{"id":"bhaja-govindam","code":"5p","title":{"dev":"भज गोविन्दम्","rom":"Bhaja Govindam"},"type":"stotra","typeLabel":"Stotra","language":"sa","languageName":"Sanskrit","deity":["krishna"],"aliases":["Moha Mudgara"],"verses":34,"sections":[{"kind":"heading","dev":"भज गोविन्दं","rom":"Bhaja govindam"},{"kind":"verse","n":1,"dev":"भज गोविन्दं भज गोविन्दं\nगोविन्दं भज मूढमते ।\nसम्प्राप्ते सन्निहिते काले\nनहि नहि रक्षति डुकृङ्करणे ॥ १ ॥","rom":"Bhaja govindam bhaja govindam\nGovindam bhaja moodhamate |\nSampraapte sannihite kaale\nNahi nahi rakshati dukrunkarane || 1 ||"},{"kind":"verse","n":2,"dev":"मूढ जहीहि धनागमतृष्णां\nकुरु सद्बुद्धिं मनसि वितृष्णाम् ।\nयल्लभसे निजकर्मोपात्तं\nवित्तं तेन विनोदय चित्तम् ॥ २ ॥","rom":"Moodha jaheehi dhanaagamatrushnaam\nKuru sadbuddhim manasi vitrushnaam |\nYallabhase nijakarmopaattam\nVittam tena vinodaya chittam || 2 ||"},{"kind":"verse","n":3,"dev":"नारीस्तनभरनाभीदेशं\nदृष्ट्वा मा गा मोहावेशम् ।\nएतन्मांसवसादिविकारं\nमनसि विचिन्तय वारं वारम् ॥ ३ ॥","rom":"Naareestanabharanaabheedesham\nDrushtvaa maa gaa mohaavesham |\nEtanmaansavasaadivikaaram\nManasi vichintaya vaaram vaaram || 3 ||"},{"kind":"verse","n":4,"dev":"नलिनीदलगतजलमतितरलं\nतद्वज्जीवितमतिशयचपलम् ।\nविद्धि व्याध्यभिमानग्रस्तं\nलोकं शोकहतं च समस्तम् ॥ ४ ॥","rom":"Nalineedalagatajalamatitaralam\nTadvajjeevitamatishayachapalam |\nViddhi vyaadhyabhimaanagrastam\nLokam shokahatam cha samastam || 4 ||"},{"kind":"verse","n":5,"dev":"यावद्वित्तोपार्जनसक्त-\nस्तावन्निजपरिवारो रक्तः ।\nपश्चाज्जीवति जर्जरदेहे\nवार्तां कोऽपि न पृच्छति गेहे ॥ ५ ॥","rom":"Yaavadvittopaarjanasakta-\nStaavannijaparivaaro raktah |\nPashchaajjeevati jarjaradehe\nVaartaam ko'pi na pruchchhati gehe || 5 ||"},{"kind":"verse","n":6,"dev":"यावत्पवनो निवसति देहे\nतावत्पृच्छति कुशलं गेहे ।\nगतवति वायौ देहापाये\nभार्या बिभ्यति तस्मिन्काये ॥ ६ ॥","rom":"Yaavatpavano nivasati dehe\nTaavatpruchchhati kushalam gehe |\nGatavati vaayau dehaapaaye\nBhaaryaa bibhyati tasminkaaye || 6 ||"},{"kind":"verse","n":7,"dev":"बालस्तावत्क्रीडासक्तः\nतरुणस्तावत्तरुणीसक्तः ।\nवृद्धस्तावच्चिन्तासक्तः\nपरमे ब्रह्मणि कोऽपि न सक्तः ॥ ७ ॥","rom":"Baalastaavatkreedaasaktah\nTarunastaavattaruneesaktah |\nVruddhastaavachchintaasaktah\nParame brahmani ko'pi na saktah || 7 ||"},{"kind":"verse","n":8,"dev":"का ते कान्ता कस्ते पुत्रः\nसंसारोऽयमतीव विचित्रः ।\nकस्य त्वं कः कुत आयात-\nस्तत्त्वं चिन्तय तदिह भ्रातः ॥ ८ ॥","rom":"Kaa te kaantaa kaste putrah\nSansaaro'yamateeva vichitrah |\nKasya tvam kah kuta aayaata-\nStattvam chintaya tadiha bhraatah || 8 ||"},{"kind":"verse","n":9,"dev":"सत्सङ्गत्वे निस्सङ्गत्वं\nनिस्सङ्गत्वे निर्मोहत्वम् ।