# Aditya Hridayam · आदित्यहृदयम्

- Type: Stotra
- Language: Sanskrit
- Verses: 31
- Verified: yes
- Read in the app: https://pocketpothi.com/read?t=aditya-hridayam
- Share link: https://pocketpothi.com/p/aq
- Page: https://pocketpothi.com/texts/aditya-hridayam

## Text (Devanagari, with simple Roman spelling below each verse)

ततो युद्धपरिश्रान्तं समरे चिन्तया स्थितम् ।  
रावणं चाग्रतो दृष्ट्वा युद्धाय समुपस्थितम् ॥ १ ॥  

_Tato yuddhaparishraantam samare chintayaa sthitam | / Raavanam chaagrato drushtvaa yuddhaaya samupasthitam || 1 ||_

दैवतैश्च समागम्य द्रष्टुमभ्यागतो रणम् ।  
उपागम्याब्रवीद्राममगस्त्यो भगवानृषिः ॥ २ ॥  

_Daivataishcha samaagamya drashtumabhyaagato ranam | / Upaagamyaabraveedraamamagastyo bhagavaanrushih || 2 ||_

राम राम महाबाहो शृणु गुह्यं सनातनम् ।  
येन सर्वानरीन् वत्स समरे विजयिष्यसि ॥ ३ ॥  

_Raama raama mahaabaaho shrunu guhyam sanaatanam | / Yena sarvaanareen vatsa samare vijayishyasi || 3 ||_

आदित्यहृदयं पुण्यं सर्वशत्रुविनाशनम् ।  
जयावहं जपेन्नित्यमक्षय्यं परमं शिवम् ॥ ४ ॥  

_Aadityahrudayam punyam sarvashatruvinaashanam | / Jayaavaham japennityamakshayyam paramam shivam || 4 ||_

सर्वमङ्गलमाङ्गल्यं सर्वपापप्रणाशनम् ।  
चिन्ताशोकप्रशमनमायुर्वर्धनमुत्तमम् ॥ ५ ॥  

_Sarvamangalamaangalyam sarvapaapapranaashanam | / Chintaashokaprashamanamaayurvardhanamuttamam || 5 ||_

रश्मिमन्तं समुद्यन्तं देवासुरनमस्कृतम् ।  
पूजयस्व विवस्वन्तं भास्करं भुवनेश्वरम् ॥ ६ ॥  

_Rashmimantam samudyantam devaasuranamaskrutam | / Poojayasva vivasvantam bhaaskaram bhuvaneshvaram || 6 ||_

सर्वदेवात्मको ह्येष तेजस्वी रश्मिभावनः ।  
एष देवासुरगणाँल्लोकान् पाति गभस्तिभिः ॥ ७ ॥  

_Sarvadevaatmako hyesha tejasvee rashmibhaavanah | / Esha devaasuraganaanllokaan paati gabhastibhih || 7 ||_

एष ब्रह्मा च विष्णुश्च शिवः स्कन्दः प्रजापतिः ।  
महेन्द्रो धनदः कालो यमः सोमो ह्यपां पतिः ॥ ८ ॥  

_Esha brahmaa cha vishnushcha shivah skandah prajaapatih | / Mahendro dhanadah kaalo yamah somo hyapaam patih || 8 ||_

पितरो वसवः साध्या ह्यश्विनौ मरुतो मनुः ।  
वायुर्वह्निः प्रजाप्राण ऋतुकर्ता प्रभाकरः ॥ ९ ॥  

_Pitaro vasavah saadhyaa hyashvinau maruto manuh | / Vaayurvahnih prajaapraana rutukartaa prabhaakarah || 9 ||_

आदित्यः सविता सूर्यः खगः पूषा गभस्तिमान् ।  
सुवर्णसदृशो भानुर्हिरण्यरेता दिवाकरः ॥ १० ॥  

_Aadityah savitaa sooryah khagah pooshaa gabhastimaan | / Suvarnasadrusho bhaanurhiranyaretaa divaakarah || 10 ||_

