# Gita 18 · Moksha Sannyasa Yoga · गीता १८ · मोक्षसंन्यासयोगः

- Type: Chapter (chapter 18 of the Shrimad Bhagavad Gita)
- Language: Sanskrit
- Verses: 78
- Verified: yes
- Read in the app: https://pocketpothi.com/read?t=bhagavad-gita-18
- Share link: https://pocketpothi.com/p/fp
- Page: https://pocketpothi.com/texts/bhagavad-gita-18

## Text (Devanagari, with simple Roman spelling below each verse)

### अर्जुन उवाच
_Arjuna uvaacha_

संन्यासस्य महाबाहो तत्त्वमिच्छामि वेदितुम् ।  
त्यागस्य च हृषीकेश पृथक्केशिनिषूदन ॥ १ ॥  

_Sannyaasasya mahaabaaho tattvamichchhaami veditum | / Tyaagasya cha hrusheekesha pruthakkeshinishoodana || 1 ||_

### श्रीभगवानुवाच
_Shreebhagavaanuvaacha_

काम्यानां कर्मणां न्यासं संन्यासं कवयो विदुः ।  
सर्वकर्मफलत्यागं प्राहुस्त्यागं विचक्षणाः ॥ २ ॥  

_Kaamyaanaam karmanaam nyaasam sannyaasam kavayo viduh | / Sarvakarmaphalatyaagam praahustyaagam vichakshanaah || 2 ||_

त्याज्यं दोषवदित्येके कर्म प्राहुर्मनीषिणः ।  
यज्ञदानतपःकर्म न त्याज्यमिति चापरे ॥ ३ ॥  

_Tyaajyam doshavadityeke karma praahurmaneeshinah | / Yajnadaanatapahkarma na tyaajyamiti chaapare || 3 ||_

निश्चयं शृणु मे तत्र त्यागे भरतसत्तम ।  
त्यागो हि पुरुषव्याघ्र त्रिविधः सम्प्रकीर्तितः ॥ ४ ॥  

_Nishchayam shrunu me tatra tyaage bharatasattama | / Tyaago hi purushavyaaghra trividhah samprakeertitah || 4 ||_

यज्ञदानतपःकर्म न त्याज्यं कार्यमेव तत् ।  
यज्ञो दानं तपश्चैव पावनानि मनीषिणाम् ॥ ५ ॥  

_Yajnadaanatapahkarma na tyaajyam kaaryameva tat | / Yajno daanam tapashchaiva paavanaani maneeshinaam || 5 ||_

एतान्यपि तु कर्माणि सङ्गं त्यक्त्वा फलानि च ।  
कर्तव्यानीति मे पार्थ निश्चितं मतमुत्तमम् ॥ ६ ॥  

_Etaanyapi tu karmaani sangam tyaktvaa phalaani cha | / Kartavyaaneeti me paartha nishchitam matamuttamam || 6 ||_

नियतस्य तु संन्यासः कर्मणो नोपपद्यते ।  
मोहात्तस्य परित्यागस्तामसः परिकीर्तितः ॥ ७ ॥  

_Niyatasya tu sannyaasah karmano nopapadyate | / Mohaattasya parityaagastaamasah parikeertitah || 7 ||_

दुःखमित्येव यत्कर्म कायक्लेशभयात्त्यजेत् ।  
स कृत्वा राजसं त्यागं नैव त्यागफलं लभेत् ॥ ८ ॥  

_Duhkhamityeva yatkarma kaayakleshabhayaattyajet | / Sa krutvaa raajasam tyaagam naiva tyaagaphalam labhet || 8 ||_

कार्यमित्येव यत्कर्म नियतं क्रियतेऽर्जुन ।  
सङ्गं त्यक्त्वा फलं चैव स त्यागः सात्त्विको मतः ॥ ९ ॥  

_Kaaryamityeva yatkarma niyatam kriyate'rjuna | / Sangam tyaktvaa phalam chaiva sa tyaagah saattviko matah || 9 ||_

न द्वेष्ट्यकुशलं कर्म कुशले नानुषज्जते ।  
त्यागी सत्त्वसमाविष्टो मेधावी छिन्नसंशयः ॥ १० ॥  

_Na dveshtyakushalam karma kushale naanushajjate | / Tyaagee sattvasamaavishto medhaavee chhinnasanshayah || 10 ||_