\nनिर्मोहत्वे निश्चलतत्त्वं\nनिश्चलतत्त्वे जीवन्मुक्तिः ॥ ९ ॥","rom":"Satsangatve nissangatvam\nNissangatve nirmohatvam |\nNirmohatve nishchalatattvam\nNishchalatattve jeevanmuktih || 9 ||"},{"kind":"verse","n":10,"dev":"वयसि गते कः कामविकारः\nशुष्के नीरे कः कासारः ।\nक्षीणे वित्ते कः परिवारः\nज्ञाते तत्त्वे कः संसारः ॥ १० ॥","rom":"Vayasi gate kah kaamavikaarah\nShushke neere kah kaasaarah |\nKsheene vitte kah parivaarah\nJnaate tattve kah sansaarah || 10 ||"},{"kind":"verse","n":11,"dev":"मा कुरु धनजनयौवनगर्वं\nहरति निमेषात्कालः सर्वम् ।\nमायामयमिदमखिलं हित्वा\nब्रह्मपदं त्वं प्रविश विदित्वा ॥ ११ ॥","rom":"Maa kuru dhanajanayauvanagarvam\nHarati nimeshaatkaalah sarvam |\nMaayaamayamidamakhilam hitvaa\nBrahmapadam tvam pravisha viditvaa || 11 ||"},{"kind":"verse","n":12,"dev":"दिनयामिन्यौ सायं प्रातः\nशिशिरवसन्तौ पुनरायातः ।\nकालः क्रीडति गच्छत्यायु-\nस्तदपि न मुञ्चत्याशावायुः ॥ १२ ॥","rom":"Dinayaaminyau saayam praatah\nShishiravasantau punaraayaatah |\nKaalah kreedati gachchhatyaayu-\nStadapi na munchatyaashaavaayuh || 12 ||"},{"kind":"verse","n":13,"dev":"का ते कान्ता धनगतचिन्ता\nवातुल किं तव नास्ति नियन्ता ।\nत्रिजगति सज्जनसङ्गतिरेका\nभवति भवार्णवतरणे नौका ॥ १३ ॥","rom":"Kaa te kaantaa dhanagatachintaa\nVaatula kim tava naasti niyantaa |\nTrijagati sajjanasangatirekaa\nBhavati bhavaarnavatarane naukaa || 13 ||"},{"kind":"verse","n":14,"dev":"द्वादशमञ्जरिकाभिरशेषः\nकथितो वैयाकरणस्यैषः ।\nउपदेशोऽभूद्विद्यानिपुणैः\nश्रीमच्छङ्करभगवच्छरणैः ॥ १४ ॥","rom":"Dvaadashamanjarikaabhirasheshah\nKathito vaiyaakaranasyaishah |\nUpadesho'bhoodvidyaanipunaih\nShreemachchhankarabhagavachchharanaih || 14 ||"},{"kind":"verse","n":15,"dev":"जटिलो मुण्डी लुञ्छितकेशः\nकाषायाम्बरबहुकृतवेषः ।\nपश्यन्नपि च न पश्यति मूढो\nह्युदरनिमित्तं बहुकृतवेषः ॥ १५ ॥","rom":"Jatilo mundee lunchhitakeshah\nKaashaayaambarabahukrutaveshah |\nPashyannapi cha na pashyati moodho\nHyudaranimittam bahukrutaveshah || 15 ||"},{"kind":"verse","n":16,"dev":"अङ्गं गलितं पलितं मुण्डं\nदशनविहीनं जातं तुण्डम् ।\nवृद्धो याति गृहीत्वा दण्डं\nतदपि न मुञ्चत्याशापिण्डम् ॥ १६ ॥","rom":"Angam galitam palitam mundam\nDashanaviheenam jaatam tundam |\nVruddho yaati gruheetvaa dandam\nTadapi na munchatyaashaapindam || 16 ||"},{"kind":"verse","n":17,"dev":"अग्रे वह्निः पृष्ठे भानुः\nरात्रौ चुबुकसमर्पितजानुः ।\nकरतलभिक्षस्तरुतलवास-\nस्तदपि न मुञ्चत्याशापाशः ॥ १७ ॥","rom":"Agre vahnih prushthe bhaanuh\nRaatrau chubukasamarpitajaanuh |\nKaratalabhikshastarutalavaasa-\nStadapi na munchatyaashaapaashah || 17 ||"},{"kind":"verse","n":18,"dev":"कुरुते गङ्गासागरगमनं\nव्रतपरिपालनमथवा दानम् ।\nज्ञानविहीनः सर्वमतेन\nमुक्तिं न भजति जन्मशतेन ॥ १८ ॥","rom":"Kurute gangaasaagaragamanam\nVrataparipaalanamathavaa daanam |\nJnaanaviheenah sarvamatena\nMuktim na bhajati janmashatena || 18 ||"},{"kind":"verse","n":19,"dev":"सुरमंदिरतरुमूलनिवासः\nशय्या भूतलमजिनं वासः ।\nसर्वपरिग्रहभोगत्यागः\nकस्य सुखं न करोति विरागः ॥ १९ ॥","rom":"Suramandiratarumoolanivaasah\nShayyaa bhootalamajinam vaasah |\nSarvaparigrahabhogatyaagah\nKasya sukham na karoti viraagah || 19 ||"},{"kind":"verse","n":20,"dev":"योगरतो वा भोगरतो वा\nसङ्गरतो वा सङ्गविहीनः ।\nयस्य ब्रह्मणि रमते चित्तं\nनन्दति नन्दति नन्दत्येव ॥ २० ॥","rom":"Yogarato vaa bhogarato vaa\nSangarato vaa sangaviheenah |\nYasya brahmani ramate chittam\nNandati nandati nandatyeva || 20 ||"},{"kind":"verse","n":21,"dev":"भगवद्गीता किञ्चिदधीता\nगङ्गाजललवकणिका पीता ।\nसकृदपि येन मुरारिसमर्चा\nक्रियते तस्य यमेन न चर्चा ॥ २१ ॥","rom":"Bhagavadgeetaa kinchidadheetaa\nGangaajalalavakanikaa peetaa |\nSakrudapi yena muraarisamarchaa\nKriyate tasya yamena na charchaa || 21 ||"},{"kind":"verse","n":22,"dev":"पुनरपि जननं पुनरपि मरणं\nपुनरपि जननीजठरे शयनम् ।\nइह संसारे बहुदुस्तारे\nकृपयाऽपारे पाहि मुरारे ॥ २२ ॥","rom":"Punarapi jananam punarapi maranam\nPunarapi jananeejathare shayanam |\nIha sansaare bahudustaare\nKrupayaa'paare paahi muraare || 22 ||"},{"kind":"verse","n":23,"dev":"रथ्याचर्पटविरचितकन्थः\nपुण्यापुण्यविवर्जितपन्थः ।\nयोगी योगनियोजितचित्तो\nरमते बालोन्मत्तवदेव ॥ २३ ॥","rom":"Rathyaacharpatavirachitakanthah\nPunyaapunyavivarjitapanthah |\nYogee yoganiyojitachitto\nRamate baalonmattavadeva || 23 ||"},{"kind":"verse","n":24,"dev":"कस्त्वं कोऽहं कुत आयातः\nका मे जननी को मे तातः ।\nइति परिभावय सर्वमसारम्\nविश्वं त्यक्त्वा स्वप्नविचारम् ॥ २४ ॥","rom":"Kastvam ko'ham kuta aayaatah\nKaa me jananee ko me taatah |\nIti paribhaavaya sarvamasaaram\nVishvam tyaktvaa svapnavichaaram || 24 ||"},{"kind":"verse","n":25,"dev":"त्वयि मयि चान्यत्रैको विष्णु-\nर्व्यर्थं कुप्यसि मय्यसहिष्णुः ।\nभव समचित्तः सर्वत्र त्वं\nवाञ्छस्यचिराद्यदि विष्णुत्वम् ॥ २५ ॥","rom":"Tvayi mayi chaanyatraiko vishnu-\nRvyartham kupyasi mayyasahishnuh |\nBhava samachittah sarvatra tvam\nVaanchhasyachiraadyadi vishnutvam || 25 ||"},{"kind":"verse","n":26,"dev":"शत्रौ मित्रे पुत्रे बन्धौ\nमा कुरु यत्नं विग्रहसन्धौ ।\nसर्वस्मिन्नपि पश्यात्मानं\nसर्वत्रोत्सृज भेदाज्ञानम् ॥ २६ ॥","rom":"Shatrau mitre putre bandhau\nMaa kuru yatnam vigrahasandhau |\nSarvasminnapi pashyaatmaanam\nSarvatrotsruja bhedaajnaanam || 26 ||"},{"kind":"verse","n":27,"dev":"कामं क्रोधं लोभं मोहं\nत्यक्त्वाऽऽत्मानं भावय कोऽहम् ।\nआत्मज्ञानविहीना मूढा-\nस्ते पच्यन्ते नरकनिगूढाः ॥ २७ ॥","rom":"Kaamam krodham lobham moham\nTyaktvaa''tmaanam bhaavaya ko'ham |\nAatmajnaanaviheenaa moodhaa-\nSte pachyante narakanigoodhaah || 27 ||"},{"kind":"verse","n":28,"dev":"गेयं गीतानामसहस्रं\nध्येयं श्रीपतिरूपमजस्रम् ।\nनेयं सज्जनसङ्गे चित्तं\nदेयं दीनजनाय च वित्तम् ॥ २८ ॥","rom":"Geyam geetaanaamasahasram\nDhyeyam shreepatiroopamajasram |\nNeyam sajjanasange chittam\nDeyam deenajanaaya cha vittam || 28 ||"},{"kind":"verse","n":29,"dev":"सुखतः क्रियते रामाभोगः\nपश्चाद्धन्त शरीरे रोगः ।\nयद्यपि लोके मरणं शरणं\nतदपि न मुञ्चति पापाचरणम् ॥ २९ ॥","rom":"Sukhatah kriyate raamaabhogah\nPashchaaddhanta shareere rogah |\nYadyapi loke maranam sharanam\nTadapi na munchati paapaacharanam || 29 ||"},{"kind":"verse","n":30,"dev":"अर्थमनर्थं भावय नित्यं\nनास्तिततः सुखलेशः सत्यम् ।\nपुत्रादपि धनभाजां भीतिः\nसर्वत्रैषा विहिता रीतिः ॥ ३० ॥","rom":"Arthamanartham bhaavaya nityam\nNaastitatah sukhaleshah satyam |\nPutraadapi dhanabhaajaam bheetih\nSarvatraishaa vihitaa reetih || 30 ||"},{"kind":"verse","n":31,"dev":"प्राणायामं प्रत्याहारं\nनित्यानित्य विवेकविचारम् ।\nजाप्यसमेतसमाधिविधानं\nकुर्ववधानं महदवधानम् ॥ ३१ ॥","rom":"Praanaayaamam pratyaahaaram\nNityaanitya vivekavichaaram |\nJaapyasametasamaadhividhaanam\nKurvavadhaanam mahadavadhaanam || 31 ||"},{"kind":"verse","n":32,"dev":"गुरुचरणाम्बुजनिर्भरभक्तः\nसंसारादचिराद्भव मुक्तः ।\nसेन्द्रियमानसनियमादेवं\nद्रक्ष्यसि निजहृदयस्थं देवम् ॥ ३२ ॥","rom":"Gurucharanaambujanirbharabhaktah\nSansaaraadachiraadbhava muktah |\nSendriyamaanasaniyamaadevam\nDrakshyasi nijahrudayastham devam || 32 ||"},{"kind":"verse","n":33,"dev":"मूढः कश्चन वैयाकरणो\nडुःकृङ्करणाध्ययनधुरीणः ।\nश्रीमच्छङ्करभगवच्छिष्यै-\nर्बोधित आसीच्छोधितकरणः ॥ ३३ ॥","rom":"Moodhah kashchana vaiyaakarano\nDuhkrunkaranaadhyayanadhureenah |\nShreemachchhankarabhagavachchhishyai-\nRbodhita aaseechchhodhitakaranah || 33 ||"},{"kind":"verse","n":34,"dev":"भज गोविन्दं भज गोविन्दं\nगोविन्दं भज मूढमते ।\nनामस्मरणादन्यमुपायं\nनहि पश्यामो भवाब्धितरणे ॥ ३४ ॥","rom":"Bhaja govindam bhaja govindam\nGovindam bhaja moodhamate |\nNaamasmaranaadanyamupaayam\nNahi pashyaamo bhavaabdhitarane || 34 ||"}],"verified":false,"url":"https://pocketpothi.com/texts/bhaja-govindam","appUrl":"https://pocketpothi.com/read?t=bhaja-govindam","shareUrl":"https://pocketpothi.com/p/5p"}