{"id":"bhagavad-gita-11","code":"ff","title":{"dev":"गीता ११ · विश्वरूपदर्शनयोगः","rom":"Gita 11 · Vishvarupa Darshana Yoga"},"type":"gita-adhyaya","typeLabel":"Chapter","language":"sa","languageName":"Sanskrit","deity":["krishna"],"aliases":["Bhagavad Gita chapter 11","Gita adhyay 11","गीता अध्याय 11"],"book":{"id":"bhagavad-gita","n":11,"title":"Shrimad Bhagavad Gita"},"verses":55,"sections":[{"kind":"heading","dev":"अर्जुन उवाच","rom":"Arjuna uvaacha"},{"kind":"verse","n":1,"dev":"मदनुग्रहाय परमं गुह्यमध्यात्मसंज्ञितम् ।\nयत्त्वयोक्तं वचस्तेन मोहोऽयं विगतो मम ॥ १ ॥","rom":"Madanugrahaaya paramam guhyamadhyaatmasanjnitam |\nYattvayoktam vachastena moho'yam vigato mama || 1 ||"},{"kind":"verse","n":2,"dev":"भवाप्ययौ हि भूतानां श्रुतौ विस्तरशो मया ।\nत्वत्तः कमलपत्राक्ष माहात्म्यमपि चाव्ययम् ॥ २ ॥","rom":"Bhavaapyayau hi bhootaanaam shrutau vistarasho mayaa |\nTvattah kamalapatraaksha maahaatmyamapi chaavyayam || 2 ||"},{"kind":"verse","n":3,"dev":"एवमेतद्यथात्थ त्वमात्मानं परमेश्वर ।\nद्रष्टुमिच्छामि ते रूपमैश्वरं पुरुषोत्तम ॥ ३ ॥","rom":"Evametadyathaattha tvamaatmaanam parameshvara |\nDrashtumichchhaami te roopamaishvaram purushottama || 3 ||"},{"kind":"verse","n":4,"dev":"मन्यसे यदि तच्छक्यं मया द्रष्टुमिति प्रभो ।\nयोगेश्वर ततो मे त्वं दर्शयात्मानमव्ययम् ॥ ४ ॥","rom":"Manyase yadi tachchhakyam mayaa drashtumiti prabho |\nYogeshvara tato me tvam darshayaatmaanamavyayam || 4 ||"},{"kind":"heading","dev":"श्रीभगवानुवाच","rom":"Shreebhagavaanuvaacha"},{"kind":"verse","n":5,"dev":"पश्य मे पार्थ रूपाणि शतशोऽथ सहस्रशः ।\nनानाविधानि दिव्यानि नानावर्णाकृतीनि च ॥ ५ ॥","rom":"Pashya me paartha roopaani shatasho'tha sahasrashah |\nNaanaavidhaani divyaani naanaavarnaakruteeni cha || 5 ||"},{"kind":"verse","n":6,"dev":"पश्यादित्यान्वसून्रुद्रानश्विनौ मरुतस्तथा ।\nबहून्यदृष्टपूर्वाणि पश्याश्चर्याणि भारत ॥ ६ ॥","rom":"Pashyaadityaanvasoonrudraanashvinau marutastathaa |\nBahoonyadrushtapoorvaani pashyaashcharyaani bhaarata || 6 ||"},{"kind":"verse","n":7,"dev":"इहैकस्थं जगत्कृत्स्नं पश्याद्य सचराचरम् ।\nमम देहे गुडाकेश यच्चान्यद् द्रष्टुमिच्छसि ॥ ७ ॥","rom":"Ihaikastham jagatkrutsnam pashyaadya sacharaacharam |\nMama dehe gudaakesha yachchaanyad drashtumichchhasi || 7 ||"},{"kind":"verse","n":8,"dev":"न तु मां शक्यसे द्रष्टुमनेनैव स्वचक्षुषा ।\nदिव्यं ददामि ते चक्षुः पश्य मे योगमैश्वरम् ॥ ८ ॥","rom":"Na tu maam shakyase drashtumanenaiva svachakshushaa |\nDivyam dadaami te chakshuh pashya me yogamaishvaram || 8 ||"},{"kind":"heading","dev":"सञ्जय उवाच","rom":"Sanjaya uvaacha"},{"kind":"verse","n":9,"dev":"एवमुक्त्वा ततो राजन्महायोगेश्वरो हरिः ।