न हि देहभृता शक्यं त्यक्तुं कर्माण्यशेषतः ।  
यस्तु कर्मफलत्यागी स त्यागीत्यभिधीयते ॥ ११ ॥  

_Na hi dehabhrutaa shakyam tyaktum karmaanyasheshatah | / Yastu karmaphalatyaagee sa tyaageetyabhidheeyate || 11 ||_

अनिष्टमिष्टं मिश्रं च त्रिविधं कर्मणः फलम् ।  
भवत्यत्यागिनां प्रेत्य न तु संन्यासिनां क्वचित् ॥ १२ ॥  

_Anishtamishtam mishram cha trividham karmanah phalam | / Bhavatyatyaaginaam pretya na tu sannyaasinaam kvachit || 12 ||_

पञ्चैतानि महाबाहो कारणानि निबोध मे ।  
साङ्ख्ये कृतान्ते प्रोक्तानि सिद्धये सर्वकर्मणाम् ॥ १३ ॥  

_Panchaitaani mahaabaaho kaaranaani nibodha me | / Saankhye krutaante proktaani siddhaye sarvakarmanaam || 13 ||_

अधिष्ठानं तथा कर्ता करणं च पृथग्विधम् ।  
विविधाश्च पृथक्चेष्टा दैवं चैवात्र पञ्चमम् ॥ १४ ॥  

_Adhishthaanam tathaa kartaa karanam cha pruthagvidham | / Vividhaashcha pruthakcheshtaa daivam chaivaatra panchamam || 14 ||_

शरीरवाङ्मनोभिर्यत्कर्म प्रारभते नरः ।  
न्याय्यं वा विपरीतं वा पञ्चैते तस्य हेतवः ॥ १५ ॥  

_Shareeravaanmanobhiryatkarma praarabhate narah | / Nyaayyam vaa vipareetam vaa panchaite tasya hetavah || 15 ||_

तत्रैवं सति कर्तारमात्मानं केवलं तु यः ।  
पश्यत्यकृतबुद्धित्वान्न स पश्यति दुर्मतिः ॥ १६ ॥  

_Tatraivam sati kartaaramaatmaanam kevalam tu yah | / Pashyatyakrutabuddhitvaanna sa pashyati durmatih || 16 ||_

यस्य नाहङ्कृतो भावो बुद्धिर्यस्य न लिप्यते ।  
हत्वापि स इमाँल्लोकान्न हन्ति न निबध्यते ॥ १७ ॥  

_Yasya naahankruto bhaavo buddhiryasya na lipyate | / Hatvaapi sa imaanllokaanna hanti na nibadhyate || 17 ||_

ज्ञानं ज्ञेयं परिज्ञाता त्रिविधा कर्मचोदना ।  
करणं कर्म कर्तेति त्रिविधः कर्मसङ्ग्रहः ॥ १८ ॥  

_Jnaanam jneyam parijnaataa trividhaa karmachodanaa | / Karanam karma karteti trividhah karmasangrahah || 18 ||_

ज्ञानं कर्म च कर्ता च त्रिधैव गुणभेदतः ।  
प्रोच्यते गुणसङ्ख्याने यथावच्छृणु तान्यपि ॥ १९ ॥  

_Jnaanam karma cha kartaa cha tridhaiva gunabhedatah | / Prochyate gunasankhyaane yathaavachchhrunu taanyapi || 19 ||_

सर्वभूतेषु येनैकं भावमव्ययमीक्षते ।  
अविभक्तं विभक्तेषु तज्ज्ञानं विद्धि सात्त्विकम् ॥ २० ॥  

_Sarvabhooteshu yenaikam bhaavamavyayameekshate | / Avibhaktam vibhakteshu tajjnaanam viddhi saattvikam || 20 ||_

पृथक्त्वेन तु यज्ज्ञानं नानाभावान्पृथग्विधान् ।  
वेत्ति सर्वेषु भूतेषु तज्ज्ञानं विद्धि राजसम् ॥ २१ ॥  

_Pruthaktvena tu yajjnaanam naanaabhaavaanpruthagvidhaan | / Vetti sarveshu bhooteshu tajjnaanam viddhi raajasam || 21 ||_

यत्तु कृत्स्नवदेकस्मिन्कार्ये सक्तमहैतुकम् ।  
अतत्त्वार्थवदल्पं च तत्तामसमुदाहृतम् ॥ २२ ॥  

