लंकेस्वर भए सब जग जाना⁠ ⁠॥⁠ ⁠१७⁠ ⁠॥

Tumharo mantra bibheeshan maanaa | Lankesvar bhae sab jag jaanaa || 17 ||

जुग सहस्र जोजन पर भानू⁠ ⁠। लील्यो ताहि मधुर फल जानू⁠ ⁠॥⁠ ⁠१८⁠ ⁠॥

Jug sahasra jojan par bhaanoo | Leelyo taahi madhur phal jaanoo || 18 ||

प्रभु मुद्रिका मेलि मुख माहीं⁠ ⁠। जलधि लाँघि गये अचरज नाहीं⁠ ⁠॥⁠ ⁠१९⁠ ⁠॥

Prabhu mudrikaa meli mukh maahee | Jaladhi laanghi gaye acharaj naahee || 19 ||

दुर्गम काज जगत के जेते⁠ ⁠। सुगम अनुग्रह तुम्हरे तेते⁠ ⁠॥⁠ ⁠२०⁠ ⁠॥

Durgam kaaj jagat ke jete | Sugam anugrah tumhare tete || 20 ||

राम दुआरे तुम रखवारे⁠ ⁠। होत न आज्ञा बिनु पैसारे⁠ ⁠॥⁠ ⁠२१⁠ ⁠॥

Raam duaare tum rakhavaare | Hot na aagyaa binu paisaare || 21 ||

सब सुख लहै तुम्हारी सरना⁠ ⁠। तुम रच्छक काहू को डर ना⁠ ⁠॥⁠ ⁠२२⁠ ⁠॥

Sab sukh lahai tumhaaree saranaa | Tum rachchhak kaahoo ko dar naa || 22 ||

आपन तेज सम्हारो आपै⁠ ⁠। तीनों लोक हाँक तें काँपै⁠ ⁠॥⁠ ⁠२३⁠ ⁠॥

Aapan tej samhaaro aapai | Teeno lok haank te kaampai || 23 ||

भूत पिसाच निकट नहिं आवै⁠ ⁠। महाबीर जब नाम सुनावै⁠ ⁠॥⁠ ⁠२४⁠ ⁠॥

Bhoot pisaach nikat nahi aavai | Mahaabeer jab naam sunaavai || 24 ||

नासै रोग हरै सब पीरा⁠ ⁠। जपत निरंतर हनुमत बीरा⁠ ⁠॥⁠ ⁠२५⁠ ⁠॥

Naasai rog harai sab peeraa | Japat nirantar hanumat beeraa || 25 ||

संकट तें हनुमान छुड़ावै⁠ ⁠। मन क्रम बचन ध्यान जो लावै⁠ ⁠॥⁠ ⁠२६⁠ ⁠॥

Sankat te hanumaan chhuraavai | Man kram bachan dhyaan jo laavai || 26 ||

सब पर राम तपस्वी राजा⁠ ⁠। तिन के काज सकल तुम साजा⁠ ⁠॥⁠ ⁠२७⁠ ⁠॥

Sab par raam tapasvee raajaa | Tin ke kaaj sakal tum saajaa || 27 ||

और मनोरथ जो कोई लावै⁠ ⁠। सोइ अमित जीवन फल पावै⁠ ⁠॥⁠ ⁠२८⁠ ⁠॥

Aur manorath jo koee laavai | Soi amit jeevan phal paavai || 28 ||

चारों जुग परताप तुम्हारा⁠ ⁠। है परसिद्ध जगत उजियारा⁠ ⁠॥⁠ ⁠२९⁠ ⁠॥

Chaaro jug parataap tumhaaraa | Hai parasiddha jagat ujiyaaraa || 29 ||

साधु संत के तुम रखवारे⁠ ⁠। असुर निकंदन राम दुलारे⁠ ⁠॥⁠ ⁠३०⁠ ⁠॥

Saadhu sant ke tum rakhavaare | Asur nikandan raam dulaare || 30 ||

अष्ट सिद्धि नौ निधि के दाता⁠ ⁠। अस बर दीन जानकी माता⁠ ⁠॥⁠ ⁠३१⁠ ⁠॥

Ashta siddhi nau nidhi ke daataa | As bar deen jaanakee maataa || 31 ||

राम रसायन तुम्हरे पासा⁠ ⁠। सदा रहो रघुपति के दासा⁠ ⁠॥⁠ ⁠३२⁠ ⁠॥

Raam rasaayan tumhare paasaa | Sadaa raho raghupati ke daasaa || 32 ||

तुम्हरे भजन राम को पावै⁠ ⁠। जनम जनम के दुख बिसरावै⁠ ⁠॥⁠ ⁠३३⁠ ⁠॥

Tumhare bhajan raam ko paavai | Janam janam ke dukh bisaraavai || 33 ||

अंत काल रघुबर पुर जाई⁠ ⁠। जहाँ जन्म हरि-भक्त कहाई⁠ ⁠॥⁠ ⁠३४⁠ ⁠॥

Ant kaal raghubar pur jaaee | Jahaa janma hari-bhakta kahaaee || 34 ||

और देवता चित्त न धरई⁠ ⁠। हनुमत सेइ सर्ब सुख करई⁠ ⁠॥⁠ ⁠३५⁠ ⁠॥

Aur devataa chitta na dharaee | Hanumat sei sarba sukh karaee || 35 ||

संकट कटै मिटै सब पीरा⁠ ⁠। जो सुमिरै हनुमत बलबीरा⁠ ⁠॥⁠ ⁠३६⁠ ⁠॥

Sankat katai mitai sab peeraa | Jo sumirai hanumat balabeeraa || 36 ||

जै जै जै हनुमान गोसाईं⁠ ⁠। कृपा करहु गुरु देव की नाईं⁠ ⁠॥⁠ ⁠३७⁠ ⁠॥

Jai jai jai hanumaan gosaaeem | Krupaa karahu guru dev kee naaeem || 37 ||

जो सत बार पाठ कर कोई⁠ ⁠। छूटहि बंदि महा सुख होई⁠ ⁠॥⁠ ⁠३८⁠ ⁠॥

Jo sat baar paath kar koee | Chhootahi bandi mahaa sukh hoee || 38 ||

जो यह पढ़ै हनुमान चलीसा⁠ ⁠। होय सिद्धि साखी गौरीसा⁠ ⁠॥⁠ ⁠३९⁠ ⁠॥

Jo yah parhai hanumaan chaleesaa | Hoy siddhi saakhee gaureesaa || 39 ||

तुलसीदास सदा हरि चेरा⁠ ⁠। कीजै नाथ हृदय महँ डेरा⁠ ⁠॥⁠ ⁠४०⁠ ⁠॥

Tulaseedaas sadaa hari cheraa | Keejai naath hruday maham deraa || 40 ||

पवनतनय संकट हरन, मंगल मूरति रूप⁠ ⁠। राम लखन सीता सहित, हृदय बसहु सुर भूप⁠ ⁠॥

Pavanatanay sankat haran, mangal moorati roop | Raam lakhan seetaa sahit, hruday basahu sur bhoop ||