\nदर्शयामास पार्थाय परमं रूपमैश्वरम् ॥ ९ ॥","rom":"Evamuktvaa tato raajanmahaayogeshvaro harih |\nDarshayaamaasa paarthaaya paramam roopamaishvaram || 9 ||"},{"kind":"verse","n":10,"dev":"अनेकवक्त्रनयनमनेकाद्भुतदर्शनम् ।\nअनेकदिव्याभरणं दिव्यानेकोद्यतायुधम् ॥ १० ॥","rom":"Anekavaktranayanamanekaadbhutadarshanam |\nAnekadivyaabharanam divyaanekodyataayudham || 10 ||"},{"kind":"verse","n":11,"dev":"दिव्यमाल्याम्बरधरं दिव्यगन्धानुलेपनम् ।\nसर्वाश्चर्यमयं देवमनन्तं विश्वतोमुखम् ॥ ११ ॥","rom":"Divyamaalyaambaradharam divyagandhaanulepanam |\nSarvaashcharyamayam devamanantam vishvatomukham || 11 ||"},{"kind":"verse","n":12,"dev":"दिवि सूर्यसहस्रस्य भवेद्युगपदुत्थिता ।\nयदि भाः सदृशी सा स्याद्भासस्तस्य महात्मनः ॥ १२ ॥","rom":"Divi sooryasahasrasya bhavedyugapadutthitaa |\nYadi bhaah sadrushee saa syaadbhaasastasya mahaatmanah || 12 ||"},{"kind":"verse","n":13,"dev":"तत्रैकस्थं जगत्कृत्स्नं प्रविभक्तमनेकधा ।\nअपश्यद्देवदेवस्य शरीरे पाण्डवस्तदा ॥ १३ ॥","rom":"Tatraikastham jagatkrutsnam pravibhaktamanekadhaa |\nApashyaddevadevasya shareere paandavastadaa || 13 ||"},{"kind":"verse","n":14,"dev":"ततः स विस्मयाविष्टो हृष्टरोमा धनञ्जयः ।\nप्रणम्य शिरसा देवं कृताञ्जलिरभाषत ॥ १४ ॥","rom":"Tatah sa vismayaavishto hrushtaromaa dhananjayah |\nPranamya shirasaa devam krutaanjalirabhaashata || 14 ||"},{"kind":"heading","dev":"अर्जुन उवाच","rom":"Arjuna uvaacha"},{"kind":"verse","n":15,"dev":"पश्यामि देवांस्तव देव देहे\nसर्वांस्तथा भूतविशेषसङ्घान् ।\nब्रह्माणमीशं कमलासनस्थ-\nमृषींश्च सर्वानुरगांश्च दिव्यान् ॥ १५ ॥","rom":"Pashyaami devaanstava deva dehe\nSarvaanstathaa bhootavisheshasanghaan |\nBrahmaanameesham kamalaasanastha-\nMrusheenshcha sarvaanuragaanshcha divyaan || 15 ||"},{"kind":"verse","n":16,"dev":"अनेकबाहूदरवक्त्रनेत्रं\nपश्यामि त्वां सर्वतोऽनन्तरूपम् ।\nनान्तं न मध्यं न पुनस्तवादिं\nपश्यामि विश्वेश्वर विश्वरूप ॥ १६ ॥","rom":"Anekabaahoodaravaktranetram\nPashyaami tvaam sarvato'nantaroopam |\nNaantam na madhyam na punastavaadim\nPashyaami vishveshvara vishvaroopa || 16 ||"},{"kind":"verse","n":17,"dev":"किरीटिनं गदिनं चक्रिणं च\nतेजोराशिं सर्वतो दीप्तिमन्तम् ।\nपश्यामि त्वां दुर्निरीक्ष्यं समन्ता-\nद्दीप्तानलार्कद्युतिमप्रमेयम् ॥ १७ ॥","rom":"Kireetinam gadinam chakrinam cha\nTejoraashim sarvato deeptimantam |\nPashyaami tvaam durnireekshyam samantaa-\nDdeeptaanalaarkadyutimaprameyam || 17 ||"},{"kind":"verse","n":18,"dev":"त्वमक्षरं परमं वेदितव्यं\nत्वमस्य विश्वस्य परं निधानम् ।