_Yattu krutsnavadekasminkaarye saktamahaitukam | / Atattvaarthavadalpam cha tattaamasamudaahrutam || 22 ||_

नियतं सङ्गरहितमरागद्वेषतः कृतम् ।  
अफलप्रेप्सुना कर्म यत्तत्सात्त्विकमुच्यते ॥ २३ ॥  

_Niyatam sangarahitamaraagadveshatah krutam | / Aphalaprepsunaa karma yattatsaattvikamuchyate || 23 ||_

यत्तु कामेप्सुना कर्म साहङ्कारेण वा पुनः ।  
क्रियते बहुलायासं तद्राजसमुदाहृतम् ॥ २४ ॥  

_Yattu kaamepsunaa karma saahankaarena vaa punah | / Kriyate bahulaayaasam tadraajasamudaahrutam || 24 ||_

अनुबन्धं क्षयं हिंसामनपेक्ष्य च पौरुषम् ।  
मोहादारभ्यते कर्म यत्तत्तामसमुच्यते ॥ २५ ॥  

_Anubandham kshayam hinsaamanapekshya cha paurusham | / Mohaadaarabhyate karma yattattaamasamuchyate || 25 ||_

मुक्तसङ्गोऽनहंवादी धृत्युत्साहसमन्वितः ।  
सिद्ध्यसिद्ध्योर्निर्विकारः कर्ता सात्त्विक उच्यते ॥ २६ ॥  

_Muktasango'nahanvaadee dhrutyutsaahasamanvitah | / Siddhyasiddhyornirvikaarah kartaa saattvika uchyate || 26 ||_

रागी कर्मफलप्रेप्सुर्लुब्धो हिंसात्मकोऽशुचिः ।  
हर्षशोकान्वितः कर्ता राजसः परिकीर्तितः ॥ २७ ॥  

_Raagee karmaphalaprepsurlubdho hinsaatmako'shuchih | / Harshashokaanvitah kartaa raajasah parikeertitah || 27 ||_

अयुक्तः प्राकृतः स्तब्धः शठो नैष्कृतिकोऽलसः ।  
विषादी दीर्घसूत्री च कर्ता तामस उच्यते ॥ २८ ॥  

_Ayuktah praakrutah stabdhah shatho naishkrutiko'lasah | / Vishaadee deerghasootree cha kartaa taamasa uchyate || 28 ||_

बुद्धेर्भेदं धृतेश्चैव गुणतस्त्रिविधं शृणु ।  
प्रोच्यमानमशेषेण पृथक्त्वेन धनञ्जय ॥ २९ ॥  

_Buddherbhedam dhruteshchaiva gunatastrividham shrunu | / Prochyamaanamasheshena pruthaktvena dhananjaya || 29 ||_

प्रवृत्तिं च निवृत्तिं च कार्याकार्ये भयाभये ।  
बन्धं मोक्षं च या वेत्ति बुद्धिः सा पार्थ सात्त्विकी ॥ ३० ॥  

_Pravruttim cha nivruttim cha kaaryaakaarye bhayaabhaye | / Bandham moksham cha yaa vetti buddhih saa paartha saattvikee || 30 ||_

यया धर्ममधर्मं च कार्यं चाकार्यमेव च ।  
अयथावत्प्रजानाति बुद्धिः सा पार्थ राजसी ॥ ३१ ॥  

_Yayaa dharmamadharmam cha kaaryam chaakaaryameva cha | / Ayathaavatprajaanaati buddhih saa paartha raajasee || 31 ||_

अधर्मं धर्ममिति या मन्यते तमसावृता ।  
सर्वार्थान्विपरीतांश्च बुद्धिः सा पार्थ तामसी ॥ ३२ ॥  

_Adharmam dharmamiti yaa manyate tamasaavrutaa | / Sarvaarthaanvipareetaanshcha buddhih saa paartha taamasee || 32 ||_

धृत्या यया धारयते मनःप्राणेन्द्रियक्रियाः ।  
योगेनाव्यभिचारिण्या धृतिः सा पार्थ सात्त्विकी ॥ ३३ ॥  

_Dhrutyaa yayaa dhaarayate manahpraanendriyakriyaah | / Yogenaavyabhichaarinyaa dhrutih saa paartha saattvikee || 33 ||_

यया तु धर्मकामार्थान्धृत्या धारयतेऽर्जुन ।  
प्रसङ्गेन फलाकाङ्क्षी धृतिः सा पार्थ राजसी ॥ ३४ ॥  