हरिदश्वः सहस्रार्चिः सप्तसप्तिर्मरीचिमान् ।  
तिमिरोन्मथनः शम्भुस्त्वष्टा मार्ताण्ड अंशुमान् ॥ ११ ॥  

_Haridashvah sahasraarchih saptasaptirmareechimaan | / Timironmathanah shambhustvashtaa maartaanda anshumaan || 11 ||_

हिरण्यगर्भः शिशिरस्तपनो भास्करो रविः ।  
अग्निगर्भोऽदितेः पुत्रः शङ्खः शिशिरनाशनः ॥ १२ ॥  

_Hiranyagarbhah shishirastapano bhaaskaro ravih | / Agnigarbho'diteh putrah shankhah shishiranaashanah || 12 ||_

व्योमनाथस्तमोभेदी ऋग्यजुःसामपारगः ।  
घनवृष्टिरपां मित्रो विन्ध्यवीथीप्लवङ्गमः ॥ १३ ॥  

_Vyomanaathastamobhedee rugyajuhsaamapaaragah | / Ghanavrushtirapaam mitro vindhyaveetheeplavangamah || 13 ||_

आतपी मण्डली मृत्युः पिङ्गलः सर्वतापनः ।  
कविर्विश्वो महातेजा रक्तः सर्वभवोद्भवः ॥ १४ ॥  

_Aatapee mandalee mrutyuh pingalah sarvataapanah | / Kavirvishvo mahaatejaa raktah sarvabhavodbhavah || 14 ||_

नक्षत्रग्रहताराणामधिपो विश्वभावनः ।  
तेजसामपि तेजस्वी द्वादशात्मन्नमोऽस्तु ते ॥ १५ ॥  

_Nakshatragrahataaraanaamadhipo vishvabhaavanah | / Tejasaamapi tejasvee dvaadashaatmannamo'stu te || 15 ||_

नमः पूर्वाय गिरये पश्चिमायाद्रये नमः ।  
ज्योतिर्गणानां पतये दिनाधिपतये नमः ॥ १६ ॥  

_Namah poorvaaya giraye pashchimaayaadraye namah | / Jyotirganaanaam pataye dinaadhipataye namah || 16 ||_

जयाय जयभद्राय हर्यश्वाय नमो नमः ।  
नमो नमः सहस्रांशो आदित्याय नमो नमः ॥ १७ ॥  

_Jayaaya jayabhadraaya haryashvaaya namo namah | / Namo namah sahasraansho aadityaaya namo namah || 17 ||_

नम उग्राय वीराय सारङ्गाय नमो नमः ।  
नमः पद्मप्रबोधाय मार्ताण्डाय नमो नमः ॥ १८ ॥  

_Nama ugraaya veeraaya saarangaaya namo namah | / Namah padmaprabodhaaya maartaandaaya namo namah || 18 ||_

ब्रह्मेशानाच्युतेशाय सूर्यायादित्यवर्चसे ।  
भास्वते सर्वभक्षाय रौद्राय वपुषे नमः ॥ १९ ॥  

_Brahmeshaanaachyuteshaaya sooryaayaadityavarchase | / Bhaasvate sarvabhakshaaya raudraaya vapushe namah || 19 ||_

तमोघ्नाय हिमघ्नाय शत्रुघ्नायामितात्मने ।  
कृतघ्नघ्नाय देवाय ज्योतिषां पतये नमः ॥ २० ॥  

_Tamoghnaaya himaghnaaya shatrughnaayaamitaatmane | / Krutaghnaghnaaya devaaya jyotishaam pataye namah || 20 ||_

तप्तचामीकराभाय वह्नये विश्वकर्मणे ।  
नमस्तमोऽभिनिघ्नाय रुचये लोकसाक्षिणे ॥ २१ ॥  

_Taptachaameekaraabhaaya vahnaye vishvakarmane | / Namastamo'bhinighnaaya ruchaye lokasaakshine || 21 ||_