\nत्वमव्ययः शाश्वतधर्मगोप्ता\nसनातनस्त्वं पुरुषो मतो मे ॥ १८ ॥","rom":"Tvamaksharam paramam veditavyam\nTvamasya vishvasya param nidhaanam |\nTvamavyayah shaashvatadharmagoptaa\nSanaatanastvam purusho mato me || 18 ||"},{"kind":"verse","n":19,"dev":"अनादिमध्यान्तमनन्तवीर्य-\nमनन्तबाहुं शशिसूर्यनेत्रम् ।\nपश्यामि त्वां दीप्तहुताशवक्त्रं\nस्वतेजसा विश्वमिदं तपन्तम् ॥ १९ ॥","rom":"Anaadimadhyaantamanantaveerya-\nManantabaahum shashisooryanetram |\nPashyaami tvaam deeptahutaashavaktram\nSvatejasaa vishvamidam tapantam || 19 ||"},{"kind":"verse","n":20,"dev":"द्यावापृथिव्योरिदमन्तरं हि\nव्याप्तं त्वयैकेन दिशश्च सर्वाः ।\nदृष्ट्वाद्भुतं रूपमुग्रं तवेदं\nलोकत्रयं प्रव्यथितं महात्मन् ॥ २० ॥","rom":"Dyaavaapruthivyoridamantaram hi\nVyaaptam tvayaikena dishashcha sarvaah |\nDrushtvaadbhutam roopamugram tavedam\nLokatrayam pravyathitam mahaatman || 20 ||"},{"kind":"verse","n":21,"dev":"अमी हि त्वां सुरसङ्घा विशन्ति\nकेचिद्भीताः प्राञ्जलयो गृणन्ति ।\nस्वस्तीत्युक्त्वा महर्षिसिद्धसङ्घाः\nस्तुवन्ति त्वां स्तुतिभिः पुष्कलाभिः ॥ २१ ॥","rom":"Amee hi tvaam surasanghaa vishanti\nKechidbheetaah praanjalayo grunanti |\nSvasteetyuktvaa maharshisiddhasanghaah\nStuvanti tvaam stutibhih pushkalaabhih || 21 ||"},{"kind":"verse","n":22,"dev":"रुद्रादित्या वसवो ये च साध्या\nविश्वेऽश्विनौ मरुतश्चोष्मपाश्च ।\nगन्धर्वयक्षासुरसिद्धसङ्घा\nवीक्षन्ते त्वां विस्मिताश्चैव सर्वे ॥ २२ ॥","rom":"Rudraadityaa vasavo ye cha saadhyaa\nVishve'shvinau marutashchoshmapaashcha |\nGandharvayakshaasurasiddhasanghaa\nVeekshante tvaam vismitaashchaiva sarve || 22 ||"},{"kind":"verse","n":23,"dev":"रूपं महत्ते बहुवक्त्रनेत्रं\nमहाबाहो बहुबाहूरुपादम् ।\nबहूदरं बहुदंष्ट्राकरालं\nदृष्ट्वा लोकाः प्रव्यथितास्तथाहम् ॥ २३ ॥","rom":"Roopam mahatte bahuvaktranetram\nMahaabaaho bahubaahoorupaadam |\nBahoodaram bahudanshtraakaraalam\nDrushtvaa lokaah pravyathitaastathaaham || 23 ||"},{"kind":"verse","n":24,"dev":"नभःस्पृशं दीप्तमनेकवर्णं\nव्यात्ताननं दीप्तविशालनेत्रम् ।\nदृष्ट्वा हि त्वां प्रव्यथितान्तरात्मा\nधृतिं न विन्दामि शमं च विष्णो ॥ २४ ॥","rom":"Nabhahsprusham deeptamanekavarnam\nVyaattaananam deeptavishaalanetram |\nDrushtvaa hi tvaam pravyathitaantaraatmaa\nDhrutim na vindaami shamam cha vishno || 24 ||"},{"kind":"verse","n":25,"dev":"दंष्ट्राकरालानि च ते मुखानि\nदृष्ट्वैव कालानलसन्निभानि ।\nदिशो न जाने न लभे च शर्म\nप्रसीद देवेश जगन्निवास ॥ २५ ॥","rom":"Danshtraakaraalaani cha te mukhaani\nDrushtvaiva kaalaanalasannibhaani |\nDisho na jaane na labhe cha sharma\nPraseeda devesha jagannivaasa || 25 ||"},{"kind":"verse","n":26,"dev":"अमी च त्वां धृतराष्ट्रस्य पुत्राः\nसर्वे सहैवावनिपालसङ्घैः ।