_Yayaa tu dharmakaamaarthaandhrutyaa dhaarayate'rjuna | / Prasangena phalaakaankshee dhrutih saa paartha raajasee || 34 ||_

यया स्वप्नं भयं शोकं विषादं मदमेव च ।  
न विमुञ्चति दुर्मेधा धृतिः सा पार्थ तामसी ॥ ३५ ॥  

_Yayaa svapnam bhayam shokam vishaadam madameva cha | / Na vimunchati durmedhaa dhrutih saa paartha taamasee || 35 ||_

सुखं त्विदानीं त्रिविधं शृणु मे भरतर्षभ ।  
अभ्यासाद्रमते यत्र दुःखान्तं च निगच्छति ॥ ३६ ॥  

_Sukham tvidaaneem trividham shrunu me bharatarshabha | / Abhyaasaadramate yatra duhkhaantam cha nigachchhati || 36 ||_

यत्तदग्रे विषमिव परिणामेऽमृतोपमम् ।  
तत्सुखं सात्त्विकं प्रोक्तमात्मबुद्धिप्रसादजम् ॥ ३७ ॥  

_Yattadagre vishamiva parinaame'mrutopamam | / Tatsukham saattvikam proktamaatmabuddhiprasaadajam || 37 ||_

विषयेन्द्रियसंयोगाद्यत्तदग्रेऽमृतोपमम् ।  
परिणामे विषमिव तत्सुखं राजसं स्मृतम् ॥ ३८ ॥  

_Vishayendriyasanyogaadyattadagre'mrutopamam | / Parinaame vishamiva tatsukham raajasam smrutam || 38 ||_

यदग्रे चानुबन्धे च सुखं मोहनमात्मनः ।  
निद्रालस्यप्रमादोत्थं तत्तामसमुदाहृतम् ॥ ३९ ॥  

_Yadagre chaanubandhe cha sukham mohanamaatmanah | / Nidraalasyapramaadottham tattaamasamudaahrutam || 39 ||_

न तदस्ति पृथिव्यां वा दिवि देवेषु वा पुनः ।  
सत्त्वं प्रकृतिजैर्मुक्तं यदेभिः स्यात्त्रिभिर्गुणैः ॥ ४० ॥  

_Na tadasti pruthivyaam vaa divi deveshu vaa punah | / Sattvam prakrutijairmuktam yadebhih syaattribhirgunaih || 40 ||_

ब्राह्मणक्षत्रियविशां शूद्राणां च परन्तप ।  
कर्माणि प्रविभक्तानि स्वभावप्रभवैर्गुणैः ॥ ४१ ॥  

_Braahmanakshatriyavishaam shoodraanaam cha parantapa | / Karmaani pravibhaktaani svabhaavaprabhavairgunaih || 41 ||_

शमो दमस्तपः शौचं क्षान्तिरार्जवमेव च ।  
ज्ञानं विज्ञानमास्तिक्यं ब्रह्मकर्म स्वभावजम् ॥ ४२ ॥  

_Shamo damastapah shaucham kshaantiraarjavameva cha | / Jnaanam vijnaanamaastikyam brahmakarma svabhaavajam || 42 ||_

शौर्यं तेजो धृतिर्दाक्ष्यं युद्धे चाप्यपलायनम् ।  
दानमीश्वरभावश्च क्षात्रं कर्म स्वभावजम् ॥ ४३ ॥  

_Shauryam tejo dhrutirdaakshyam yuddhe chaapyapalaayanam | / Daanameeshvarabhaavashcha kshaatram karma svabhaavajam || 43 ||_

कृषिगौरक्ष्यवाणिज्यं वैश्यकर्म स्वभावजम् ।  
परिचर्यात्मकं कर्म शूद्रस्यापि स्वभावजम् ॥ ४४ ॥  

_Krushigaurakshyavaanijyam vaishyakarma svabhaavajam | / Paricharyaatmakam karma shoodrasyaapi svabhaavajam || 44 ||_

स्वे स्वे कर्मण्यभिरतः संसिद्धिं लभते नरः ।  
स्वकर्मनिरतः सिद्धिं यथा विन्दति तच्छृणु ॥ ४५ ॥  

_Sve sve karmanyabhiratah sansiddhim labhate narah | / Svakarmaniratah siddhim yathaa vindati tachchhrunu || 45 ||_

