# Gita 12 · Bhakti Yoga · गीता १२ · भक्तियोगः

- Type: Chapter (chapter 12 of the Shrimad Bhagavad Gita)
- Language: Sanskrit
- Verses: 20
- Verified: yes
- Read in the app: https://pocketpothi.com/read?t=bhagavad-gita-12
- Share link: https://pocketpothi.com/p/fg
- Page: https://pocketpothi.com/texts/bhagavad-gita-12

## Text (Devanagari, with simple Roman spelling below each verse)

### अर्जुन उवाच
_Arjuna uvaacha_

एवं सततयुक्ता ये भक्तास्त्वां पर्युपासते ।  
ये चाप्यक्षरमव्यक्तं तेषां के योगवित्तमाः ॥ १ ॥  

_Evam satatayuktaa ye bhaktaastvaam paryupaasate | / Ye chaapyaksharamavyaktam teshaam ke yogavittamaah || 1 ||_

### श्रीभगवानुवाच
_Shreebhagavaanuvaacha_

मय्यावेश्य मनो ये मां नित्ययुक्ता उपासते ।  
श्रद्धया परयोपेतास्ते मे युक्ततमा मताः ॥ २ ॥  

_Mayyaaveshya mano ye maam nityayuktaa upaasate | / Shraddhayaa parayopetaaste me yuktatamaa mataah || 2 ||_

ये त्वक्षरमनिर्देश्यमव्यक्तं पर्युपासते ।  
सर्वत्रगमचिन्त्यं च कूटस्थमचलं ध्रुवम् ॥ ३ ॥  

_Ye tvaksharamanirdeshyamavyaktam paryupaasate | / Sarvatragamachintyam cha kootasthamachalam dhruvam || 3 ||_

संनियम्येन्द्रियग्रामं सर्वत्र समबुद्धयः ।  
ते प्राप्नुवन्ति मामेव सर्वभूतहिते रताः ॥ ४ ॥  

_Sanniyamyendriyagraamam sarvatra samabuddhayah | / Te praapnuvanti maameva sarvabhootahite rataah || 4 ||_

क्लेशोऽधिकतरस्तेषामव्यक्तासक्तचेतसाम् ।  
अव्यक्ता हि गतिर्दुःखं देहवद्भिरवाप्यते ॥ ५ ॥  

_Klesho'dhikatarasteshaamavyaktaasaktachetasaam | / Avyaktaa hi gatirduhkham dehavadbhiravaapyate || 5 ||_

ये तु सर्वाणि कर्माणि मयि संन्यस्य मत्पराः ।  
अनन्येनैव योगेन मां ध्यायन्त उपासते ॥ ६ ॥  

_Ye tu sarvaani karmaani mayi sannyasya matparaah | / Ananyenaiva yogena maam dhyaayanta upaasate || 6 ||_

तेषामहं समुद्धर्ता मृत्युसंसारसागरात् ।  
भवामि नचिरात्पार्थ मय्यावेशितचेतसाम् ॥ ७ ॥  

_Teshaamaham samuddhartaa mrutyusansaarasaagaraat | / Bhavaami nachiraatpaartha mayyaaveshitachetasaam || 7 ||_

मय्येव मन आधत्स्व मयि बुद्धिं निवेशय ।  
निवसिष्यसि मय्येव अत ऊर्ध्वं न संशयः ॥ ८ ॥  

_Mayyeva mana aadhatsva mayi buddhim niveshaya | / Nivasishyasi mayyeva ata oordhvam na sanshayah || 8 ||_

अथ चित्तं समाधातुं न शक्नोषि मयि स्थिरम् ।  
अभ्यासयोगेन ततो मामिच्छाप्तुं धनञ्जय ॥ ९ ॥  

_Atha chittam samaadhaatum na shaknoshi mayi sthiram | / Abhyaasayogena tato maamichchhaaptum dhananjaya || 9 ||_

अभ्यासेऽप्यसमर्थोऽसि मत्कर्मपरमो भव ।  
मदर्थमपि कर्माणि कुर्वन्सिद्धिमवाप्स्यसि ॥ १० ॥  

_Abhyaase'pyasamartho'si matkarmaparamo bhava | / Madarthamapi karmaani kurvansiddhimavaapsyasi || 10 ||_

