# Gita Dhyanam · गीताध्यानम्

- Type: Shloka
- Language: Sanskrit
- Verses: 9
- Verified: under review
- Read in the app: https://pocketpothi.com/read?t=gita-dhyanam
- Share link: https://pocketpothi.com/p/6c
- Page: https://pocketpothi.com/texts/gita-dhyanam

## Text (Devanagari, with simple Roman spelling below each verse)

ॐ पार्थाय प्रतिबोधितां भगवता नारायणेन स्वयं  
व्यासेन ग्रथितां पुराणमुनिना मध्ये महाभारते ।  
अद्वैतामृतवर्षिणीं भगवतीमष्टादशाध्यायिनीं  
अम्ब त्वामनुसन्दधामि भगवद्गीते भवद्वेषिणीम् ॥ १ ॥  

_Om paarthaaya pratibodhitaam bhagavataa naaraayanena svayam / Vyaasena grathitaam puraanamuninaa madhye mahaabhaarate | / Advaitaamrutavarshineem bhagavateemashtaadashaadhyaayineem / Amba tvaamanusandadhaami bhagavadgeete bhavadveshineem || 1 ||_

नमोऽस्तु ते व्यास विशालबुद्धे  
फुल्लारविन्दायतपत्रनेत्र ।  
येन त्वया भारततैलपूर्णः  
प्रज्वालितो ज्ञानमयः प्रदीपः ॥ २ ॥  

_Namo'stu te vyaasa vishaalabuddhe / Phullaaravindaayatapatranetra | / Yena tvayaa bhaaratatailapoornah / Prajvaalito jnaanamayah pradeepah || 2 ||_

प्रपन्नपारिजाताय तोत्रवेत्रैकपाणये ।  
ज्ञानमुद्राय कृष्णाय गीतामृतदुहे नमः ॥ ३ ॥  

_Prapannapaarijaataaya totravetraikapaanaye | / Jnaanamudraaya krushnaaya geetaamrutaduhe namah || 3 ||_

सर्वोपनिषदो गावो दोग्धा गोपालनन्दनः ।  
पार्थो वत्सः सुधीर्भोक्ता दुग्धं गीतामृतं महत् ॥ ४ ॥  

_Sarvopanishado gaavo dogdhaa gopaalanandanah | / Paartho vatsah sudheerbhoktaa dugdham geetaamrutam mahat || 4 ||_

वसुदेवसुतं देवं कंसचाणूरमर्दनम् ।  
देवकी परमानन्दं कृष्णं वन्दे जगद्गुरुम् ॥ ५ ॥  

_Vasudevasutam devam kansachaanooramardanam | / Devakee paramaanandam krushnam vande jagadgurum || 5 ||_

भीष्मद्रोणतटा जयद्रथजला गान्धारनीलोत्पला  
शल्यग्राहवती कृपेण वहनी कर्णेन वेलाकुला ।  
अश्वत्थामविकर्णघोरमकरा दुर्योधनावर्तिनी  
सोत्तीर्णा खलु पाण्डवैः रणनदी कैवर्तकः केशवः ॥ ६ ॥  

_Bheeshmadronatataa jayadrathajalaa gaandhaaraneelotpalaa / Shalyagraahavatee krupena vahanee karnena velaakulaa | / Ashvatthaamavikarnaghoramakaraa duryodhanaavartinee / Sotteernaa khalu paandavaih rananadee kaivartakah keshavah || 6 ||_

पाराशर्यवचः सरोजममलं गीतार्थगन्धोत्कटं  
नानाख्यानककेसरं हरिकथासम्बोधनाबोधितम् ।  
लोके सज्जनषट्पदैरहरहः पेपीयमानं मुदा  
भूयाद्भारतपङ्कजं कलिमलप्रध्वंसिनः श्रेयसे ॥ ७ ॥  

_Paaraasharyavachah sarojamamalam geetaarthagandhotkatam / Naanaakhyaanakakesaram harikathaasambodhanaabodhitam | / Loke sajjanashatpadairaharahah pepeeyamaanam mudaa / Bhooyaadbhaaratapankajam kalimalapradhvansinah shreyase || 7 ||_

मूकं करोति वाचालं पङ्गुं लङ्घयते गिरिम् ।  
यत्कृपा तमहं वन्दे परमानन्दमाधवम् ॥ ८ ॥  

_Mookam karoti vaachaalam pangum langhayate girim | / Yatkrupaa tamaham vande paramaanandamaadhavam || 8 ||_

यं ब्रह्मा वरुणेन्द्ररुद्रमरुतः स्तुन्वन्ति दिव्यैः स्तवै-  
-र्वेदैः साङ्गपदक्रमोपनिषदैर्गायन्ति यं सामगाः ।  
ध्यानावस्थिततद्गतेन मनसा पश्यन्ति यं योगिनो  
यस्यान्तं न विदुः सुरासुरगणा देवाय तस्मै नमः ॥ ९ ॥  

_Yam brahmaa varunendrarudramarutah stunvanti divyaih stavai- / -rvedaih saangapadakramopanishadairgaayanti yam saamagaah | / Dhyaanaavasthitatadgatena manasaa pashyanti yam yogino / Yasyaantam na viduh suraasuraganaa devaaya tasmai namah || 9 ||_