\nभीष्मो द्रोणः सूतपुत्रस्तथासौ\nसहास्मदीयैरपि योधमुख्यैः ॥ २६ ॥","rom":"Amee cha tvaam dhrutaraashtrasya putraah\nSarve sahaivaavanipaalasanghaih |\nBheeshmo dronah sootaputrastathaasau\nSahaasmadeeyairapi yodhamukhyaih || 26 ||"},{"kind":"verse","n":27,"dev":"वक्त्राणि ते त्वरमाणा विशन्ति\nदंष्ट्राकरालानि भयानकानि ।\nकेचिद्विलग्ना दशनान्तरेषु\nसंदृश्यन्ते चूर्णितैरुत्तमाङ्गैः ॥ २७ ॥","rom":"Vaktraani te tvaramaanaa vishanti\nDanshtraakaraalaani bhayaanakaani |\nKechidvilagnaa dashanaantareshu\nSandrushyante choornitairuttamaangaih || 27 ||"},{"kind":"verse","n":28,"dev":"यथा नदीनां बहवोऽम्बुवेगाः\nसमुद्रमेवाभिमुखा द्रवन्ति ।\nतथा तवामी नरलोकवीरा\nविशन्ति वक्त्राण्यभिविज्वलन्ति ॥ २८ ॥","rom":"Yathaa nadeenaam bahavo'mbuvegaah\nSamudramevaabhimukhaa dravanti |\nTathaa tavaamee naralokaveeraa\nVishanti vaktraanyabhivijvalanti || 28 ||"},{"kind":"verse","n":29,"dev":"यथा प्रदीप्तं ज्वलनं पतङ्गा\nविशन्ति नाशाय समृद्धवेगाः ।\nतथैव नाशाय विशन्ति लोका-\nस्तवापि वक्त्राणि समृद्धवेगाः ॥ २९ ॥","rom":"Yathaa pradeeptam jvalanam patangaa\nVishanti naashaaya samruddhavegaah |\nTathaiva naashaaya vishanti lokaa-\nStavaapi vaktraani samruddhavegaah || 29 ||"},{"kind":"verse","n":30,"dev":"लेलिह्यसे ग्रसमानः समन्ता-\nल्लोकान्समग्रान्वदनैर्ज्वलद्भिः ।\nतेजोभिरापूर्य जगत्समग्रं\nभासस्तवोग्राः प्रतपन्ति विष्णो ॥ ३० ॥","rom":"Lelihyase grasamaanah samantaa-\nLlokaansamagraanvadanairjvaladbhih |\nTejobhiraapoorya jagatsamagram\nBhaasastavograah pratapanti vishno || 30 ||"},{"kind":"verse","n":31,"dev":"आख्याहि मे को भवानुग्ररूपो\nनमोऽस्तु ते देववर प्रसीद ।\nविज्ञातुमिच्छामि भवन्तमाद्यं\nन हि प्रजानामि तव प्रवृत्तिम् ॥ ३१ ॥","rom":"Aakhyaahi me ko bhavaanugraroopo\nNamo'stu te devavara praseeda |\nVijnaatumichchhaami bhavantamaadyam\nNa hi prajaanaami tava pravruttim || 31 ||"},{"kind":"heading","dev":"श्रीभगवानुवाच","rom":"Shreebhagavaanuvaacha"},{"kind":"verse","n":32,"dev":"कालोऽस्मि लोकक्षयकृत्प्रवृद्धो\nलोकान्समाहर्तुमिह प्रवृत्तः ।\nऋतेऽपि त्वां न भविष्यन्ति सर्वे\nयेऽवस्थिताः प्रत्यनीकेषु योधाः ॥ ३२ ॥","rom":"Kaalo'smi lokakshayakrutpravruddho\nLokaansamaahartumiha pravruttah |\nRute'pi tvaam na bhavishyanti sarve\nYe'vasthitaah pratyaneekeshu yodhaah || 32 ||"},{"kind":"verse","n":33,"dev":"तस्मात्त्वमुत्तिष्ठ यशो लभस्व\nजित्वा शत्रून् भुङ्क्ष्व राज्यं समृद्धम् ।\nमयैवैते निहताः पूर्वमेव\nनिमित्तमात्रं भव सव्यसाचिन् ॥ ३३ ॥","rom":"Tasmaattvamuttishtha yasho labhasva\nJitvaa shatroon bhunkshva raajyam samruddham |\nMayaivaite nihataah poorvameva\nNimittamaatram bhava savyasaachin || 33 ||"},{"kind":"verse","n":34,"dev":"द्रोणं च भीष्मं च जयद्रथं च\nकर्णं तथान्यानपि योधवीरान् ।\nमया हतांस्त्वं जहि मा व्यथिष्ठा\nयुध्यस्व जेतासि रणे सपत्नान् ॥ ३४ ॥","rom":"Dronam cha bheeshmam cha jayadratham cha\nKarnam tathaanyaanapi yodhaveeraan |\nMayaa hataanstvam jahi maa vyathishthaa\nYudhyasva jetaasi rane sapatnaan || 34 ||"},{"kind":"heading","dev":"सञ्जय उवाच","rom":"Sanjaya uvaacha"},{"kind":"verse","n":35,"dev":"एतच्छ्रुत्वा वचनं केशवस्य\nकृताञ्जलिर्वेपमानः किरीटी ।\nनमस्कृत्वा भूय एवाह कृष्णं\nसगद्गदं भीतभीतः प्रणम्य ॥ ३५ ॥","rom":"Etachchhrutvaa vachanam keshavasya\nKrutaanjalirvepamaanah kireetee |\nNamaskrutvaa bhooya evaaha krushnam\nSagadgadam bheetabheetah pranamya || 35 ||"},{"kind":"heading","dev":"अर्जुन उवाच","rom":"Arjuna uvaacha"},{"kind":"verse","n":36,"dev":"स्थाने हृषीकेश तव प्रकीर्त्या\nजगत्प्रहृष्यत्यनुरज्यते च ।\nरक्षांसि भीतानि दिशो द्रवन्ति\nसर्वे नमस्यन्ति च सिद्धसङ्घाः ॥ ३६ ॥","rom":"Sthaane hrusheekesha tava prakeertyaa\nJagatprahrushyatyanurajyate cha |\nRakshaansi bheetaani disho dravanti\nSarve namasyanti cha siddhasanghaah || 36 ||"},{"kind":"verse","n":37,"dev":"कस्माच्च ते न नमेरन्महात्मन्\nगरीयसे ब्रह्मणोऽप्यादिकर्त्रे ।\nअनन्त देवेश जगन्निवास\nत्वमक्षरं सदसत्तत्परं यत् ॥ ३७ ॥","rom":"Kasmaachcha te na nameranmahaatman\nGareeyase brahmano'pyaadikartre |\nAnanta devesha jagannivaasa\nTvamaksharam sadasattatparam yat || 37 ||"},{"kind":"verse","n":38,"dev":"त्वमादिदेवः पुरुषः पुराण-\nस्त्वमस्य विश्वस्य परं निधानम् ।\nवेत्तासि वेद्यं च परं च धाम\nत्वया ततं विश्वमनन्तरूप ॥ ३८ ॥","rom":"Tvamaadidevah purushah puraana-\nStvamasya vishvasya param nidhaanam |\nVettaasi vedyam cha param cha dhaama\nTvayaa tatam vishvamanantaroopa || 38 ||"},{"kind":"verse","n":39,"dev":"वायुर्यमोऽग्निर्वरुणः शशाङ्कः\nप्रजापतिस्त्वं प्रपितामहश्च ।\nनमो नमस्तेऽस्तु सहस्रकृत्वः\nपुनश्च भूयोऽपि नमो नमस्ते ॥ ३९ ॥","rom":"Vaayuryamo'gnirvarunah shashaankah\nPrajaapatistvam prapitaamahashcha |\nNamo namaste'stu sahasrakrutvah\nPunashcha bhooyo'pi namo namaste || 39 ||"},{"kind":"verse","n":40,"dev":"नमः पुरस्तादथ पृष्ठतस्ते\nनमोऽस्तु ते सर्वत एव सर्व ।\nअनन्तवीर्यामितविक्रमस्त्वं\nसर्वं समाप्नोषि ततोऽसि सर्वः ॥ ४० ॥","rom":"Namah purastaadatha prushthataste\nNamo'stu te sarvata eva sarva |\nAnantaveeryaamitavikramastvam\nSarvam samaapnoshi tato'si sarvah || 40 ||"},{"kind":"verse","n":41,"dev":"सखेति मत्वा प्रसभं यदुक्तं\nहे कृष्ण हे यादव हे सखेति ।