यतः प्रवृत्तिर्भूतानां येन सर्वमिदं ततम् ।  
स्वकर्मणा तमभ्यर्च्य सिद्धिं विन्दति मानवः ॥ ४६ ॥  

_Yatah pravruttirbhootaanaam yena sarvamidam tatam | / Svakarmanaa tamabhyarchya siddhim vindati maanavah || 46 ||_

श्रेयान्स्वधर्मो विगुणः परधर्मात्स्वनुष्ठितात् ।  
स्वभावनियतं कर्म कुर्वन्नाप्नोति किल्बिषम् ॥ ४७ ॥  

_Shreyaansvadharmo vigunah paradharmaatsvanushthitaat | / Svabhaavaniyatam karma kurvannaapnoti kilbisham || 47 ||_

सहजं कर्म कौन्तेय सदोषमपि न त्यजेत् ।  
सर्वारम्भा हि दोषेण धूमेनाग्निरिवावृताः ॥ ४८ ॥  

_Sahajam karma kaunteya sadoshamapi na tyajet | / Sarvaarambhaa hi doshena dhoomenaagnirivaavrutaah || 48 ||_

असक्तबुद्धिः सर्वत्र जितात्मा विगतस्पृहः ।  
नैष्कर्म्यसिद्धिं परमां संन्यासेनाधिगच्छति ॥ ४९ ॥  

_Asaktabuddhih sarvatra jitaatmaa vigataspruhah | / Naishkarmyasiddhim paramaam sannyaasenaadhigachchhati || 49 ||_

सिद्धिं प्राप्तो यथा ब्रह्म तथाप्नोति निबोध मे ।  
समासेनैव कौन्तेय निष्ठा ज्ञानस्य या परा ॥ ५० ॥  

_Siddhim praapto yathaa brahma tathaapnoti nibodha me | / Samaasenaiva kaunteya nishthaa jnaanasya yaa paraa || 50 ||_

बुद्ध्या विशुद्धया युक्तो धृत्यात्मानं नियम्य च ।  
शब्दादीन्विषयांस्त्यक्त्वा रागद्वेषौ व्युदस्य च ॥ ५१ ॥  

_Buddhyaa vishuddhayaa yukto dhrutyaatmaanam niyamya cha | / Shabdaadeenvishayaanstyaktvaa raagadveshau vyudasya cha || 51 ||_

विविक्तसेवी लघ्वाशी यतवाक्कायमानसः ।  
ध्यानयोगपरो नित्यं वैराग्यं समुपाश्रितः ॥ ५२ ॥  

_Viviktasevee laghvaashee yatavaakkaayamaanasah | / Dhyaanayogaparo nityam vairaagyam samupaashritah || 52 ||_

अहङ्कारं बलं दर्पं कामं क्रोधं परिग्रहम् ।  
विमुच्य निर्ममः शान्तो ब्रह्मभूयाय कल्पते ॥ ५३ ॥  

_Ahankaaram balam darpam kaamam krodham parigraham | / Vimuchya nirmamah shaanto brahmabhooyaaya kalpate || 53 ||_

ब्रह्मभूतः प्रसन्नात्मा न शोचति न काङ्क्षति ।  
समः सर्वेषु भूतेषु मद्भक्तिं लभते पराम् ॥ ५४ ॥  

_Brahmabhootah prasannaatmaa na shochati na kaankshati | / Samah sarveshu bhooteshu madbhaktim labhate paraam || 54 ||_

भक्त्या मामभिजानाति यावान्यश्चास्मि तत्त्वतः ।  
ततो मां तत्त्वतो ज्ञात्वा विशते तदनन्तरम् ॥ ५५ ॥  

_Bhaktyaa maamabhijaanaati yaavaanyashchaasmi tattvatah | / Tato maam tattvato jnaatvaa vishate tadanantaram || 55 ||_

सर्वकर्माण्यपि सदा कुर्वाणो मद्व्यपाश्रयः ।  
मत्प्रसादादवाप्नोति शाश्वतं पदमव्ययम् ॥ ५६ ॥  

_Sarvakarmaanyapi sadaa kurvaano madvyapaashrayah | / Matprasaadaadavaapnoti shaashvatam padamavyayam || 56 ||_

चेतसा सर्वकर्माणि मयि संन्यस्य मत्परः ।  
बुद्धियोगमुपाश्रित्य मच्चित्तः सततं भव ॥ ५७ ॥  

