# Gita 16 · Daivasura Sampad Vibhaga Yoga · गीता १६ · दैवासुरसम्पद्विभागयोगः

- Type: Chapter (chapter 16 of the Shrimad Bhagavad Gita)
- Language: Sanskrit
- Verses: 24
- Verified: yes
- Read in the app: https://pocketpothi.com/read?t=bhagavad-gita-16
- Share link: https://pocketpothi.com/p/fm
- Page: https://pocketpothi.com/texts/bhagavad-gita-16

## Text (Devanagari, with simple Roman spelling below each verse)

### श्रीभगवानुवाच
_Shreebhagavaanuvaacha_

अभयं सत्त्वसंशुद्धिर्ज्ञानयोगव्यवस्थितिः ।  
दानं दमश्च यज्ञश्च स्वाध्यायस्तप आर्जवम् ॥ १ ॥  

_Abhayam sattvasanshuddhirjnaanayogavyavasthitih | / Daanam damashcha yajnashcha svaadhyaayastapa aarjavam || 1 ||_

अहिंसा सत्यमक्रोधस्त्यागः शान्तिरपैशुनम् ।  
दया भूतेष्वलोलुप्त्वं मार्दवं ह्रीरचापलम् ॥ २ ॥  

_Ahinsaa satyamakrodhastyaagah shaantirapaishunam | / Dayaa bhooteshvaloluptvam maardavam hreerachaapalam || 2 ||_

तेजः क्षमा धृतिः शौचमद्रोहो नातिमानिता ।  
भवन्ति सम्पदं दैवीमभिजातस्य भारत ॥ ३ ॥  

_Tejah kshamaa dhrutih shauchamadroho naatimaanitaa | / Bhavanti sampadam daiveemabhijaatasya bhaarata || 3 ||_

दम्भो दर्पोऽभिमानश्च क्रोधः पारुष्यमेव च ।  
अज्ञानं चाभिजातस्य पार्थ सम्पदमासुरीम् ॥ ४ ॥  

_Dambho darpo'bhimaanashcha krodhah paarushyameva cha | / Ajnaanam chaabhijaatasya paartha sampadamaasureem || 4 ||_

दैवी सम्पद्विमोक्षाय निबन्धायासुरी मता ।  
मा शुचः सम्पदं दैवीमभिजातोऽसि पाण्डव ॥ ५ ॥  

_Daivee sampadvimokshaaya nibandhaayaasuree mataa | / Maa shuchah sampadam daiveemabhijaato'si paandava || 5 ||_

द्वौ भूतसर्गौ लोकेऽस्मिन्दैव आसुर एव च ।  
दैवो विस्तरशः प्रोक्त आसुरं पार्थ मे शृणु ॥ ६ ॥  

_Dvau bhootasargau loke'smindaiva aasura eva cha | / Daivo vistarashah prokta aasuram paartha me shrunu || 6 ||_

प्रवृत्तिं च निवृत्तिं च जना न विदुरासुराः ।  
न शौचं नापि चाचारो न सत्यं तेषु विद्यते ॥ ७ ॥  

_Pravruttim cha nivruttim cha janaa na viduraasuraah | / Na shaucham naapi chaachaaro na satyam teshu vidyate || 7 ||_

असत्यमप्रतिष्ठं ते जगदाहुरनीश्वरम् ।  
अपरस्परसम्भूतं किमन्यत्कामहैतुकम् ॥ ८ ॥  

_Asatyamapratishtham te jagadaahuraneeshvaram | / Aparasparasambhootam kimanyatkaamahaitukam || 8 ||_

एतां दृष्टिमवष्टभ्य नष्टात्मानोऽल्पबुद्धयः ।  
प्रभवन्त्युग्रकर्माणः क्षयाय जगतोऽहिताः ॥ ९ ॥  

_Etaam drushtimavashtabhya nashtaatmaano'lpabuddhayah | / Prabhavantyugrakarmaanah kshayaaya jagato'hitaah || 9 ||_

काममाश्रित्य दुष्पूरं दम्भमानमदान्विताः ।  
मोहाद्गृहीत्वासद्ग्राहान्प्रवर्तन्तेऽशुचिव्रताः ॥ १० ॥  

_Kaamamaashritya dushpooram dambhamaanamadaanvitaah | / Mohaadgruheetvaasadgraahaanpravartante'shuchivrataah || 10 ||_

चिन्तामपरिमेयां च प्रलयान्तामुपाश्रिताः ।  
कामोपभोगपरमा एतावदिति निश्चिताः ॥ ११ ॥  

_Chintaamaparimeyaam cha pralayaantaamupaashritaah | / Kaamopabhogaparamaa etaavaditi nishchitaah || 11 ||_

आशापाशशतैर्बद्धाः कामक्रोधपरायणाः ।  
ईहन्ते कामभोगार्थमन्यायेनार्थसञ्चयान् ॥ १२ ॥  

_Aashaapaashashatairbaddhaah kaamakrodhaparaayanaah | / Eehante kaamabhogaarthamanyaayenaarthasanchayaan || 12 ||_