\nअजानता महिमानं तवेदं\nमया प्रमादात्प्रणयेन वापि ॥ ४१ ॥","rom":"Sakheti matvaa prasabham yaduktam\nHe krushna he yaadava he sakheti |\nAjaanataa mahimaanam tavedam\nMayaa pramaadaatpranayena vaapi || 41 ||"},{"kind":"verse","n":42,"dev":"यच्चावहासार्थमसत्कृतोऽसि\nविहारशय्यासनभोजनेषु ।\nएकोऽथवाप्यच्युत तत्समक्षं\nतत्क्षामये त्वामहमप्रमेयम् ॥ ४२ ॥","rom":"Yachchaavahaasaarthamasatkruto'si\nVihaarashayyaasanabhojaneshu |\nEko'thavaapyachyuta tatsamaksham\nTatkshaamaye tvaamahamaprameyam || 42 ||"},{"kind":"verse","n":43,"dev":"पितासि लोकस्य चराचरस्य\nत्वमस्य पूज्यश्च गुरुर्गरीयान् ।\nन त्वत्समोऽस्त्यभ्यधिकः कुतोऽन्यो\nलोकत्रयेऽप्यप्रतिमप्रभाव ॥ ४३ ॥","rom":"Pitaasi lokasya charaacharasya\nTvamasya poojyashcha gururgareeyaan |\nNa tvatsamo'styabhyadhikah kuto'nyo\nLokatraye'pyapratimaprabhaava || 43 ||"},{"kind":"verse","n":44,"dev":"तस्मात्प्रणम्य प्रणिधाय कायं\nप्रसादये त्वामहमीशमीड्यम् ।\nपितेव पुत्रस्य सखेव सख्युः\nप्रियः प्रियायार्हसि देव सोढुम् ॥ ४४ ॥","rom":"Tasmaatpranamya pranidhaaya kaayam\nPrasaadaye tvaamahameeshameedyam |\nPiteva putrasya sakheva sakhyuh\nPriyah priyaayaarhasi deva sodhum || 44 ||"},{"kind":"verse","n":45,"dev":"अदृष्टपूर्वं हृषितोऽस्मि दृष्ट्वा\nभयेन च प्रव्यथितं मनो मे ।\nतदेव मे दर्शय देव रूपं\nप्रसीद देवेश जगन्निवास ॥ ४५ ॥","rom":"Adrushtapoorvam hrushito'smi drushtvaa\nBhayena cha pravyathitam mano me |\nTadeva me darshaya deva roopam\nPraseeda devesha jagannivaasa || 45 ||"},{"kind":"verse","n":46,"dev":"किरीटिनं गदिनं चक्रहस्त-\nमिच्छामि त्वां द्रष्टुमहं तथैव ।\nतेनैव रूपेण चतुर्भुजेन\nसहस्रबाहो भव विश्वमूर्ते ॥ ४६ ॥","rom":"Kireetinam gadinam chakrahasta-\nMichchhaami tvaam drashtumaham tathaiva |\nTenaiva roopena chaturbhujena\nSahasrabaaho bhava vishvamoorte || 46 ||"},{"kind":"heading","dev":"श्रीभगवानुवाच","rom":"Shreebhagavaanuvaacha"},{"kind":"verse","n":47,"dev":"मया प्रसन्नेन तवार्जुनेदं\nरूपं परं दर्शितमात्मयोगात् ।\nतेजोमयं विश्वमनन्तमाद्यं\nयन्मे त्वदन्येन न दृष्टपूर्वम् ॥ ४७ ॥","rom":"Mayaa prasannena tavaarjunedam\nRoopam param darshitamaatmayogaat |\nTejomayam vishvamanantamaadyam\nYanme tvadanyena na drushtapoorvam || 47 ||"},{"kind":"verse","n":48,"dev":"न वेदयज्ञाध्ययनैर्न दानै-\nर्न च क्रियाभिर्न तपोभिरुग्रैः ।\nएवंरूपः शक्य अहं नृलोके\nद्रष्टुं त्वदन्येन कुरुप्रवीर ॥ ४८ ॥","rom":"Na vedayajnaadhyayanairna daanai-\nRna cha kriyaabhirna tapobhirugraih |\nEvanroopah shakya aham nruloke\nDrashtum tvadanyena kurupraveera || 48 ||"},{"kind":"verse","n":49,"dev":"मा ते व्यथा मा च विमूढभावो\nदृष्ट्वा रूपं घोरमीदृङ्ममेदम् ।