नाशयत्येष वै भूतं तदेव सृजति प्रभुः ।  
पायत्येष तपत्येष वर्षत्येष गभस्तिभिः ॥ २२ ॥  

_Naashayatyesha vai bhootam tadeva srujati prabhuh | / Paayatyesha tapatyesha varshatyesha gabhastibhih || 22 ||_

एष सुप्तेषु जागर्ति भूतेषु परिनिष्ठितः ।  
एष एवाग्निहोत्रं च फलं चैवाग्निहोत्रिणाम् ॥ २३ ॥  

_Esha supteshu jaagarti bhooteshu parinishthitah | / Esha evaagnihotram cha phalam chaivaagnihotrinaam || 23 ||_

वेदाश्च क्रतवश्चैव क्रतूनां फलमेव च ।  
यानि कृत्यानि लोकेषु सर्व एष रविः प्रभुः ॥ २४ ॥  

_Vedaashcha kratavashchaiva kratoonaam phalameva cha | / Yaani krutyaani lokeshu sarva esha ravih prabhuh || 24 ||_

एनमापत्सु कृच्छ्रेषु कान्तारेषु भयेषु च ।  
कीर्तयन् पुरुषः कश्चिन्नावसीदति राघव ॥ २५ ॥  

_Enamaapatsu kruchchhreshu kaantaareshu bhayeshu cha | / Keertayan purushah kashchinnaavaseedati raaghava || 25 ||_

पूजयस्वैनमेकाग्रो देवदेवं जगत्पतिम् ।  
एतत्त्रिगुणितं जप्त्वा युद्धेषु विजयिष्यसि ॥ २६ ॥  

_Poojayasvainamekaagro devadevam jagatpatim | / Etattrigunitam japtvaa yuddheshu vijayishyasi || 26 ||_

अस्मिन् क्षणे महाबाहो रावणं त्वं वधिष्यसि ।  
एवमुक्त्वा तदाऽगस्त्यो जगाम च यथागतम् ॥ २७ ॥  

_Asmin kshane mahaabaaho raavanam tvam vadhishyasi | / Evamuktvaa tadaa'gastyo jagaama cha yathaagatam || 27 ||_

एतच्छ्रुत्वा महातेजा नष्टशोकोऽभवत्तदा ।  
धारयामास सुप्रीतो राघवः प्रयतात्मवान् ॥ २८ ॥  

_Etachchhrutvaa mahaatejaa nashtashoko'bhavattadaa | / Dhaarayaamaasa supreeto raaghavah prayataatmavaan || 28 ||_

आदित्यं प्रेक्ष्य जप्त्वा तु परं हर्षमवाप्तवान् ।  
त्रिराचम्य शुचिर्भूत्वा धनुरादाय वीर्यवान् ॥ २९ ॥  

_Aadityam prekshya japtvaa tu param harshamavaaptavaan | / Triraachamya shuchirbhootvaa dhanuraadaaya veeryavaan || 29 ||_

रावणं प्रेक्ष्य हृष्टात्मा युद्धाय समुपागमत् ।  
सर्वयत्नेन महता वधे तस्य धृतोऽभवत् ॥ ३० ॥  

_Raavanam prekshya hrushtaatmaa yuddhaaya samupaagamat | / Sarvayatnena mahataa vadhe tasya dhruto'bhavat || 30 ||_

अथ रविरवदन्निरीक्ष्य रामं  
मुदितमनाः परमं प्रहृष्यमाणः ।  
निशिचरपतिसङ्क्षयं विदित्वा  
सुरगणमध्यगतो वचस्त्वरेति ॥ ३१ ॥  

_Atha raviravadannireekshya raamam / Muditamanaah paramam prahrushyamaanah | / Nishicharapatisankshayam viditvaa / Suraganamadhyagato vachastvareti || 31 ||_

### ॥ इति आदित्यहृदयम् ॥
_|| Iti aadityahrudayam ||_