_Chetasaa sarvakarmaani mayi sannyasya matparah | / Buddhiyogamupaashritya machchittah satatam bhava || 57 ||_

मच्चित्तः सर्वदुर्गाणि मत्प्रसादात्तरिष्यसि ।  
अथ चेत्त्वमहङ्कारान्न श्रोष्यसि विनङ्क्ष्यसि ॥ ५८ ॥  

_Machchittah sarvadurgaani matprasaadaattarishyasi | / Atha chettvamahankaaraanna shroshyasi vinankshyasi || 58 ||_

यदहङ्कारमाश्रित्य न योत्स्य इति मन्यसे ।  
मिथ्यैष व्यवसायस्ते प्रकृतिस्त्वां नियोक्ष्यति ॥ ५९ ॥  

_Yadahankaaramaashritya na yotsya iti manyase | / Mithyaisha vyavasaayaste prakrutistvaam niyokshyati || 59 ||_

स्वभावजेन कौन्तेय निबद्धः स्वेन कर्मणा ।  
कर्तुं नेच्छसि यन्मोहात्करिष्यस्यवशोऽपि तत् ॥ ६० ॥  

_Svabhaavajena kaunteya nibaddhah svena karmanaa | / Kartum nechchhasi yanmohaatkarishyasyavasho'pi tat || 60 ||_

ईश्वरः सर्वभूतानां हृद्देशेऽर्जुन तिष्ठति ।  
भ्रामयन्सर्वभूतानि यन्त्रारूढानि मायया ॥ ६१ ॥  

_Eeshvarah sarvabhootaanaam hruddeshe'rjuna tishthati | / Bhraamayansarvabhootaani yantraaroodhaani maayayaa || 61 ||_

तमेव शरणं गच्छ सर्वभावेन भारत ।  
तत्प्रसादात्परां शान्तिं स्थानं प्राप्स्यसि शाश्वतम् ॥ ६२ ॥  

_Tameva sharanam gachchha sarvabhaavena bhaarata | / Tatprasaadaatparaam shaantim sthaanam praapsyasi shaashvatam || 62 ||_

इति ते ज्ञानमाख्यातं गुह्याद्गुह्यतरं मया ।  
विमृश्यैतदशेषेण यथेच्छसि तथा कुरु ॥ ६३ ॥  

_Iti te jnaanamaakhyaatam guhyaadguhyataram mayaa | / Vimrushyaitadasheshena yathechchhasi tathaa kuru || 63 ||_

सर्वगुह्यतमं भूयः शृणु मे परमं वचः ।  
इष्टोऽसि मे दृढमिति ततो वक्ष्यामि ते हितम् ॥ ६४ ॥  

_Sarvaguhyatamam bhooyah shrunu me paramam vachah | / Ishto'si me drudhamiti tato vakshyaami te hitam || 64 ||_

मन्मना भव मद्भक्तो मद्याजी मां नमस्कुरु ।  
मामेवैष्यसि सत्यं ते प्रतिजाने प्रियोऽसि मे ॥ ६५ ॥  

_Manmanaa bhava madbhakto madyaajee maam namaskuru | / Maamevaishyasi satyam te pratijaane priyo'si me || 65 ||_

सर्वधर्मान्परित्यज्य मामेकं शरणं व्रज ।  
अहं त्वां सर्वपापेभ्यो मोक्षयिष्यामि मा शुचः ॥ ६६ ॥  

_Sarvadharmaanparityajya maamekam sharanam vraja | / Aham tvaam sarvapaapebhyo mokshayishyaami maa shuchah || 66 ||_

इदं ते नातपस्काय नाभक्ताय कदाचन ।  
न चाशुश्रूषवे वाच्यं न च मां योऽभ्यसूयति ॥ ६७ ॥  

_Idam te naatapaskaaya naabhaktaaya kadaachana | / Na chaashushrooshave vaachyam na cha maam yo'bhyasooyati || 67 ||_

य इदं परमं गुह्यं मद्भक्तेष्वभिधास्यति ।  
भक्तिं मयि परां कृत्वा मामेवैष्यत्यसंशयः ॥ ६८ ॥  

_Ya idam paramam guhyam madbhakteshvabhidhaasyati | / Bhaktim mayi paraam krutvaa maamevaishyatyasanshayah || 68 ||_

न च तस्मान्मनुष्येषु कश्चिन्मे प्रियकृत्तमः ।  
भविता न च मे तस्मादन्यः प्रियतरो भुवि ॥ ६९ ॥  