\nव्यपेतभीः प्रीतमनाः पुनस्त्वं\nतदेव मे रूपमिदं प्रपश्य ॥ ४९ ॥","rom":"Maa te vyathaa maa cha vimoodhabhaavo\nDrushtvaa roopam ghorameedrunmamedam |\nVyapetabheeh preetamanaah punastvam\nTadeva me roopamidam prapashya || 49 ||"},{"kind":"heading","dev":"सञ्जय उवाच","rom":"Sanjaya uvaacha"},{"kind":"verse","n":50,"dev":"इत्यर्जुनं वासुदेवस्तथोक्त्वा\nस्वकं रूपं दर्शयामास भूयः ।\nआश्वासयामास च भीतमेनं\nभूत्वा पुनः सौम्यवपुर्महात्मा ॥ ५० ॥","rom":"Ityarjunam vaasudevastathoktvaa\nSvakam roopam darshayaamaasa bhooyah |\nAashvaasayaamaasa cha bheetamenam\nBhootvaa punah saumyavapurmahaatmaa || 50 ||"},{"kind":"heading","dev":"अर्जुन उवाच","rom":"Arjuna uvaacha"},{"kind":"verse","n":51,"dev":"दृष्ट्वेदं मानुषं रूपं तव सौम्यं जनार्दन ।\nइदानीमस्मि संवृत्तः सचेताः प्रकृतिं गतः ॥ ५१ ॥","rom":"Drushtvedam maanusham roopam tava saumyam janaardana |\nIdaaneemasmi sanvruttah sachetaah prakrutim gatah || 51 ||"},{"kind":"heading","dev":"श्रीभगवानुवाच","rom":"Shreebhagavaanuvaacha"},{"kind":"verse","n":52,"dev":"सुदुर्दर्शमिदं रूपं दृष्टवानसि यन्मम ।\nदेवा अप्यस्य रूपस्य नित्यं दर्शनकाङ्क्षिणः ॥ ५२ ॥","rom":"Sudurdarshamidam roopam drushtavaanasi yanmama |\nDevaa apyasya roopasya nityam darshanakaankshinah || 52 ||"},{"kind":"verse","n":53,"dev":"नाहं वेदैर्न तपसा न दानेन न चेज्यया ।\nशक्य एवंविधो द्रष्टुं दृष्टवानसि मां यथा ॥ ५३ ॥","rom":"Naaham vedairna tapasaa na daanena na chejyayaa |\nShakya evanvidho drashtum drushtavaanasi maam yathaa || 53 ||"},{"kind":"verse","n":54,"dev":"भक्त्या त्वनन्यया शक्य अहमेवंविधोऽर्जुन ।\nज्ञातुं द्रष्टुं च तत्त्वेन प्रवेष्टुं च परंतप ॥ ५४ ॥","rom":"Bhaktyaa tvananyayaa shakya ahamevanvidho'rjuna |\nJnaatum drashtum cha tattvena praveshtum cha parantapa || 54 ||"},{"kind":"verse","n":55,"dev":"मत्कर्मकृन्मत्परमो मद्भक्तः सङ्गवर्जितः ।\nनिर्वैरः सर्वभूतेषु यः स मामेति पाण्डव ॥ ५५ ॥","rom":"Matkarmakrunmatparamo madbhaktah sangavarjitah |\nNirvairah sarvabhooteshu yah sa maameti paandava || 55 ||"},{"kind":"prose","dev":"ॐ तत्सदिति श्रीमद्भगवद्गीतासूपनिषत्सु ब्रह्मविद्यायां योगशास्त्रे\nश्रीकृष्णार्जुनसंवादे विश्वरूपदर्शनयोगो नामैकादशोऽध्यायः ॥","rom":"Om tatsaditi shreemadbhagavadgeetaasoopanishatsu brahmavidyaayaam yogashaastre\nShreekrushnaarjunasanvaade vishvaroopadarshanayogo naamaikaadasho'dhyaayah ||"}],"verified":true,"url":"https://pocketpothi.com/texts/bhagavad-gita-11","appUrl":"https://pocketpothi.com/read?t=bhagavad-gita-11","shareUrl":"https://pocketpothi.com/p/ff"}