अथैतदप्यशक्तोऽसि कर्तुं मद्योगमाश्रितः ।  
सर्वकर्मफलत्यागं ततः कुरु यतात्मवान् ॥ ११ ॥  

_Athaitadapyashakto'si kartum madyogamaashritah | / Sarvakarmaphalatyaagam tatah kuru yataatmavaan || 11 ||_

श्रेयो हि ज्ञानमभ्यासाज्ज्ञानाद्ध्यानं विशिष्यते ।  
ध्यानात्कर्मफलत्यागस्त्यागाच्छान्तिरनन्तरम् ॥ १२ ॥  

_Shreyo hi jnaanamabhyaasaajjnaanaaddhyaanam vishishyate | / Dhyaanaatkarmaphalatyaagastyaagaachchhaantiranantaram || 12 ||_

अद्वेष्टा सर्वभूतानां मैत्रः करुण एव च ।  
निर्ममो निरहङ्कारः समदुःखसुखः क्षमी ॥ १३ ॥  

_Adveshtaa sarvabhootaanaam maitrah karuna eva cha | / Nirmamo nirahankaarah samaduhkhasukhah kshamee || 13 ||_

सन्तुष्टः सततं योगी यतात्मा दृढनिश्चयः ।  
मय्यर्पितमनोबुद्धिर्यो मद्भक्तः स मे प्रियः ॥ १४ ॥  

_Santushtah satatam yogee yataatmaa drudhanishchayah | / Mayyarpitamanobuddhiryo madbhaktah sa me priyah || 14 ||_

यस्मान्नोद्विजते लोको लोकान्नोद्विजते च यः ।  
हर्षामर्षभयोद्वेगैर्मुक्तो यः स च मे प्रियः ॥ १५ ॥  

_Yasmaannodvijate loko lokaannodvijate cha yah | / Harshaamarshabhayodvegairmukto yah sa cha me priyah || 15 ||_

अनपेक्षः शुचिर्दक्ष उदासीनो गतव्यथः ।  
सर्वारम्भपरित्यागी यो मद्भक्तः स मे प्रियः ॥ १६ ॥  

_Anapekshah shuchirdaksha udaaseeno gatavyathah | / Sarvaarambhaparityaagee yo madbhaktah sa me priyah || 16 ||_

यो न हृष्यति न द्वेष्टि न शोचति न काङ्क्षति ।  
शुभाशुभपरित्यागी भक्तिमान्यः स मे प्रियः ॥ १७ ॥  

_Yo na hrushyati na dveshti na shochati na kaankshati | / Shubhaashubhaparityaagee bhaktimaanyah sa me priyah || 17 ||_

समः शत्रौ च मित्रे च तथा मानापमानयोः ।  
शीतोष्णसुखदुःखेषु समः सङ्गविवर्जितः ॥ १८ ॥  

_Samah shatrau cha mitre cha tathaa maanaapamaanayoh | / Sheetoshnasukhaduhkheshu samah sangavivarjitah || 18 ||_

तुल्यनिन्दास्तुतिर्मौनी सन्तुष्टो येन केनचित् ।  
अनिकेतः स्थिरमतिर्भक्तिमान्मे प्रियो नरः ॥ १९ ॥  

_Tulyanindaastutirmaunee santushto yena kenachit | / Aniketah sthiramatirbhaktimaanme priyo narah || 19 ||_

ये तु धर्म्यामृतमिदं यथोक्तं पर्युपासते ।  
श्रद्दधाना मत्परमा भक्तास्तेऽतीव मे प्रियाः ॥ २० ॥  

_Ye tu dharmyaamrutamidam yathoktam paryupaasate | / Shraddadhaanaa matparamaa bhaktaaste'teeva me priyaah || 20 ||_

ॐ तत्सदिति श्रीमद्भगवद्गीतासूपनिषत्सु ब्रह्मविद्यायां योगशास्त्रे  
श्रीकृष्णार्जुनसंवादे भक्तियोगो नाम द्वादशोऽध्यायः ॥  

_Om tatsaditi shreemadbhagavadgeetaasoopanishatsu brahmavidyaayaam yogashaastre / Shreekrushnaarjunasanvaade bhaktiyogo naama dvaadasho'dhyaayah ||_