{"id":"bhagavad-gita-09","code":"fd","title":{"dev":"गीता ९ · राजविद्याराजगुह्ययोगः","rom":"Gita 9 · Rajavidya Rajaguhya Yoga"},"type":"gita-adhyaya","typeLabel":"Chapter","language":"sa","languageName":"Sanskrit","deity":["krishna"],"aliases":["Bhagavad Gita chapter 9","Gita adhyay 9","गीता अध्याय 9"],"book":{"id":"bhagavad-gita","n":9,"title":"Shrimad Bhagavad Gita"},"verses":34,"sections":[{"kind":"heading","dev":"श्रीभगवानुवाच","rom":"Shreebhagavaanuvaacha"},{"kind":"verse","n":1,"dev":"इदं तु ते गुह्यतमं प्रवक्ष्याम्यनसूयवे ।\nज्ञानं विज्ञानसहितं यज्ज्ञात्वा मोक्ष्यसेऽशुभात् ॥ १ ॥","rom":"Idam tu te guhyatamam pravakshyaamyanasooyave |\nJnaanam vijnaanasahitam yajjnaatvaa mokshyase'shubhaat || 1 ||"},{"kind":"verse","n":2,"dev":"राजविद्या राजगुह्यं पवित्रमिदमुत्तमम् ।\nप्रत्यक्षावगमं धर्म्यं सुसुखं कर्तुमव्ययम् ॥ २ ॥","rom":"Raajavidyaa raajaguhyam pavitramidamuttamam |\nPratyakshaavagamam dharmyam susukham kartumavyayam || 2 ||"},{"kind":"verse","n":3,"dev":"अश्रद्दधानाः पुरुषा धर्मस्यास्य परन्तप ।\nअप्राप्य मां निवर्तन्ते मृत्युसंसारवर्त्मनि ॥ ३ ॥","rom":"Ashraddadhaanaah purushaa dharmasyaasya parantapa |\nApraapya maam nivartante mrutyusansaaravartmani || 3 ||"},{"kind":"verse","n":4,"dev":"मया ततमिदं सर्वं जगदव्यक्तमूर्तिना ।\nमत्स्थानि सर्वभूतानि न चाहं तेष्ववस्थितः ॥ ४ ॥","rom":"Mayaa tatamidam sarvam jagadavyaktamoortinaa |\nMatsthaani sarvabhootaani na chaaham teshvavasthitah || 4 ||"},{"kind":"verse","n":5,"dev":"न च मत्स्थानि भूतानि पश्य मे योगमैश्वरम् ।\nभूतभृन्न च भूतस्थो ममात्मा भूतभावनः ॥ ५ ॥","rom":"Na cha matsthaani bhootaani pashya me yogamaishvaram |\nBhootabhrunna cha bhootastho mamaatmaa bhootabhaavanah || 5 ||"},{"kind":"verse","n":6,"dev":"यथाकाशस्थितो नित्यं वायुः सर्वत्रगो महान् ।\nतथा सर्वाणि भूतानि मत्स्थानीत्युपधारय ॥ ६ ॥","rom":"Yathaakaashasthito nityam vaayuh sarvatrago mahaan |\nTathaa sarvaani bhootaani matsthaaneetyupadhaaraya || 6 ||"},{"kind":"verse","n":7,"dev":"सर्वभूतानि कौन्तेय प्रकृतिं यान्ति मामिकाम् ।\nकल्पक्षये पुनस्तानि कल्पादौ विसृजाम्यहम् ॥ ७ ॥","rom":"Sarvabhootaani kaunteya prakrutim yaanti maamikaam |\nKalpakshaye punastaani kalpaadau visrujaamyaham || 7 ||"},{"kind":"verse","n":8,"dev":"प्रकृतिं स्वामवष्टभ्य विसृजामि पुनः पुनः ।\nभूतग्राममिमं कृत्स्नमवशं प्रकृतेर्वशात् ॥ ८ ॥","rom":"Prakrutim svaamavashtabhya visrujaami punah punah |\nBhootagraamamimam krutsnamavasham prakrutervashaat || 8 ||"},{"kind":"verse","n":9,"dev":"न च मां तानि कर्माणि निबध्नन्ति धनञ्जय ।\nउदासीनवदासीनमसक्तं तेषु कर्मसु ॥ ९ ॥","rom":"Na cha maam taani karmaani nibadhnanti dhananjaya |\nUdaaseenavadaaseenamasaktam teshu karmasu || 9 ||"},{"kind":"verse","n":10,"dev":"मयाध्यक्षेण प्रकृतिः सूयते सचराचरम् ।\nहेतुनानेन कौन्तेय जगद्विपरिवर्तते ॥ १० ॥","rom":"Mayaadhyakshena prakrutih sooyate sacharaacharam |\nHetunaanena kaunteya jagadviparivartate || 10 ||"},{"kind":"verse","n":11,"dev":"अवजानन्ति मां मूढा मानुषीं तनुमाश्रितम् ।\nपरं भावमजानन्तो मम भूतमहेश्वरम् ॥ ११ ॥","rom":"Avajaananti maam moodhaa maanusheem tanumaashritam |\nParam bhaavamajaananto mama bhootamaheshvaram || 11 ||"},{"kind":"verse","n":12,"dev":"मोघाशा मोघकर्माणो मोघज्ञाना विचेतसः ।\nराक्षसीमासुरीं चैव प्रकृतिं मोहिनीं श्रिताः ॥ १२ ॥","rom":"Moghaashaa moghakarmaano moghajnaanaa vichetasah |\nRaakshaseemaasureem chaiva prakrutim mohineem shritaah || 12 ||"},{"kind":"verse","n":13,"dev":"महात्मानस्तु मां पार्थ दैवीं प्रकृतिमाश्रिताः ।\nभजन्त्यनन्यमनसो ज्ञात्वा भूतादिमव्ययम् ॥ १३ ॥","rom":"Mahaatmaanastu maam paartha daiveem prakrutimaashritaah |\nBhajantyananyamanaso jnaatvaa bhootaadimavyayam || 13 ||"},{"kind":"verse","n":14,"dev":"सततं कीर्तयन्तो मां यतन्तश्च दृढव्रताः ।\nनमस्यन्तश्च मां भक्त्या नित्ययुक्ता उपासते ॥ १४ ॥","rom":"Satatam keertayanto maam yatantashcha drudhavrataah |\nNamasyantashcha maam bhaktyaa nityayuktaa upaasate || 14 ||"},{"kind":"verse","n":15,"dev":"ज्ञानयज्ञेन चाप्यन्ये यजन्तो मामुपासते ।\nएकत्वेन पृथक्त्वेन बहुधा विश्वतोमुखम् ॥ १५ ॥","rom":"Jnaanayajnena chaapyanye yajanto maamupaasate |\nEkatvena pruthaktvena bahudhaa vishvatomukham || 15 ||"},{"kind":"verse","n":16,"dev":"अहं क्रतुरहं यज्ञः स्वधाहमहमौषधम् ।\nमन्त्रोऽहमहमेवाज्यमहमग्निरहं हुतम् ॥ १६ ॥","rom":"Aham kraturaham yajnah svadhaahamahamaushadham |\nMantro'hamahamevaajyamahamagniraham hutam || 16 ||"},{"kind":"verse","n":17,"dev":"पिताहमस्य जगतो माता धाता पितामहः ।\nवेद्यं पवित्रमोंकार ऋक्साम यजुरेव च ॥ १७ ॥","rom":"Pitaahamasya jagato maataa dhaataa pitaamahah |\nVedyam pavitramonkaara ruksaama yajureva cha || 17 ||"},{"kind":"verse","n":18,"dev":"गतिर्भर्ता प्रभुः साक्षी निवासः शरणं सुहृत् ।\nप्रभवः प्रलयः स्थानं निधानं बीजमव्ययम् ॥ १८ ॥","rom":"Gatirbhartaa prabhuh saakshee nivaasah sharanam suhrut |\nPrabhavah pralayah sthaanam nidhaanam beejamavyayam || 18 ||"},{"kind":"verse","n":19,"dev":"तपाम्यहमहं वर्षं निगृह्णाम्युत्सृजामि च ।\nअमृतं चैव मृत्युश्च सदसच्चाहमर्जुन ॥ १९ ॥","rom":"Tapaamyahamaham varsham nigruhnaamyutsrujaami cha |\nAmrutam chaiva mrutyushcha sadasachchaahamarjuna || 19 ||"},{"kind":"verse","n":20,"dev":"त्रैविद्या मां सोमपाः पूतपापा\nयज्ञैरिष्ट्वा स्वर्गतिं प्रार्थयन्ते ।\nते पुण्यमासाद्य सुरेन्द्रलोक-\nमश्नन्ति दिव्यान्दिवि देवभोगान् ॥ २० ॥","rom":"Traividyaa maam somapaah pootapaapaa\nYajnairishtvaa svargatim praarthayante |\nTe punyamaasaadya surendraloka-\nMashnanti divyaandivi devabhogaan || 20 ||"},{"kind":"verse","n":21,"dev":"ते तं भुक्त्वा स्वर्गलोकं विशालं\nक्षीणे पुण्ये मर्त्यलोकं विशन्ति ।\nएवं त्रयीधर्ममनुप्रपन्ना\nगतागतं कामकामा लभन्ते ॥ २१ ॥","rom":"Te tam bhuktvaa svargalokam vishaalam\nKsheene punye martyalokam vishanti |\nEvam trayeedharmamanuprapannaa\nGataagatam kaamakaamaa labhante || 21 ||"},{"kind":"verse","n":22,"dev":"अनन्याश्चिन्तयन्तो मां ये जनाः पर्युपासते ।\nतेषां नित्याभियुक्तानां योगक्षेमं वहाम्यहम् ॥ २२ ॥","rom":"Ananyaashchintayanto maam ye janaah paryupaasate |\nTeshaam nityaabhiyuktaanaam yogakshemam vahaamyaham || 22 ||"},{"kind":"verse","n":23,"dev":"येऽप्यन्यदेवताभक्ता यजन्ते श्रद्धयान्विताः ।\nतेऽपि मामेव कौन्तेय यजन्त्यविधिपूर्वकम् ॥ २३ ॥","rom":"Ye'pyanyadevataabhaktaa yajante shraddhayaanvitaah |\nTe'pi maameva kaunteya yajantyavidhipoorvakam || 23 ||"},{"kind":"verse","n":24,"dev":"अहं हि सर्वयज्ञानां भोक्ता च प्रभुरेव च ।\nन तु मामभिजानन्ति तत्त्वेनातश्च्यवन्ति ते ॥ २४ ॥","rom":"Aham hi sarvayajnaanaam bhoktaa cha prabhureva cha |\nNa tu maamabhijaananti tattvenaatashchyavanti te || 24 ||"},{"kind":"verse","n":25,"dev":"यान्ति देवव्रता देवान्पितॄन्यान्ति पितृव्रताः ।\nभूतानि यान्ति भूतेज्या यान्ति मद्याजिनोऽपि माम् ॥ २५ ॥","rom":"Yaanti devavrataa devaanpitroonyaanti pitruvrataah |\nBhootaani yaanti bhootejyaa yaanti madyaajino'pi maam || 25 ||"},{"kind":"verse","n":26,"dev":"पत्रं पुष्पं फलं तोयं यो मे भक्त्या प्रयच्छति ।\nतदहं भक्त्युपहृतमश्नामि प्रयतात्मनः ॥ २६ ॥","rom":"Patram pushpam phalam toyam yo me bhaktyaa prayachchhati |\nTadaham bhaktyupahrutamashnaami prayataatmanah || 26 ||"},{"kind":"verse","n":27,"dev":"यत्करोषि यदश्नासि यज्जुहोषि ददासि यत् ।\nयत्तपस्यसि कौन्तेय तत्कुरुष्व मदर्पणम् ॥ २७ ॥","rom":"Yatkaroshi yadashnaasi yajjuhoshi dadaasi yat |\nYattapasyasi kaunteya tatkurushva madarpanam || 27 ||"},{"kind":"verse","n":28,"dev":"शुभाशुभफलैरेवं मोक्ष्यसे कर्मबन्धनैः ।\nसंन्यासयोगयुक्तात्मा विमुक्तो मामुपैष्यसि ॥ २८ ॥","rom":"Shubhaashubhaphalairevam mokshyase karmabandhanaih |\nSannyaasayogayuktaatmaa vimukto maamupaishyasi || 28 ||"},{"kind":"verse","n":29,"dev":"समोऽहं सर्वभूतेषु न मे द्वेष्योऽस्ति न प्रियः ।\nये भजन्ति तु मां भक्त्या मयि ते तेषु चाप्यहम् ॥ २९ ॥","rom":"Samo'ham sarvabhooteshu na me dveshyo'sti na priyah |\nYe bhajanti tu maam bhaktyaa mayi te teshu chaapyaham || 29 ||"},{"kind":"verse","n":30,"dev":"अपि चेत्सुदुराचारो भजते मामनन्यभाक् ।\nसाधुरेव स मन्तव्यः सम्यग्व्यवसितो हि सः ॥ ३० ॥","rom":"Api chetsuduraachaaro bhajate maamananyabhaak |\nSaadhureva sa mantavyah samyagvyavasito hi sah || 30 ||"},{"kind":"verse","n":31,"dev":"क्षिप्रं भवति धर्मात्मा शश्वच्छान्तिं निगच्छति ।\nकौन्तेय प्रति जानीहि न मे भक्तः प्रणश्यति ॥ ३१ ॥","rom":"Kshipram bhavati dharmaatmaa shashvachchhaantim nigachchhati |\nKaunteya prati jaaneehi na me bhaktah pranashyati || 31 ||"},{"kind":"verse","n":32,"dev":"मां हि पार्थ व्यपाश्रित्य येऽपि स्युः पापयोनयः ।\nस्त्रियो वैश्यास्तथा शूद्रास्तेऽपि यान्ति परां गतिम् ॥ ३२ ॥","rom":"Maam hi paartha vyapaashritya ye'pi syuh paapayonayah |\nStriyo vaishyaastathaa shoodraaste'pi yaanti paraam gatim || 32 ||"},{"kind":"verse","n":33,"dev":"किं पुनर्ब्राह्मणाः पुण्या भक्ता राजर्षयस्तथा ।\nअनित्यमसुखं लोकमिमं प्राप्य भजस्व माम् ॥ ३३ ॥","rom":"Kim punarbraahmanaah punyaa bhaktaa raajarshayastathaa |\nAnityamasukham lokamimam praapya bhajasva maam || 33 ||"},{"kind":"verse","n":34,"dev":"मन्मना भव मद्भक्तो मद्याजी मां नमस्कुरु ।\nमामेवैष्यसि युक्त्वैवमात्मानं मत्परायणः ॥ ३४ ॥","rom":"Manmanaa bhava madbhakto madyaajee maam namaskuru |\nMaamevaishyasi yuktvaivamaatmaanam matparaayanah || 34 ||"},{"kind":"prose","dev":"ॐ तत्सदिति श्रीमद्भगवद्गीतासूपनिषत्सु ब्रह्मविद्यायां योगशास्त्रे\nश्रीकृष्णार्जुनसंवादे राजविद्याराजगुह्ययोगो नाम नवमोऽध्यायः ॥","rom":"Om tatsaditi shreemadbhagavadgeetaasoopanishatsu brahmavidyaayaam yogashaastre\nShreekrushnaarjunasanvaade raajavidyaaraajaguhyayogo naama navamo'dhyaayah ||"}],"verified":true,"url":"https://pocketpothi.com/texts/bhagavad-gita-09","appUrl":"https://pocketpothi.com/read?t=bhagavad-gita-09","shareUrl":"https://pocketpothi.com/p/fd"}