_Na cha tasmaanmanushyeshu kashchinme priyakruttamah | / Bhavitaa na cha me tasmaadanyah priyataro bhuvi || 69 ||_

अध्येष्यते च य इमं धर्म्यं संवादमावयोः ।  
ज्ञानयज्ञेन तेनाहमिष्टः स्यामिति मे मतिः ॥ ७० ॥  

_Adhyeshyate cha ya imam dharmyam sanvaadamaavayoh | / Jnaanayajnena tenaahamishtah syaamiti me matih || 70 ||_

श्रद्धावाननसूयश्च शृणुयादपि यो नरः ।  
सोऽपि मुक्तः शुभाँल्लोकान्प्राप्नुयात्पुण्यकर्मणाम् ॥ ७१ ॥  

_Shraddhaavaananasooyashcha shrunuyaadapi yo narah | / So'pi muktah shubhaanllokaanpraapnuyaatpunyakarmanaam || 71 ||_

कच्चिदेतच्छ्रुतं पार्थ त्वयैकाग्रेण चेतसा ।  
कच्चिदज्ञानसम्मोहः प्रनष्टस्ते धनञ्जय ॥ ७२ ॥  

_Kachchidetachchhrutam paartha tvayaikaagrena chetasaa | / Kachchidajnaanasammohah pranashtaste dhananjaya || 72 ||_

### अर्जुन उवाच
_Arjuna uvaacha_

नष्टो मोहः स्मृतिर्लब्धा त्वत्प्रसादान्मयाच्युत ।  
स्थितोऽस्मि गतसन्देहः करिष्ये वचनं तव ॥ ७३ ॥  

_Nashto mohah smrutirlabdhaa tvatprasaadaanmayaachyuta | / Sthito'smi gatasandehah karishye vachanam tava || 73 ||_

### सञ्जय उवाच
_Sanjaya uvaacha_

इत्यहं वासुदेवस्य पार्थस्य च महात्मनः ।  
संवादमिममश्रौषमद्भुतं रोमहर्षणम् ॥ ७४ ॥  

_Ityaham vaasudevasya paarthasya cha mahaatmanah | / Sanvaadamimamashraushamadbhutam romaharshanam || 74 ||_

व्यासप्रसादाच्छ्रुतवानेतद्गुह्यमहं परम् ।  
योगं योगेश्वरात्कृष्णात्साक्षात्कथयतः स्वयम् ॥ ७५ ॥  

_Vyaasaprasaadaachchhrutavaanetadguhyamaham param | / Yogam yogeshvaraatkrushnaatsaakshaatkathayatah svayam || 75 ||_

राजन्संस्मृत्य संस्मृत्य संवादमिममद्भुतम् ।  
केशवार्जुनयोः पुण्यं हृष्यामि च मुहुर्मुहुः ॥ ७६ ॥  

_Raajansansmrutya sansmrutya sanvaadamimamadbhutam | / Keshavaarjunayoh punyam hrushyaami cha muhurmuhuh || 76 ||_

तच्च संस्मृत्य संस्मृत्य रूपमत्यद्भुतं हरेः ।  
विस्मयो मे महान् राजन्हृष्यामि च पुनः पुनः ॥ ७७ ॥  

_Tachcha sansmrutya sansmrutya roopamatyadbhutam hareh | / Vismayo me mahaan raajanhrushyaami cha punah punah || 77 ||_

यत्र योगेश्वरः कृष्णो यत्र पार्थो धनुर्धरः ।  
तत्र श्रीर्विजयो भूतिर्ध्रुवा नीतिर्मतिर्मम ॥ ७८ ॥  

_Yatra yogeshvarah krushno yatra paartho dhanurdharah | / Tatra shreervijayo bhootirdhruvaa neetirmatirmama || 78 ||_

ॐ तत्सदिति श्रीमद्भगवद्गीतासूपनिषत्सु  
ब्रह्मविद्यायां योगशास्त्रे श्रीकृष्णार्जुनसंवादे  
मोक्षसंन्यासयोगो नाम अष्टादशोऽध्यायः ॥  

_Om tatsaditi shreemadbhagavadgeetaasoopanishatsu / Brahmavidyaayaam yogashaastre shreekrushnaarjunasanvaade / Mokshasannyaasayogo naama ashtaadasho'dhyaayah ||_