इदमद्य मया लब्धमिमं प्राप्स्ये मनोरथम् ।  
इदमस्तीदमपि मे भविष्यति पुनर्धनम् ॥ १३ ॥  

_Idamadya mayaa labdhamimam praapsye manoratham | / Idamasteedamapi me bhavishyati punardhanam || 13 ||_

असौ मया हतः शत्रुर्हनिष्ये चापरानपि ।  
ईश्वरोऽहमहं भोगी सिद्धोऽहं बलवान्सुखी ॥ १४ ॥  

_Asau mayaa hatah shatrurhanishye chaaparaanapi | / Eeshvaro'hamaham bhogee siddho'ham balavaansukhee || 14 ||_

आढ्योऽभिजनवानस्मि कोऽन्योऽस्ति सदृशो मया ।  
यक्ष्ये दास्यामि मोदिष्य इत्यज्ञानविमोहिताः ॥ १५ ॥  

_Aadhyo'bhijanavaanasmi ko'nyo'sti sadrusho mayaa | / Yakshye daasyaami modishya ityajnaanavimohitaah || 15 ||_

अनेकचित्तविभ्रान्ता मोहजालसमावृताः ।  
प्रसक्ताः कामभोगेषु पतन्ति नरकेऽशुचौ ॥ १६ ॥  

_Anekachittavibhraantaa mohajaalasamaavrutaah | / Prasaktaah kaamabhogeshu patanti narake'shuchau || 16 ||_

आत्मसम्भाविताः स्तब्धा धनमानमदान्विताः ।  
यजन्ते नामयज्ञैस्ते दम्भेनाविधिपूर्वकम् ॥ १७ ॥  

_Aatmasambhaavitaah stabdhaa dhanamaanamadaanvitaah | / Yajante naamayajnaiste dambhenaavidhipoorvakam || 17 ||_

अहङ्कारं बलं दर्पं कामं क्रोधं च संश्रिताः ।  
मामात्मपरदेहेषु प्रद्विषन्तोऽभ्यसूयकाः ॥ १८ ॥  

_Ahankaaram balam darpam kaamam krodham cha sanshritaah | / Maamaatmaparadeheshu pradvishanto'bhyasooyakaah || 18 ||_

तानहं द्विषतः क्रूरान्संसारेषु नराधमान् ।  
क्षिपाम्यजस्रमशुभानासुरीष्वेव योनिषु ॥ १९ ॥  

_Taanaham dvishatah krooraansansaareshu naraadhamaan | / Kshipaamyajasramashubhaanaasureeshveva yonishu || 19 ||_

आसुरीं योनिमापन्ना मूढा जन्मनि जन्मनि ।  
मामप्राप्यैव कौन्तेय ततो यान्त्यधमां गतिम् ॥ २० ॥  

_Aasureem yonimaapannaa moodhaa janmani janmani | / Maamapraapyaiva kaunteya tato yaantyadhamaam gatim || 20 ||_

त्रिविधं नरकस्येदं द्वारं नाशनमात्मनः ।  
कामः क्रोधस्तथा लोभस्तस्मादेतत्त्रयं त्यजेत् ॥ २१ ॥  

_Trividham narakasyedam dvaaram naashanamaatmanah | / Kaamah krodhastathaa lobhastasmaadetattrayam tyajet || 21 ||_

एतैर्विमुक्तः कौन्तेय तमोद्वारैस्त्रिभिर्नरः ।  
आचरत्यात्मनः श्रेयस्ततो याति परां गतिम् ॥ २२ ॥  

_Etairvimuktah kaunteya tamodvaaraistribhirnarah | / Aacharatyaatmanah shreyastato yaati paraam gatim || 22 ||_

यः शास्त्रविधिमुत्सृज्य वर्तते कामकारतः ।  
न स सिद्धिमवाप्नोति न सुखं न परां गतिम् ॥ २३ ॥  

_Yah shaastravidhimutsrujya vartate kaamakaaratah | / Na sa siddhimavaapnoti na sukham na paraam gatim || 23 ||_

तस्माच्छास्त्रं प्रमाणं ते कार्याकार्यव्यवस्थितौ ।  
ज्ञात्वा शास्त्रविधानोक्तं कर्म कर्तुमिहार्हसि ॥ २४ ॥  

_Tasmaachchhaastram pramaanam te kaaryaakaaryavyavasthitau | / Jnaatvaa shaastravidhaanoktam karma kartumihaarhasi || 24 ||_

ॐ तत्सदिति श्रीमद्भगवद्गीतासूपनिषत्सु  
ब्रह्मविद्यायां योगशास्त्रे श्रीकृष्णार्जुनसंवादे  
दैवासुरसम्पद्विभागयोगो नाम षोडशोऽध्यायः ॥  

_Om tatsaditi shreemadbhagavadgeetaasoopanishatsu / Brahmavidyaayaam yogashaastre shreekrushnaarjunasanvaade / Daivaasurasampadvibhaagayogo naama shodasho'dhyaayah ||_