अखण्डमण्डलाकारं व्याप्तं येन चराचरम् । तत्पदं दर्शितं येन तस्मै श्रीगुरवे नमः ॥ १ ॥
Akhandamandalaakaaram vyaaptam yena charaacharam | Tatpadam darshitam yena tasmai shreegurave namah || 1 ||
अज्ञानतिमिरान्धस्य ज्ञानाञ्जनशलाकया । चक्षुरुन्मीलितं येन तस्मै श्रीगुरवे नमः ॥ २ ॥
Ajnaanatimiraandhasya jnaanaanjanashalaakayaa | Chakshurunmeelitam yena tasmai shreegurave namah || 2 ||
गुरुर्ब्रह्मा गुरुर्विष्णुः गुरुर्देवो महेश्वरः । गुरुरेव परं ब्रह्म तस्मै श्रीगुरवे नमः ॥ ३ ॥
Gururbrahmaa gururvishnuh gururdevo maheshvarah | Gurureva param brahma tasmai shreegurave namah || 3 ||
स्थावरं जङ्गमं व्याप्तं यत्किञ्चित्सचराचरम् । तत्पदं दर्शितं येन तस्मै श्रीगुरवे नमः ॥ ४ ॥
Sthaavaram jangamam vyaaptam yatkinchitsacharaacharam | Tatpadam darshitam yena tasmai shreegurave namah || 4 ||
चिन्मयं व्यापि यत्सर्वं त्रैलोक्यं सचराचरम् । तत्पदं दर्शितं येन तस्मै श्रीगुरवे नमः ॥ ५ ॥
Chinmayam vyaapi yatsarvam trailokyam sacharaacharam | Tatpadam darshitam yena tasmai shreegurave namah || 5 ||
सर्वश्रुतिशिरोरत्नविराजितपदाम्बुजः । वेदान्ताम्बुजसूर्यो यः तस्मै श्रीगुरवे नमः ॥ ६ ॥
Sarvashrutishiroratnaviraajitapadaambujah | Vedaantaambujasooryo yah tasmai shreegurave namah || 6 ||
चैतन्यः शाश्वतः शान्तः व्योमातीतो निरञ्जनः । बिन्दुनादकलातीतः तस्मै श्रीगुरवे नमः ॥ ७ ॥
Chaitanyah shaashvatah shaantah vyomaateeto niranjanah | Bindunaadakalaateetah tasmai shreegurave namah || 7 ||
ज्ञानशक्तिसमारूढः तत्त्वमालाविभूषितः । भुक्तिमुक्तिप्रदाता च तस्मै श्रीगुरवे नमः ॥ ८ ॥
Jnaanashaktisamaaroodhah tattvamaalaavibhooshitah | Bhuktimuktipradaataa cha tasmai shreegurave namah || 8 ||
अनेकजन्मसम्प्राप्तकर्मबन्धविदाहिने । आत्मज्ञानप्रदानेन तस्मै श्रीगुरवे नमः ॥ ९ ॥
Anekajanmasampraaptakarmabandhavidaahine | Aatmajnaanapradaanena tasmai shreegurave namah || 9 ||
शोषणं भवसिन्धोश्च ज्ञापनं सारसम्पदः । गुरोः पादोदकं सम्यक् तस्मै श्रीगुरवे नमः ॥ १० ॥
Shoshanam bhavasindhoshcha jnaapanam saarasampadah | Guroh paadodakam samyak tasmai shreegurave namah || 10 ||
न गुरोरधिकं तत्त्वं न गुरोरधिकं तपः । तत्त्वज्ञानात् परं नास्ति तस्मै श्रीगुरवे नमः ॥ ११ ॥
Na guroradhikam tattvam na guroradhikam tapah | Tattvajnaanaat param naasti tasmai shreegurave namah || 11 ||
मन्नाथः श्रीजगन्नाथः मद्गुरुः श्रीजगद्गुरुः । मदात्मा सर्वभूतात्मा तस्मै श्रीगुरवे नमः ॥ १२ ॥
Mannaathah shreejagannaathah madguruh shreejagadguruh | Madaatmaa sarvabhootaatmaa tasmai shreegurave namah || 12 ||
गुरुरादिरनादिश्च गुरुः परमदैवतम् । गुरोः परतरं नास्ति तस्मै श्रीगुरवे नमः ॥ १३ ॥
Gururaadiranaadishcha guruh paramadaivatam | Guroh parataram naasti tasmai shreegurave namah || 13 ||
त्वमेव माता च पिता त्वमेव । त्वमेव बन्धुश्च सखा त्वमेव । त्वमेव विद्या द्रविणं त्वमेव । त्वमेव सर्वं मम देवदेव ॥ १४ ॥
Tvameva maataa cha pitaa tvameva | tvameva bandhushcha sakhaa tvameva | Tvameva vidyaa dravinam tvameva | tvameva sarvam mama devadeva || 14 ||